Vakatekivu 13 - Vakavakadewa Vou kei na iVola tale eso

Rau Veitawasei o Eparama kei Loti

¹ A sa lako cake mai Ijipita o Eparama ka lako vaka ki na vualiku kei na watina, kei na nona i yau kecega. A sa lako vata kei koya o Loti.

² Sa vutuniyau sara o Eparama ena sipi, kei na me, kei na bulumakau, ka vakakina na siliva kei na koula.

³ A sa qai biuta na vanua o ya ka lako mai na dua na vanua ki na dua tale me la'ki yaco sara yani ki Peceli, na vanua sa tiko kina e liu na nona valelaca, ena kedrau veimama o Peceli kei Ai,

⁴ ena vanua ka a tara kina na i cabocabonisoro. A sa sokalou mai kea vei Jiova o Eparama.

⁵ Ia o Loti talega sa levu na nona sipi, na me, na bulumakau, ka vakakina na nona vuvale kei na nona dauveiqaravi.

⁶ A sa sega ni qai rauti rau na vanua me rau tiko ruarua kina, baleta ni sa rui levu na nodrau manumanu.

⁷ Ena ka oqo era sa dauveivala kina na i vakatawa ni manumanu nei Eparama kei na i vakatawa ni manumanu nei Loti. (Ena gauna o ya era a se tiko ga kina na kai Kenani kei na kai Perisaiti ena vanua o ya.)

⁸ A sa qai kaya vei Loti o Eparama, “Me kakua ni dua na veivala me tubu vei kedaru, se vei ira na nodaru tamata ka ni daru sa veiwekani ga.

⁹ Digitaka me nomu na vanua o vinakata, ka me daru sa na tawase; kevaka o lako ki na i mawi au na lako ki na i matau, ia kevaka o lako ki na i matau au na lako ki na i mawi.”

¹⁰ A sa veiraiyaki o Loti ka raica ni vanua suasua vinaka taucoko sa volita na Buca na Joritani me yaco sara ki Soa, ka sa vaka na i Teitei i Jiova se na vanua o Ijipita. (Oqo ena gauna a se bera ni vakarusai Sotoma kei Komora kina o Jiova.)

¹¹ A digitaka o Loti na vanua kece sa volita na Buca o Joritani ena yasana vaka ki na tokalau. Sa vaka o ya na nodrau veitawasei.

¹² A tiko ga o Eparama ena vanua o Kenani, ia o Loti sa la'ki tiko ena veimama ni veikoro ena buca volekati Sotoma.

¹³ O ira na kai Sotoma era tamata i vakarau ca ka i valavala ca ena mata i Jiova.

Sa Lako ki Epironi o Eparama

¹⁴ Ni biuti Eparama oti o Loti, a qai vosa o Jiova vei Eparama ka kaya, “Mo tacake ka veiraiyaki ki na veiyasana kecega ena vanua o tu kina.

¹⁵ Au na solia na vanua kecega o sa raica kivei iko kei ira na nomu kawa, ka me nomu vakadua.

¹⁶ Au na vakalewevuqataka na nomu kawa me vaka na kuvu ni soso. Kevaka e wiliki rawa na kuvu ni soso, ena qai wiliki rawa talega na nomu kawa.

¹⁷ Mo cavutu ka lakova na loma ni vanua taucoko, ka ni'u na solia taucoko vei iko.”

¹⁸ A sa cavuta na nona valelaca o Eparama ka la'ki vakaitikotiko volekata na veikau tabu mai Mamire e Epironi. A sa tara mai kea e dua na i cabocabonisoro vei Jiova.