Vakatekivu 24 - Vakavakadewa Vou kei na iVola tale eso

Na Vakawati nei Aisake

¹ A sa qase sara mai o Epara-ama, ka sa vakalougatataki koya o Jiova ena ka kecega sa cakava.

² Sa qai kaya vua na nona dauveiqaravi qase duadua, o koya sa lewa na ka kecega sa taukena, “Mo biuta mada na ligamu ena ruku ni sagaqu, ka vosa bubului.

³ Au vinakata mo bubului ena yaca i Jiova, na Kalou ni lomalagi kei na vuravura, ni o na sega ni digitaka e dua na watina na luvequ tagane mai vei ira na luvedra yalewa na kai Kenani ena vanua au tiko kina.

⁴ Mo na lako ga ki na noqu vanua ni sucu, ka la'ki kauta mai kina e dua na wati Aisake na luvequ mai vei ira na wekaqu.”

⁵ A sa tarogi koya na dauveiqaravi, “Ena vakacava beka kevaka e sega ni via lako vata mai kei au o goneyalewa ki na vanua oqo? Me'u kauta lesu tale li na luvemu ki na vanua o a lako mai kina?”

⁶ A sa kaya vua o Epara-ama, “Vakadeitaka mo kakua ni qai kauta lesu na luvequ ki kea!

⁷ O Jiova, na Kalou ni lomalagi, o koya sa kauti au mai na vale nei tamaqu kei na vanua ni noqu sucu, sai koya ga sa yalataka ni na solia na vanua oqo vei ira na noqu kawa. O koya ena tala na nona agilosi me liu vei iko, me rawa ni o la'ki kauta mai kina na wati luvequ mai kea.

⁸ Kevaka e sega ni via lako vata mai kei iko na goneyalewa, o sa na qai galala mai na nomu bubului. Ia mo kakua ga ni kauta lesu tale i kea na luvequ.”

⁹ A sa biuta na ligana na dauveiqaravi ena ruku ni saga i Epara-ama na nona turaga ka bubului me na vakayacora na ka a tukuna vua me cakava.

¹⁰ A sa kauta e tini na kameli ni nona turaga na dauveiqaravi, kei na i loloma digitaki, ka lako yani ki na koro i Neori mai Mesopotemia.

¹¹ Ia ena yakavi, sa cakava me ra tekiduru sobu na kameli ena yasa ni keliwai, ena gauna era lako mai kina na yalewa me ra taki wai.

¹² Sa qai masu na dauveiqaravi ka kaya, “Kemuni Jiova, na Kalou i Epara-ama na noqu Turaga, ni solia me'u rawata na ka au sa lako mai kina ena siga edaidai ka vakayacora na ka o ni sa yalataka vua na noqu Turaga.

¹³ Au sa tu oqo ena bati ni keliwai, ka ra na lako mai na yalewa mai na koro me ra taki wai.

¹⁴ Ia na yalewa ka'u na kaya vua, ‘Yalo vinaka, mo biuta sobu mada ki ra na nomu saqa me'u bau gunu,’ ka me qai kaya na yalewa, ‘Mo gunu mada, ka'u na vagunuvi ira talega na nomu kameli,’ ia me o ya sara ga na yalewa o ni sa digitaka vua na nomuni tamata o Aisake. Ena ka oqo au sa na kila kina ni sa dei tikoga na nomuni yalayala vua na noqu turaga.”

¹⁵ Ni bera ni oti na nona masu, sa basika mai o Repeka kei na nona saqa wai e toka ena vatavata ni tabana. O Repeka oqo na luve i Pecueli, o koya na luve i Milika na wati Neori, na taci Epara-ama.

¹⁶ E goneyalewa rairai vinaka sara, ka se bera ni bau veiyacovi kei na dua na tagane. A sa lako sobu ki na i keliwai ka takiva na nona saqa, ka lesu cake tale mai.

¹⁷ A sa cici yani na dauveiqaravi me tavaki koya, ka kaya, “Yalo vinaka sara, mo solia mada vei au na nomu saqa me'u bau gunu mai kina.”

¹⁸ A sa kaya na goneyalewa, “Mo ni gunu, na noqu turaga,” ka sa tauca sobu na nona saqa mai tabana ka roqota e ligana, ka vagunuvi koya.

¹⁹ Ni sa gunu oti na dauveiqaravi, sa kaya tale o Repeka, “Au na takiva talega mai na medra wai na nomu kameli, ka me ra gunu ena kena levu ga era vinakata.”

²⁰ A totolo wale ga na nona vakamacara na nona saqa wai ki na nodra vanua ni gunu na kameli, ka cici yani ki na i keliwai me taki tale mai, me yacova ni ra sa gunu oti kece na kameli.

²¹ A mai vakaraici Repeka galugalu tu ga yani o koya na dauveiqaravi, ka me kila rawa kina se na vakayacora na nona kerekere o Jiova, se sega.

