Vakatakila 9 - Vakavakadewa Vou kei na iVola tale eso

¹ Sa qai uvuca na i kalima ni agilosi na nona davui. Au a qai raica e dua na kalokalo sa lutu mai lomalagi ki vuravura, ka sa soli vua na ki ni katuba ni qara e sega na botona.

² A sa dolava na kalokalo o ya na qara, ka sa lako cake mai kina na kubou sa vaka na kubou ni dua na lovo levu; a sa vakabutobutotaki na matanisiga kei na maliwa lala ena kubou mai na qara.

³ Era sa qai basika mai na loma ni kubou o ira na vodre ka lako sobu yani ki vuravura, ka sa soli vei ira na kaukauwa me vaka ga na kena sa soli vei ira na batibasaga.

⁴ A sa vakaroti vei ira me ra kakua ni vakacacana na co, se na veivunikau, se na veimataqali kau lalai tale eso; ia me ra vakacacani ira ga na tamata sa sega vei ira na vakatakilakila ni drega ni Kalou ena dui yadredra.

⁵ A sega ni soli vei ira na vodre na kaukauwa me ra veivakamatei, ia me ra veivakararawataki ga me vula lima. Na mosimosi ni nodra vakararawataki sa vaka ga na rarawa mosimosi sa sotava e dua mai na i kati ni batibasaga.

⁶ Ia ena loma ni lima na vula o ya, era na vakasaqarai mate ka ra na sega ni kunea; era na gadreva me ra mate, ia ena dro tani mai vei ira o mate.

⁷ Na kedra i rairai na vodre sa vakataki ira na ose sa vakarau tu ki na i valu; e uludra sa toka kina na ka sa vaka na i sala koula, ka sa vaka na mata ni tamata na matadra.

⁸ Na drauniuludra sa vaka na drauniuludra na yalewa, ka sa vaka na bati ni laione na batidra.

⁹ Na i ubi ni lomaseredra sa vaka na i sasabai kaukamea ni sereda, ka sa vakacevaruru tu na rorogo ni tabadra me vaka na rorogo ni qiqinivalu eso sa dreta na ose ni ra sa cici ki na i valu.

¹⁰ Sa tiko talega na buidra kei na batidra gaga me vaka na batibasaga, ni sa tiko ga ena buidra na kaukauwa me ra ia kina na veivakararawataki me vula lima.

¹¹ Sa dua tiko na nodra tui ka sa liutaki ira, o koya na agilosi ni qara e sega na botona. Na yacana vakaiperiu o Apatoni; ia na yacana vakirisi o Apolioni (a kena i balebale “Na Dauveivakarusai”).

¹² Sa takali yani na i matai ni ka rarawa, ka raica sa vo tale e rua.

¹³ Sa qai uvuca na i kaono ni agilosi na nona davui. Au sa rogoca sara e dua na domo mai na muana vava ni cabocabonisoro koula sa tu ena mata ni Kalou.

¹⁴ A sa kaya na domo o ya vua na i kaono ni agilosi, “Sereki iratou na agilosi e va e ratou sa vesu tu ena uciwai levu na Uferetisi!”

¹⁵ A ratou sa qai sereki na agilosi e va; o iratou ka sa vakarautaki tu mai me yacova na gauna oqo, ena kena siga, ena kena vula, kei na kena yabaki sa lokuci me ratou vakamatea kina e dua na i katolu ni wiliwili ni tamata taucoko.

¹⁶ A sa tukuni vei au na kedra i wiliwili na lewe ni mataivalu vodo ose: era sa lewe 200 na milioni taucoko.

¹⁷ Ia sa vakaoqo na noqu raici ira na ose ena noqu raivotu: o ira sa vodoka era sa daramaka na i sasabai ni lomaseredra sa roka damudamu me vaka na bukawaqa, kei na roka karakarawa me vaka na safaia, kei na roka dromodromo me vaka na sulifure. Na uludra na ose sa vaka na ulu ni laione, ka sa lako mai gusudra na bukawaqa, na kubou, kei na sulifure.

¹⁸ Era sa vakamatei e dua na i katolu ni wiliwili ni tamata mai na ka ni veivakararawataki tolutolu oqo: na bukawaqa, na kubou, kei na sulifure.

¹⁹ Ni sa tikoga na nodra kaukauwa na ose ena gusudra kei na buidra. Sa vaka na gata vakauluna na buidra, ka ra sa vakayagataka oqo me ra veivakamavoataki kina.

²⁰ Na vo ni kawa tamata, o ira ka sega ni vakamatei mai na ka ni veivakararawataki oqo, era sa sega ni vuki tani mai na veika era sa rawata mai na cakacaka ni ligadra. Era sa sega talega ni biuta na qaravi tevoro, se na qaravi kalou matakau eso sa buli ena koula, ena siliva, ena parasa, ena vatu, kei na kau, a veika ga sa sega ni rai rawa, se rogo, se lako.

²¹ Era sa sega talega ni veivutunitaka na nodra daulaba, se na nodra cakacaka vakadraunikau, se na nodra dauyalewa kei na dautagane, se na nodra daubutako.