Vakatekivu 22 - Vakavakadewa Vou kei na iVola tale eso

Vakaroti o Epara-ama me Vakacabori Aisake

¹ Ena dua na gauna ki muri, sa qai vakatovolei Epara-ama na Kalou. A sa kacivi koya, “I Epara-ama!” A sauma o Epara-ama ka kaya, “Oi au saka oqo, noqu Turaga.”

² Sa qai kaya na Kalou, “Mo kauta na luvemu, ka lako ki na vanua o Moraia. Mo vakacabori koya e kea me i soro kama vei au ena ulunivanua au na vakatakila vei iko.”

³ Ena mataka ka tarava, a yadra sara vakamataka o Epara-ama ni sa vakarautaka na i dabedabe ni asa, ka kauti Aisake yani kei na rua na nona dauveiqaravi. A taya eso na buka ni vakacaboisoro ka lako sara yani ki na vanua sa kaya vua na Kalou.

⁴ Ena i katolu ni siga ni rai yani o Epara-ama sa raica na vanua o ya ni tu vakayawa sara yani.

⁵ Sa qai kaya vei rau na nona dauveiqaravi, “Drau tiko ga eke vata kei na asa, keirau na lako yani kei na gone ki na yasana o ya, me la'ki qarava na Kalou, ka qai lesu tale mai vei kemudrau.”

⁶ A sa vakacolata vei Aisake na buka ni soro kama o Epara-ama, ka taura e ligana na matanibuka kei na i sele. E rau sa mai lako sara yani.

⁷ Sa qai kaya o Aisake, “Tamaqu!” A sauma yani o Epara-ama, “Io, na luvequ?” Sa kaya o Aisake, “Na bukawaqa kei na buka sa tu oqo, ia sa e vei ga na lami me i soro?”

⁸ A sauma o Epara-ama ka kaya, “Na Kalou vakataki koya ena vakarautaka e dua.” E rau sa mani lako sara yani.

⁹ Ia ni rau yaco ki na vanua sa kaya vei Jiova, sa cakava sara e dua na i cabocabonisoro o Epara-ama ka tuva na buka e delana. Sa qai vesuki Aisake na luvena ka vakadavora ena i cabocabonisoro ena dela ni buka.

¹⁰ Sa qai taura na i sele ka dodoka na ligana me vakamatea na luvena.

¹¹ Sa qai kacivi koya mai e dua na agilosi i Jiova mai lomalagi, ka kaya, “I Epara-ama, I Epara-ama!” A sauma yani o koya ka kaya, “Oi au saka oqo, noqu Turaga.”

¹² Sa qai kaya mai na agilosi, “Mo kakua ni vakamatea na gone. Au sa qai kila ni o sa rerevaka na Kalou, ni o sa sega ni bureitaka vei au na luvemu e duabau ga.”

¹³ A rai yani o Epara-ama, ka raica e dua na sipi tagane ni sa tacori tu na kena i leu ena veikau lalai. A lako yani ka kauta mai, ka vakacabora me i soro kama me i sosomi kei na luvena tagane.

¹⁴ A sa vakatoka na vanua o ya o Epara-ama me yacana o Jiova Jaire. Era sa dau kaya ga kina na tamata me yacova mai na siga edaidai, “Ena ulunivanua i Jiova, sa na veivakarautaki o koya.”

¹⁵ A sa kaci mai vakarua na agilosi i Jiova mai lomalagi vei Epara-ama, ka kaya,

¹⁶ “Au sa bubului ki na yacaqu ni'u na vakalougatataki iko vakalevu sara ena nomu vakayacora na ka oqo, ka sa sega ni o bureitaka vei au na luvemu e duabau ga;

¹⁷ au na vakalewevuqataka na nomu kawa me vaka na kalokalo ni lomalagi kei na mata ni nuku ni matasawa. Na nomu kawa era na tawana na nodra koro na kedra meca.

¹⁸ Era na kalougata talega na veimataqali kece e vuravura ena vukudra, ena vuku ni nomu talairawarawa ki na noqu vosa.”

¹⁹ A sa suka yani o Epara-ama vei rau na nona dauveiqaravi, ka ratou lesu yani ki Perisepa; ka la'ki tiko kina.

Na Kawa i Neori

²⁰ Ena dua na gauna mai ki muri, a rogoca o Epara-ama ni a vakasucuma o Milika na wati Neori na tacina eso na luvena.

²¹ Sa ulumatua o Usa, na tacina o Pusa kei Kemueli na tama i Erami,

²² kei Kiseti, Eso, Pilitasa, Jetilafi kei Pecueli.

²³ O Pecueli oqo na tama i Repeka. Sai iratou o ya na lewe walu na luve i Milika vei Neori

²⁴ o Reuma; e ratou luvena o Tipa, Keama, Teasi kei Meka.