Vakatekivu 11 - Vakavakadewa Vou kei na iVola tale eso

Na Vale Cere i Cake mai Pepeli

¹ Ena gauna taumada, a duabau ga na nodra vosa na tamata kecega e vuravura.

² Ni ra veitosoyaki voli na tamata ena Tokalau ni vanua, era yaco sara ki na dua na vanua bucabuca e Papilonia, ka vakaitikotiko kina.

³ Era a veivosaki ka kaya, “Me da buli biriki mada ka vavia ena buka.” Sa rawa na biriki me tara kina na vale kei na qele dregadregata me dregati ira vata.

⁴ Era a kaya, “Me da tara mada e dua na koro kei na dua na vale cere i cake, me yaco sara ki lomalagi na dokana. Me da cakava me rogo kina na yacada, ka me da kakua ni veiseyaki kina ena dela i vuravura.”

⁵ A lako sobu mai lomalagi o Jiova me raica na koro kei na vale cere i cake era a tara na tamata,

⁶ ka kaya, “Era sa dua ga na matatamata, ka dua ga na nodra vosa. Sai koya oqo na i tekivu ni ka era na cakava; e muri, sa na rawa me'ra cakava na ka ga era vinakata.

⁷ Me datou lako sobu ka vakasesea na nodra vosa me ra kakua ni veikilai vosa.”

⁸ A sa vakasavi ira mai kea o Jiova, ka ra sa veiseyaki ena dela i vuravura, a sa mudu talega e kea na tara ni koro.

⁹ A sa vakatokai na koro o ya me yacana o Pepeli, baleta ni a vakasesea kina na nodra vosa kecega na tamata o Jiova, ka vakasavi ira yani ki na veiyasa i vuravura.

Na Kawa i Semi

¹⁰ Sai ira oqo na kawa i Semi. Ni oti e rua na yabaki ena kena a luvuci o vuravura, ni sa yabaki 100 o Semi, a sa sucu na luvena tagane, o Afakisate na yacana.

¹¹ Ni sucu oti o Afakisate, a sa bula voli o Semi me 500 tale na yabaki, ka sucu tale eso na luvena.

¹² Ni sa yabaki 35 o Afakisate, a sa sucu na luvena tagane, o Sela na yacana.

¹³ Ni sucu oti o Sela, a sa bula voli o Afakisate me 403 tale na yabaki, ka sucu tale eso na luvena.

¹⁴ Ni sa yabaki 30 o Sela, a sa sucu na luvena tagane, o Iperi na yacana;

¹⁵ ka sa bula voli o Sela me 403 tale na yabaki, ka sucu tale eso na luvena.

¹⁶ Ni sa yabaki 34 o Iperi, a sa sucu na luvena tagane, o Peleki na yacana;

¹⁷ ka sa bula voli o Iperi me 430 tale na yabaki, ka sucu tale eso na luvena.

¹⁸ Ni sa yabaki 30 o Peleki, a sa sucu na luvena tagane, o Reu na yacana;

¹⁹ ka sa bula voli o Peleki me 209 tale na yabaki, ka sucu tale eso na luvena.

²⁰ Ni sa yabaki 32 o Reu, a sa sucu na luvena tagane, o Seruki na yacana;

²¹ ka sa bula voli o Reu me 207 tale na yabaki, ka sucu tale eso na luvena.

²² Ni sa yabaki 30 o Seruki, a sa sucu na luvena tagane, o Neori na yacana;

²³ ka sa bula voli o Seruki me 200 tale na yabaki, ka sucu tale eso na luvena.

²⁴ Ni sa yabaki 29 o Neori, a sa sucu na luvena tagane, o Tira na yacana;

²⁵ ka sa bula voli o Neori me 119 tale na yabaki, ka sucu tale eso na luvena.

²⁶ Ni sa yabaki 70 o Tira, sa qai sucu o iratou na luvena o Eparama, kei Neori, kei Erani.

Na Kawa i Tira

²⁷ Oqo o ira na kawa i Tira, o koya na tamadratou o Eparama, kei Neori, kei Erani. O Erani oqo na tama i Loti,

²⁸ ka sa mate o Erani ena nona koro o Uri mai Papilonia, ni se bula tiko o tamana.

²⁹ E rau sa vakawati o Eparama kei Neori; na yaca i wati Eparama o Serai, ka yaca i wati Neori o Milika, na luve i Erani, o koya na tama i Milika kei Isika.

³⁰ A sa sega ni vakaluveni rawa o Serai.

³¹ A sa kauti Eparama o Tira na tamana, kei na makubuna o Loti, o koya na luve i Erani, kei Sera na vugona, o koya na wati Eparama na luvena; ka biuta na koro levu o Uri mai Papilonia me ratou lako ki na vanua o Kenani. Ia e ratou a yaco ga e Karana ena nodratou i lakolako, ka mani tiko kina.

³² E a mate mai kea o Tira ni sa yacova na yabaki 205.