Vakatekivu 1 - Vakavakadewa Vou kei na iVola tale eso

Na i Tukutuku ni Veibuli

¹ Ena i vakatekivu, ena gauna a bulia kina na lomalagi kei na vuravura na Kalou;

² a se lala tu na vuravura ka sega ni dua na kena i tuvaki. E a butobuto tu na dela ni wai, ka sa yavavala yani na Yalo ni Kalou ena dela ni wai.

³ Sa qai kaya na Kalou, “Me rarama mai”; a sa rarama mai.

⁴ Ia ni sa raica na rarama na Kalou ni sa vinaka, sa qai tawasea na rarama mai na butobuto.

⁵ Sa vakatoka na rarama me “Siga” kei na butobuto me “Bogi.” Ia na yakavi kei na mataka sa kena i matai ni siga.

⁶ A sa kaya na Kalou, “Me tu na maliwa lala me wasea na wai, ka dui biubiuti rau.” A sa yaco me vakakina.

⁷ A sa bulia na maliwa lala na Kalou, a sa wasea kina na wai e cake mai na wai e ra; a sa yaco me vakakina.

⁸ A sa vakatoka na vu ni maliwa lala e cake na Kalou me “Lomalagi.” Ena yakavi kei na mataka sa kena i karua ni siga.

⁹ A sa kaya na Kalou, “Me soqoni vata na wai e ra ena dua na yasana, ka me votu mai na vanua mamaca.” A yaco me vakakina.

¹⁰ A sa vakatoka na vanua mamaca me “Vuravura”, kei na wai sa soqoni vata mai me “Wasawasa.” A sa raica na Kalou na ka sa bulia ni sa vinaka.

¹¹ A sa kaya na Kalou, “Me ra tubu mai ena qele na veimataqali kau kecega, na co, na kau vakasorena kei na kau vuata.” A sa yaco me vakakina.

¹² A sa vakatubura na qele na veimataqali kau kecega, na kau vakasorena kei na kau vuata. A sa raica na Kalou na ka sa bulia ni sa vinaka.

¹³ Ia na yakavi kei na mataka sa kena i katolu ni siga.

¹⁴ A sa kaya na Kalou, “Me basika na vu ni rarama ena maliwa lala me wasea na siga mai na bogi, ka me ra vakatakila na gauna e tekivutaki kina na veigauna bibi eso, na siga, kei na yabaki.

¹⁵ Era na cila tu ena maliwa lala ka vakararamataka na vuravura;” a sa yaco me vakakina.

¹⁶ A sa bulia e rua na vu ni rarama lelevu na Kalou, na matanisiga me lewa na siga kei na vula me lewa na bogi; a sa bulia talega na veikalokalo.

¹⁷ A sa vakatikori rau na Kalou ena maliwa lala me vakararamataka na vuravura,

¹⁸ ka me rau lewa na siga kei na bogi, ka wasea na rarama mai na butobuto. A sa raica na Kalou ni sa vinaka.

¹⁹ Ia na yakavi kei na mataka sa kena i kava ni siga.

²⁰ A sa qai kaya na Kalou, “Me ra tubu vakalevu mai ena loma ni wai na veimataqali ka bula, ka me ra veivukayaki na manumanu vuka ena loma ni macawa.”

²¹ O koya oqo sa bulia kina na Kalou na ika lelevu ni wasawasa, na veika bula kecega e wai, kei na manumanu vuka kecega. A sa raica na Kalou ni sa vinaka.

²² Sa qai vosa vakalougatataki ira na Kalou, ka kaya, “Mo ni vuavuai ka tubu me vuqa mai na veika bula e loma ni wai ka vakatawa na wasawasa, ka mo ni tubu talega na manumanu vuka mo ni lewe vuqa.”

²³ Ia na yakavi kei na mataka sa kena i kalima ni siga.

²⁴ A sa kaya na Kalou, “Me qai vakatubura na vuravura na veimataqali manumanu kecega: o ira era sa manoa kei ira era sa kila, na ka lelevu se lalai;” a sa yaco me vakakina.

²⁵ A sa bulia na Kalou na veimataqali manumanu kila kecega kei na veimataqali manumanu manoa kecega, kei na veika kecega sa qasi voli ena dela ni vanua; a sa raica na Kalou ni sa vinaka.

²⁶ A sa kaya na Kalou, “Me tou bulia na tamata me i tovo vata kei kedatou, me ucui kedatou. Era na lewa na ika ni wasawasa, na manumanu vuka, na manumanu manoa kei na manumanu kila kecega, na ka lelevu kei na ka lalai.”

²⁷ A sa bulia na tamata na Kalou, me ucui koya. A sa buli rau na tagane kei na yalewa,

²⁸ ka sa qai vosa vakalougatataki rau ka kaya: “Mo drau vakaluveni ka tubu me lewe vuqa ka vakatawai vuravura, ka lewa. Au sa solia vei kemudrau mo drau lewa na ika, na manumanu vuka, kei na veimataqali manumanu kecega sa bula voli e dela i vuravura.”

²⁹ A sa kaya na Kalou, “Raica au sa solia vei kemudrau na veimataqali co vakasorena e laukana kei na kau vuata kecega e dela i vuravura me kemudrau kakana.

³⁰ Ia, au sa solia talega na co drokadroka me kedra kakana na manumanu kecega, na manumanu vuka kei na veika bula kecega sa qasi voli e vuravura” a sa yaco me vakakina.

³¹ A sa raica na Kalou na ka kecega a bulia ni sa vinaka sara. Ia na yakavi kei na mataka sa kena i kaono ni siga.