²² Ni sa vagunuvi ira oti na kameli o Repeka, sa qai taura na dauveiqaravi i Epara-ama e dua na sau koula ka sau levu sara, a sa tokara e ucui Repeka, ka daramaka ki ligana e rua na qato koula.

²³ A sa tarogi koya, “Tukuna mada mai vei au, se o cei na tamamu? E bau tiko beka e dua na tikina ena vale nei tamamu me rawa ni keitou vakacegu kina ena bogi?”

²⁴ Sa qai kaya na goneyalewa, “Oi au na luve i Pecueli, na luvedrau o Neori kei Milika.”

²⁵ “E bini tu na co kei na kedra na manumanu, e tiko talega e dua na tikina mo dou na vakacegu kina.”

²⁶ A mai cuva sobu yani na dauveiqaravi ka vakarokorokotaki Jiova,

²⁷ ka kaya, “Me vakacaucautaki o Jiova, na Kalou ni noqu turaga o Epara-ama, o koya sa yalodina ki na nona vosa ni yalayala vei Epara-ama na noqu turaga. Sa liutaki au ga o Jiova ki na nona vale na wekana na noqu turaga.”

²⁸ A sa cici yani na goneyalewa ki na vale i tinana ka la'ki talanoataka na ka kecega.

²⁹ Sa qai cici yani o Lepani na ganei Repeka ki na i keliwai ena vanua sa wawa tiko kina na dauveiqaravi.

³⁰ E a raica rawa o Lepani na sau ni ucu kei na qato koula ena liga i ganena, ka rogoca talega mai vua na veika e kaya na dauveiqaravi. A sa lako yani kina vei ratou na tamata i Epara-ama, ni ratou a vakatawana tiko na kameli ena bati ni keliwai.

³¹ A sa kaya o Lepani, “Lako mai i vale. O iko na tamata sa vakalougatataka o Jiova. Na cava o mai tu kina e tautuba? Sa vakarautaki tu na nomudou tikina e noqu vale, ka tiko talega na nodra tikina na kameli.”

³² Era sa curu ki vale o iratou na tamata i Epara-ama, ka sa talaca na i usana ni kameli o Lepani, ka vakani ira ena co kei na kakana ni manumanu. A sa kauta talega mai na wai me vui kina na yavana na dauveiqaravi i Epara-ama kei na yavadratou na nona tamata.

³³ Ia ni sa kau mai na kakana, a qai kaya na dauveiqaravi, “Au na sega mada ni kana me yacova ni'u sa kaya oti na noqu i tukutuku.” A sa kaya o Lepani, “Mo kaya ga mai na ka o via vakaraitaka tiko.”

³⁴ A sa kaya o koya, “Oi au na dauveiqaravi i Epara-ama.

³⁵ O Jiova e sa vakalougatataka vakalevu na noqu turaga o Epara-ama, ka sa yaco me vutuniyau sara. Sa solia vua na qele ni sipi, na me, na bulumakau, na siliva, na koula, na tamata bobula, na kameli kei na asa.

³⁶ O Sera talega, na watina noqu turaga, sa vakasucuma e dua na luvena tagane na noqu turaga ni sa qase sara; a sa solia vua na noqu turaga na ka kecega sa taukena me nona.

³⁷ A sa vakayacora na noqu turaga me'u cavuta na vosa bubului ni'u na vakayacora na nona i vakaro. A sa kaya vei au, ‘Mo kakua sara ni digitaka e dua me watina na luvequ mai vei ira na nodra goneyalewa na kai Kenani, na vanua au sa tiko kina.

³⁸ Ia mo lako ga kivei ira na lewenivanua i tamaqu, vei ira na wekaqu, ka digitaka mai vei ira e dua na yalewa me watina na luvequ.’

³⁹ Au sa qai kaya vua na noqu turaga, ‘Vakacava kevaka e sega ni via lako vata mai kei au na yalewa?’

⁴⁰ Sa qai sauma na noqu turaga ka kaya, ‘O Jiova ga, o koya au sa dau muria na lomana, ena tala na nona agilosi vata kei iko, ka na vukei iko mo rawata na ka o sa talai kina. O na kauta mai e dua na wati luvequ mai vei ira na wekaqu, ena vale nei tamaqu.

⁴¹ Ia sa duabulu ga na sala o na rawa ni galala kina mai na nomu vosa ni yalayala; o ya ni kevaka o sa lako vei ira na wekaqu ka ra mani sega ni ciqomi iko, o sa na qai vagalalataki.’

⁴² “Ni'u yaco mai ki na i keliwai edaidai, au a qai masu ka kaya, ‘Oi kemuni Jiova, na Kalou ni noqu turaga o Epara-ama, ni yalovinaka mo ni vukei au me'u rawata na ka au sa talai mai kina.

⁴³ Au sa qai tucake tu ena bati ni keliwai. Kevaka ena lako mai e dua na goneyalewa me taki wai, au na kaya vua, ‘Yalo vinaka, au kerea me'u bau gunu vakalailai mai na nomu saqa wai.’

