Vakatekivu 14 - Vakavakadewa Vou kei na iVola tale eso

Sa Vakabulai Loti o Eparama

¹ E ratou lewe va na tui, o Amirafeli mai Papilonia, o Arioki mai Elasari, o Kitoleoma mai Ilama, kei Titali mai Koimi,

² e ratou sa lako yani me ratou vala kei na lima na tui: o Bera mai Sotoma, o Birisa mai Komora, o Sanipa mai Atima, o Semeperi mai Sepoimi, kei na tui Bela (o ya o Soa).

³ E ratou a cokovata na tui e lima oqo me ratou dua na mataivalu tovata ena buca mai Sitimi, ka vakatokai ena gauna oqo me Waitui Mate.

⁴ E ratou a vakarorogo tu na tui oqo vei Kitoleoma ena loma ni tinikarua na yabaki, ia ena i katinikatolu ni yabaki e ratou a bese ni vakarorogo vua.

⁵ Ia ena i katinikava ni yabaki a lako mai o Kitoleoma kei iratou na tui e ratou tovata kei na nodratou mataivalu ka vakadrukai ira na Refaimi, e Aseteroci Karineimi, kei ira na Susi mai Ame, kei ira na Emimi ena buca mai Kiriaceimi,

⁶ kei ira na Oraiti ena veiulunivanua mai Sira me yaco sara ki Eliperani, ena i yalayala ni vanua lala.

⁷ Era a qai lesu mai ka lako tale mai ki Katesi (kilai taumada me o Enimisipata). Era a ravuta na nodra vanua kece na Amalekaiti kei ira na Amoraiti era tiko e Asesoni Tamari.

⁸ Era sa vakarautaka na nodra mataivalu tovata ena buca mai Simiti o tui Komora, kei tui Sotoma, kei tui Atima, kei tui Sepoimi, kei tui Bela (o ya, o Soa), ka valuti

⁹ iratou na tui ena vanua o Ilama, kei Koimi, kei Papilonia, kei Elasari; e lewe va na tui me ratou sota kei na lewe lima.

¹⁰ E levu sara na i keli qele dregadregata ena Buca o Sitimi. E rau a mani dro na tui Sotoma kei na tui Komora ka rau qai lutu ena i keli. Ia na kena vo era a dro yani ki na veiulunivanua.

¹¹ E ratou a kauta na tui e va na veika kecega mai Sotoma kei Komora, e wili kina na kakana; ka lako yani.

¹² E ratou a kauti Loti talega na luve i taci Eparama, ka ni a tiko volekati Sotoma.

¹³ Ia, e a mani dro bula e dua na tamata ka la'ki tukutuku vei Eparama na Iperiu, ka sa tiko volekata na veikau tabu nei Mamire na Amoraiti. O Mamire na taci Esikoli kei Eneri e ratou sa tovata kei Eparama.

¹⁴ Ni sa rogoca o Eparama ni sa kau vakavesu na wekana, a kacivi ira vata na tamata yalodina ena nona i tikotiko, na kedra levu taucoko e 318, ka ra vakacemuri iratou na tui e va me yaco sara i Tani.

¹⁵ A sa qai wasewasei ira na nona tamata, ka kabai ira ena bogi, ka mani vakadrukai ira. Era a vakasavi ira me yaco sara ki Opa, o ya ena vualiku kei Tamasiko.

¹⁶ A qai kauta lesu o Eparama na i toki ni valu kece sara era a kauta, kei Loti na wekana, kei na nona i yau kecega, vata kei ira na yalewa kei na tagane.

Sa Vakalougatataki Eparama o Melekiseteki

¹⁷ Ni suka mai o Eparama ena nona vakadrukai Kitoleoma kei iratou na tui e ratou tovata kaya, a lako yani na tui Sotoma me tavaki koya ena buca mai Seve, o ya na buca ni tui.

¹⁸ Ia o Melekiseteki na tui Salemi, na bete ni Kalou Cecere Sara, a sa kauta mai na madrai kei na waini vei Eparama,

¹⁹ a vakalougatataki koya ka kaya, “Me vakalougatataki Eparama na Kalou Cecere Sara, o koya sa bulia na lomalagi kei na vuravura.

²⁰ Me vakacaucautaki na Kalou Cecere Sara, o koya ka sa soli ira na nomu meca ki na ligamu!” A sa solia vei Melekiseteki o Eparama e dua na i katini ni toki ni valu sa vakalesui tale mai.

²¹ A sa kaya vei Eparama na tui Sotoma, “Mo taura me nomu na ka kecega, ia mo soli ira lesu ga mai na noqu tamata.”

²² A sauma o Eparama ka kaya, “Au sa yalataka ena mata i Jiova, na Kalou Cecere Sara, o koya sa bulia na lomalagi kei na vuravura,

²³ ni'u na sega ni taura e dua na ka e nomu, au na sega ni taura wale mada ga e dua na wa ni culacula, se dua na wa ni vava. De o ni na qai kaya kina vakaoqo, ‘Au a vakavutuniyautaki Eparama.’

²⁴ Au na sega ni taura e dua na ka me noqu. Au na qai ciqoma ga na veika era sa vakayagataka na tamata. Ia laivi iratou na i tokani o Eneri, Esikoli kei Mamire me ratou taura na nodratou i votavota.”