Vakatekivu 2 - Vakavakadewa Vou kei na iVola tale eso

¹ A sa buli oti na lomalagi kei na vuravura kei na ka kecega sa tu kina.

² Ena i kavitu ni siga, a sa oti kina na veibuli, ka sa vakacegu na Kalou mai na nona cakacaka.

³ A vosa vakalougatataka na i kavitu ni siga na Kalou, ka vakatabuya, ka ni a vakacegu kina mai na nona cakacaka ni sa oti na nona veibuli.

⁴ O ya na i tukutuku ni kena a buli na vuravura kei na ka kecega era tu ena maliwa lala. Ena gauna e a bulia kina na vuravura kei na veika kecega sa tu ena maliwa lala na Kalou o Jiova,

Na i Teitei o Iteni

⁵ e sa sega sara ni dua na kau a tubu tu ena dela i vuravura, a sega talega ni dua na sore ni kau me bula tu kina, ka ni a sega ni vakatauca na uca ena dela i vuravura na Kalou o Jiova; a sa sega na tamata me teivaka na vanua.

⁶ A sa tubu cake na wai mai na qele ka vakasuasuataka na dela i vuravura.

⁷ A sa qai taura eso na soso mai na qele na Kalou o Jiova ka bulia kina na tamata; a sa ceguva ki ucuna na i cegu ni bula; a sa yaco kina me tamata bula.

⁸ A sa qai tea na Kalou o Jiova e dua na i teitei mai Iteni, ena tokalau; a sa la'ki vakatikora kina na tamata e a bulia.

⁹ A sa vakatubura mai na qele na Kalou o Jiova na kau rairai vinaka kecega ka rawa ni laukana. Ena lomadonu ni i teitei sa tu kina na kau ni bula, kei na kau sa kilai kina na ka vinaka kei na ka ca.

¹⁰ A sa drodro mai Iteni e dua na uciwai ka basoga-i-va me vakasuasuataka na i teitei.

¹¹ Na yaca ni kena i matai o Pisoni; a drodro wavolita na vanua o Avila.

¹² (Sa kunei e kea na koula vinaka sara, na drega boi vinaka kei na vatu talei na onikisa.)

¹³ Na kena i karua na yacana o Qihoni; sa drodro wavolita na vanua o Kusa.

¹⁴ Na yaca ni kena i katolu o Taikirisi; sa drodro wavolita na tokalau kei Asiria. Ia na yaca ni kena i kava o Uferetisi.

¹⁵ Sa qai kauta na tamata na Kalou o Jiova ka vakatikora ena teitei o Iteni me vakacokotaka ka vakatawana.

¹⁶ A sa vakarota na tamata ka kaya, “Sa rawa mo kania na veimataqali vuanikau kecega sa tu ena i teitei,

¹⁷ ia na kau sa kilai kina na ka vinaka kei na ka ca, mo kakua sara ni kania na vuana. Ia ena gauna o na kania kina, o na mate vakaidina.”

¹⁸ A sa kaya na Kalou o Jiova, “E sega ni vinaka me tiko duadua voli ga na tamata. Au na bulia e dua na nona i tokani me dau vukei koya.”

¹⁹ A sa taura na soso mai na qele na Kalou o Jiova ka bulia kina na veimataqali manumanu kecega ni vanua, kei na veimataqali manumanu vuka kecega, a sa kauti ira vua na tamata me vakayacani ira. Ia na yaca e vakatokai ira yadua kina ena yaco me yacadra.

²⁰ A sa vakayacana o Atama na manumanu manoa kecega, na manumanu kila kei na manumanu vuka. Ia sa sega ni dua vei ira oqo me nona i tokani vinaka ka me dau vukei koya.

²¹ A sa vakavuna e dua na via moce levu na Kalou o Jiova, ka sa moce lutu kina o Atama. A sa qai ucuna mai e dua na sui mai na sarisarina ka sema tale na lewe ena yasana o ya.

²² A sa bulia na Kalou o Jiova e dua na yalewa mai na sui e a ucuna mai vua na tagane, ka sa kauti koya yani na yalewa ki vua.

²³ A sa kaya o Atama, “Sai koya oqo na tiki ni yagoqu dina, na sui mai na suiqu ka lewe mai na lewequ; Ena vakatokai me ‘Yalewa’ baleta ni sa kau mai vua na tagane.”

²⁴ Oqo na vuna ena biuta kina na tamana kei na tinana na tagane ka kabita na watina, erau na yaco me lewe dua ga.

²⁵ Erau sa luvawale ruarua na tagane kei na yalewa, ia erau sa sega ga ni maduataka.