Vakatekivu 10 - Vakavakadewa Vou kei na iVola tale eso

Na Nodratou Kawa na Luve i Noa

¹ Sai ira oqo na nodratou kawa na luve i Noa: o Semi, kei Ame, kei Jefeca. Era a sucu na luvedratou ni sa oti na waluvu.

² Oqo o iratou na luve i Jefeca tagane: o Komera, Mekoki, Metai, Javana, Tupali, Meseki, kei Tairasa.

³ Sai iratou oqo na luve i Komera: o Asikenasa, o Refaca, vata kei Tokama.

⁴ Oqo o iratou na luve i Javana: o Ilaisa, o Tasisi, o Kitimi, vata kei Totenimi.

⁵ O ya na nodra i tubutubu na tamata era a vakaitikotiko ena baravi kei na veiyanuyanu. Sai ira oqo na kawa i Jefeca era sa dui vakaitikotiko ena nodra mataqali kei na vanua, ka sa vosataka na nodra duivosavosa ni nodra wasewase.

⁶ Sai iratou oqo na luve i Ame tagane: o Kusa, o Ijipita, o Libiya, kei Kenani - ka tubudra na kawa tamata era sa vakayacani vata kaya.

⁷ Ia na luve i Kusa o Sepa, o Avila, o Sapita, o Reama kei Sapiteka; ia na luve i Reama o Sepa kei Titana.

⁸ A dua ga na luve i Kusa tagane, na yacana o Nimiroti, a sa yaco me i sevu ni tamata qaqa e vuravura.

⁹ Ena veivuke ni Kalou, a sa yaco kina o koya me tamata dauvakasasa rogo levu; ka ra dau tukuna kina na tamata, “Me vakataki Nimiroti, na dauvakasasa rogo levu ena mata ni Kalou.”

¹⁰ Na i tekivu ni nona matanitu e okati kina o Papiloni, kei Ireki, kei Akata, ka ratou tiko kece na veivanua oqo e Papilonia.

¹¹ A qai lako yani ki na vanua o Asiria ka la'ki tara kina na veikoro lelevu o Ninive, kei Riopaca, kei Kala,

¹² kei na koro levu o Risini, ka koto ena kedrau veimama o Ninive kei Kala.

¹³ O ira na kawa i Ijipita sai ira na kai Lidia, kei Anami, kei Leapi, kei Nefitu,

¹⁴ kei Pacirusi, kei Kasilu (sa tubu mai kina na kai Filisitia), kei ira mai Kiriti.

¹⁵ Oqo o ira na kawa i Kenani; na nona ulumatua tagane o Saitoni ka tarava o Eri.

¹⁶ O Kenani e tamadra talega na Jepusaiti, na Amoraiti, na Kakesaiti,

¹⁷ na Aivaiti, na Akaiti, na Sainaite,

¹⁸ na Avataiti, na Semaraiti, kei ira na Amataiti. E muri era sa qai talabusese na kawa i Kenani.

¹⁹ Ia na nodra i yalayala ni vanua na kai Kenani sa vakatekivu mai Saitoni me yaco sara i Qasa, o ya mai na muana e gole vaka i Kira; ka yaco sara i Lesa, o ya mai na muana e gole vaka i Sotoma, kei Komora, kei Atima, kei Sepoimi.

²⁰ Sai ira oqori na kawa i Ame, ka ra sa tiko ena nodra dui yavusa ena nodra vanua, ka ra sa dui vosataka na nodra dui vosa.

²¹ O Semi na tuakai Jefeca, sa nodra qase kecega na kawa tamata na Iperiu.

²² O ira na luve i Semi, oqo o Ilama, kei Asura, kei Afakisate, kei Luti, kei Erami, era sa nodra qase na tamata kece era okati ena dui yacadratou.

²³ O ira na kawa i Erami: o Usu, kei Uli, kei Keceri, kei Masi.

²⁴ A luve i Afakisate o Sela, a qai luve i Sela o Iperi.

²⁵ A sa rua na luve i Iperi; e dua na yacana o Peleki, baleta ni ra a tawase tu na tamata e vuravura ka donuya na gauna o ya; kei na yaca i tacina o Jokitani.

²⁶ Sai ira oqo na luve i Jokitani; o Alimotati, o Selefi, o Esamaveci, o Jera,

²⁷ o Atorami, o Usali, o Tikila,

²⁸ o Opali, o Apimeeli, o Sepa,

²⁹ o Oferi, o Avila, kei Jopapa. Oqo o ira kece sara na luve i Jokitani.

³⁰ Na i yalayala ni vanua era tiko kina sa vakatekivu mai Mesa, ka muria na sala e gole vaka i Sefari, me yaco sara ki na veiulunivanua ki na tokalau.

³¹ Sai ira o ya na kawa i Semi, era a tiko ena nodra dui yavusa ena nodra vanua, ka ra dui vosataka talega na nodra vosa.

³² Sai ira kece oqori na yavusa tamata era kawa i Noa, ena wasewasei ni veivanua, me vaka na i tuvatuva ni nodra kawa. Ni oti na luvuci ni vuravura, na veimatanitu kece e rukui vuravura era kawa kece ni luve i Noa tagane.