Vakatekivu 12 - Vakavakadewa Vou kei na iVola tale eso

Sa Kacivi Eparama na Kalou

¹ A sa kaya vei Eparama o Jiova, “Biuta na nomu vanua, biuti ira na wekamu, kei na vale nei tamamu, ka lako ki na vanua au na vakatakila vei iko.

² Au na vakalewevuqataka na nomu kawa, ka na yaco me na matanitu levu. Au na vakalougatataki iko, ka vakarogoya na yacamu, o yaco kina mo vu ni veivakalougatataki.

³ Au na vakalougatataki ira era sa vakalougatataki iko, ka'u na cudruvi ira era sa cudruvi iko; Na veimatanitu kece sara e vuravura era na vakalougatataki ena vukumu.”

⁴ Ni sa yabaki 75 o Eparama, a sa biuti Karana me lako yani, me vaka na vosa i Jiova ki vua; a sa lako vata kei koya o Loti.

⁵ A sa kauti Serai na watina, kei Loti na luve i tacina, kei na nona i yau kecega, kei ira na nona tamata sa rawata mai Karana; e ratou sa qai lako yani ki na vanua o Kenani. Ia ni ratou sa yaco yani i Kenani,

⁶ a sa gole sobu o Eparama ka yaco ki na i cabocabonisoro ena koro o Sikemi, o ya na vunikau tabu mai More. (Era a se vakaitikotiko kina na kai Kenani ena vanua o ya ena gauna o ya.)

⁷ A sa rairai tale vei Eparama o Jiova, ka kaya vua, “Sai koya oqo na vanua ka'u na solia vua na nomu kawa.” A sa mani tara kina e kea o Eparama e dua na i cabocabonisoro vei Jiova, o koya sa rairai vua.

⁸ Ni oti o ya, a sa lako o Eparama ki na ceva ni vanua, o ya ki na veiulunivanua ena tokalau kei Peceli, ka birika na nona valelaca ena tadrua kei Peceli mai na mua-i-ra vata kei Ai mai na tokalau. A sa tara talega e kea e dua na i cabocabonisoro, ka sokalou vei Jiova.

⁹ A sa tosoya na nona i lakolako o Eparama, ka gole yani vaka ki na ceva i Kenani.

O Eparama kei Serai e Ijipita

¹⁰ Ia sa yaco na dausiga e Kenani ka sa rui ca vakalevu sara; a sa vakavuna oqo me lako sobu o Eparama ki Ijipita, ka me la'ki tiko voli kina vakalailai.

¹¹ Ni sa voleka yani ki Ijipita, sa qai tukuna o Eparama vei Serai na watina, “Raica, au kila ni o sa rui yalewa rairai vinaka.

¹² Ni ra na raici iko na kai Ijipita, era na kaya ni o watiqu, ka ra na qai vakamatei au ka tauri iko.

¹³ Mo tukuna vei ira ni o ganequ, era na qai vakabulai au ka caka vinaka vei au ena vukumu.”

¹⁴ Ni sa yaco yani ki Ijipita o Eparama, era raica na kai Ijipita ni sa yalewa rairai vinaka dina o Serai.

¹⁵ Eso na i vakailesilesi ni boselawa era a raici Serai, ka ra la'ki tukuna vua na tui na nona matavinaka; ka sa kau yani kina o koya ki na valenitui.

¹⁶ Ena vuku i Serai, a sa caka vinaka sara na tui vei Eparama, ka sa solia vua eso na sipi, na me, na bulumakau, na asa, eso na nona tamata, kei na kameli.

¹⁷ Ia ena vuku ni nona mai kauti Serai na tui me watina, a sa vakavuna kina o Jiova eso na mate ca me tauvi koya kei ira na nona tamata ena valenitui.

¹⁸ Sa qai kacivi Eparama na tui ka tarogi koya, “A cava o sa cakava kina vei au na ka oqo? A cava o sega kina ni bau kaya ni watimu na yalewa oqo?

¹⁹ A cava o kaya kina ni sa ganemu, ka vakatara me'u kauti koya kina me watiqu? Sa tu oqo na watimu; kauti koya yani ka lako tani eke!”

²⁰ A sa vakaroti ira na nona tamata na tui, ka ra sa kauti Eparama ka vakatalai koya tani yani mai Ijipita, o koya kei na watina, kei na nona i yau kece sara.