⁴⁴ Ia kevaka e mani kaya o koya, ‘Mo gunu, au na taki talega mai me ra gunu na nomu kameli. Sai koya sara ga o ya na yalewa sa digitaka o Jiova me watina na luvena na noqu turaga.’

⁴⁵ Ni bera ni oti na noqu masu lo, sa basika sara mai o Repeka, ka toka na nona saqa e vatuvatu ni tabana, a sa siro sobu sara ki na i keliwai me taki.

⁴⁶ Sa biuta sobu ki ra na nona saqa mai na tabana ka kaya, ‘Mo gunu, au na vagunuvi ira talega na kameli.’

⁴⁷ Au sa qai tarogi koya, ‘O cei na tamamu?’ A sauma o koya ka kaya, ‘Oi au na luve i Pecueli na luve i Neori kei Milika,’ Au a mai tokara sara yani e dua na sau e ucuna kei na qato ena ligana.

⁴⁸ Au a mai cuva yani vei Jiova ka vakacaucautaki koya, na Kalou ni noqu turaga o Epara-ama, o koya a tuberi au vakadodonu sara ki na vale i tacina na noqu turaga, me'u raica kina na luvena yalewa me la'ki watina na luvena na noqu turaga.

⁴⁹ Ia kevaka o dou nanuma mo dou vakayacora me vaka na kena i valavala vua na noqu turaga, mo dou yalovinaka ka tukuna vei au; ia kevaka e sega, dou tukuna talega, me'u na qai lewa na ka au cakava.”

⁵⁰ E rau sa qai kaya o Lepani kei Pecueli, “Me vaka ni sa vu mai vei Jiova na ka oqo, sa sega kina ni rawa vei keirau me vakatulewataka ena dua.

⁵¹ Raica, sa tu oqo Repeka, mo tauri koya ka kauta, ka me la'ki watina na luvena na nomu turaga me vaka sa kaya o Jiova.”

⁵² Ia ni rogoca na dauveiqaravi i Epara-ama na nodrau vosa, sa cuva sobu ki na qele ka vakavinavinaka vei Jiova.

⁵³ A sa qai taura mai na siliva, na koula talei, kei na i sulu ka solia vei Repeka. Sa solia talega eso na i loloma sau levu vua na ganena kei na tinana.

⁵⁴ A qai mai kana yani na dauveiqaravi kei iratou na nona tamata ka moce e kea ena bogi o ya. Ia ni ratou sa yadra cake ena mataka, sa kaya sara na dauveiqaravi, “Dou laivi au me'u lesu tale vua na noqu turaga.”

⁵⁵ E rau sa qai kaya o ganena kei tina i Repeka, “Me bau tiko siga vica tale mada na goneyalewa kei keitou, se siga tini wale ga, ka me qai lako.”

⁵⁶ Ia sa kaya na dauveiqaravi, “Dou kakua ni tarovi au. Sa solia vei au o Jiova na ka au sa lakova mai; dou laivi au me'u lesu yani vua na noqu turaga.”

⁵⁷ E ratou sa qai kaya, “Me keitou kaciva mada mai na goneyalewa ka rogoca se cava ena kaya.”

⁵⁸ Ia e ratou sa qai kacivi Repeka ka tarogi koya, “O sa vinakata li mo lako vata kei na tamata oqo?” A sa kaya o Repeka, “Au na lako.”

⁵⁹ E ratou a qai laiva na ganedratou o Repeka kei na nona nasi me lako vata kei na dauveiqaravi i Epara-ama kei iratou na nona tamata.

⁶⁰ E ratou sa qai vosa vakalougatataki Repeka ka kaya vua. “Mo yaco o iko, na ganei keitou, mo tinadra na udolu vakaudolu! Ka me ra vakadruka na veikoro ni meca o ira na nomu kawa!”

⁶¹ A sa vakasosolo o Repeka kei ira na nona dauveiqaravi goneyalewa, ka vodo yani ena kameli, ka lako vata yani kei na dauveiqaravi i Epara-ama.

⁶² Ia oqo, a sa lako mai o Aisake mai Leai Roi, ka ni a sa tiko voli ena ceva i Kenani.

⁶³ Ena dua na yakavi, ni sa lako voli yani o Aisake ena buca, a sa raica ira na kameli ni ra sa lako tiko mai.

⁶⁴ Ia ni sa raici Aisake o Repeka, sa siro sobu mai na nona kameli

⁶⁵ ka la'ki tarogi koya na dauveiqaravi i Epara-ama, “O cei na tamata o ya sa lako tiko mai oqo ena buca me mai tavaki kedatou?” A sa kaya na dauveiqaravi, “Oqori na noqu turaga.” A mani taura yani na nona i ubi o Repeka ka ubia kina na matana.

⁶⁶ A sa kaya na dauveiqaravi vei Aisake na ka kece sara sa vakayacora.

⁶⁷ Sa qai kauti Repeka yani o Aisake ki na valelaca i Sera na tinana, ka sa tauri koya me watina. A sa lomani koya o Aisake, ka sa solia vua na yalo vakacegu ni oti na mate i tinana.