Vakatekivu 21 - Vakavakadewa Vou kei na iVola tale eso

Na Sucu i Aisake

¹ A sa vakalougatataki Sera o Jiova, me vaka na nona yalayala,

² a mani yaco me bukete o Sera, ka vakasucuma vei Epara-ama e dua na luvena tagane ni sa qase sara. E a sucu ena gauna sa nakita na Kalou me sucu kina.

³ A sa vakatoka o Epara-ama me yacana o Aisake.

⁴ Ena gauna sa bogi walu kina o Aisake, sa qai cilivi koya o Epara-ama me vaka sa vakaroti koya kina na Kalou.

⁵ A sa yabaki 100 o Epara-ama ena gauna e sucu kina o Aisake.

⁶ A sa qai kaya vakaoqo o Sera, “Sa kauta mai na Kalou vei au na reki, ka sa vakavuna na noqu dredre. O ira kece sa rogoca era na dredre vata kei au.”

⁷ Sa kaya tale, “O cei e bau kaya vei Epara-ama ni na susu gone o Sera? Ia au sa qai vakasucuma na luvena tagane ni sa qase sara o koya.”

⁸ A tubu cake o Aisake, ia ena gauna sa kali kina, sa qai vakarautaka o Epara-ama e dua na magiti levu.

Rau Vakatalai o Eka kei Isimeli

⁹ O Isimeli, o koya na luve i Epara-ama sa sucu mai vei Eka na yalewa bobula ni Ijipita, a sa qito voli kei na luve i Sera o Aisake ena dua na siga.

¹⁰ A sa raica oqo o Sera ka mani kaya vei Epara-ama, “Vakatala tani na yalewa bobula o ya vata kei na luvena tagane. E rau na sega sara ni taukena vata kei Aisake na nomu i yau.”

¹¹ Sa rarawa sara vakalevu na loma i Epara-ama ena ka oqo, ka ni luvena talega o Isimeli.

¹² Ia sa mani kaya na Kalou vei Epara-ama, “Mo kakua soti ni rarawa ena vuku ni gonetagane kei na nomu yalewa bobula. Mo vakayacora na ka sa kaya o Sera, baleta ni ra na tubu mai vei Aisake na nomu kawa au sa yalataka.

¹³ Me baleta na luvena tagane na yalewa bobula, au na vakayacori koya talega me dua na matanitu, baleta ni sa luvemu talega o koya.”

¹⁴ Ena kida ni mataka lailai ka tarava, a sa solia o Epara-ama vei Eka eso na kakana kei na bola kuli-ni-manumanu sa sinai ena wai. A sa vakotora na gone lailai ki dakuna ka laivi koya me lako yani. A sa gole yani o Eka ka lako sese voli ena vanua lala mai Perisepa.

¹⁵ Ni sa maca na wai ena kena bola, a sa la'ki vakotora na gone lailai ena dua na ruku ni vunikau

¹⁶ ka la'ki dabe tiko ena dua na vanua ka rauta ni 100 na mita na kena yawa. Sa qai kaya ki lomana, “Sa sega ni rawa vei au me'u raica na mate i luvequ.” Ia ni sa dabe toka, a sa qai vakatekivu me tagi cake mai o koya.

¹⁷ A sa rogoca na Kalou na tagi ni gone; sa qai tarogi koya e dua na agilosi ni Kalou mai lomalagi, ka kaya, “A cava o leqa kina Eka? Kakua ni rere; sa rogoca na Kalou na tagi ni gone mai na vanua e tiko kina.

¹⁸ Tucake, ka keveti koya mai, ka vakayalovinakataki koya. Au na cakava me dua na matanitu levu na nona kawa mai muri.”

¹⁹ Sa qai dolava na matana na Kalou, ka raica e dua na i keliwai sa sinai tu ena wai. A sa lako yani ka vakatawana na bola kuli-ni-manumanu ena wai ka vagunuva na gone.

²⁰ A tiko kei na gone na Kalou ena gauna a tubu cake tiko kina, sa tiko ena vanua lala mai Perana, a qai yaco me daunivavana ni dakaititi.

²¹ Ia sa qai la'ki kauta mai e dua na watina o tinana mai Ijipita.

Na Veiyalayalati i Epara-ama kei Apimeleki

²² Ena gauna o ya, erau sa lako o Apimeleki vata kei Fikoli, na komada ni nona mataivalu, ka mai kaya vei Epara-ama, “Sa tiko kei iko na Kalou ena ka kecega o sa cakava.

²³ Mo bubului mada eke vei au ena mata ni Kalou ni o na sega ni vakaisini au, se o ira na luvequ, se o ira na noqu kawa. Au a yalodina vei iko, ia mo yalataka talega ni o na yalodina vei au kei na vanua oqo o sa tiko kina.”

²⁴ Sa qai kaya o Epara-ama, “Au sa bubului.”

²⁵ Sa qai tarogi Apimeleki o Epara-ama ena vuku ni dua na i keliwai era sa kovea na tamata nei Apimeleki.

²⁶ A sa kaya o Apimeleki “Au sega sara ni kila, se o cei sa cakava na ka oqori: o sega mada ga ni bau kaya vei au, ka'u sega talega ni rogoca me yacova na siga edaidai.”

²⁷ A sa solia o Epara-ama vei Apimeleki eso na sipi kei na so na bulumakau, ka rau mai veiyalayalati yani na lewe rua oqo.

²⁸ Sa qai kauta mai o Epara-ama e vitu na luve ni sipi mai na nona qele ni sipi.

²⁹ A sa tarogi koya o Apimeleki se cava e cakava kina na ka o ya.

³⁰ A sauma o Epara-ama ka kaya, “Mo taura na vitu na luve ni sipi oqo mo vakadinadinataka kina ni'u sa kelia na i keliwai oqo.”

³¹ A sa vakatokai me yaca ni vanua o ya o Perisepa, baleta ni rau a bubului ruarua mai kea.

³² Ia ni rau veiyalayalati oti mai Perisepa, o Epara-ama erau lesu tale yani o Apimeleki kei Fikoli ki na nodra vanua na kai Filisitia.

³³ Sa qai tea o Epara-ama e dua na kau mai Perisepa ka masuta kina na yaca i Jiova na Kalou sa tawa mudu.

³⁴ A sa tiko vakavulagi ga mai Filisitia o Epara-ama ka vuqa na yabaki.