Vakatekivu 16 - Vakavakadewa Vou kei na iVola tale eso

O Eka kei Isimeli

¹ A sega sara ni vakasucuma o Serai vei Eparama e dua na luvena. Ia e dua tiko na yalewa bobula ni Ijipita, na dauveiqaravi i Serai, na yacana o Eka.

² A qai kaya o Serai vei Eparama, “Raica, sa tarova o Jiova me'u kakua ni vakaluveni; mo drau la'ki tiko vata kei na noqu dauveiqaravi, de na qai rawa e dua na luvequ mai vua.” A sa mani vakadonuya o Eparama na ka e a tukuna o Serai.

³ Ni oti e tini na yabaki na tiko i Eparama mai Kenani, a qai soli Eka na nona dauveiqaravi ka yalewa ni Ijipita o Serai vei Eparama me dua na watina lailai.

⁴ E rau tiko vata o Eparama kei Eka, ka mani bukete o Eka. Ia ni sa kila o Eka ni sa bukete, a qai yaco me beci Serai na nona marama.

⁵ A sa kaya vei Eparama o Serai, “Sa baleti iko na nona beci au o Eka. Oi au ga ka solia na noqu yalewa bobula oqo vei iko, ia ena gauna sa kila kina o koya ni sa bukete, sa qai beci au sara. Me qai lewa na Kalou se o cei e dodonu vei kedaru!”

⁶ A sa kaya o Eparama, “Raica, o Eka sa nomu bobula ka sa tu ga e ligamu na lewa me baleti koya; ia mo cakava ga na ka o vinakata vua.” A qai vakayacora vua o Serai na i tovo kaukauwa, ka mani dro tani kina o Eka.

⁷ A qai kunei koya e dua na agilosi i Jiova ena dua na mata ni wai ena vanua lala ena sala vaka ki Suri,

⁸ a kaya vua, “I Eka, na dauveiqaravi i Serai, o sa lako mai vei? O sa lako tiko ki vei?” A sauma o Eka ka kaya, “Au sa dro tani mai vua na noqu marama o Serai.”

⁹ A sa kaya vua na agilosi, “Mo lesu tale vua na nomu marama ka la'ki vakarorogo vua.”

¹⁰ A sa kaya tale na agilosi “Au na vakalewevuqataka na nomu kawa me na sega ni wiliki rawa. Raica o sa bukete tiko,

¹¹ o na vakasucuma e dua na gonetagane. Mo vakatoka me yacana o Isimeli, baleta ni sa rogoca o Jiova na nomu rarawa.

¹² Ia na luvemu ena vaka na asa kila; ena saqati ira na tamata kecega, ka ra na saqati koya na tamata kecega, ka tawasei koya tani mai vei ira na wekana.”

¹³ A sa kaya e lomana o Eka, “Au sa raica dina li na Kalou, o koya ka sa dau raici au tiko?” A sa vakatoka me yaca ni Kalou ka a vosa vua me o Jiova roi.

¹⁴ O ya na vuna era vakatoka kina na tamata na i keliwai ena kedrau veimama o Katesi kei Pereti, “Na i Keliwai nei Koya sa bula ka raici au.”

¹⁵ A vakasucuma o Eka vei Eparama e dua na luvena tagane, a vakatoka me yacana o Isimeli.

¹⁶ A sa 86 na yabaki i Eparama ni a vakasucumi Isimeli o Eka.