Vakatakila 8 - Vakavakadewa Vou kei na iVola tale eso

Na i Kavitu ni Drega

¹ Ni sa cecega na Lami na i kavitu ni drega, a sa vakanomodi o lomalagi me rauta e veimama na aua.

² Au sa qai raici iratou na agilosi e vitu sa dau tucake tu ena mata ni Kalou, ka sa soli vei iratou e vitu na davui.

³ Sa qai lako mai e dua tale na agilosi sa taura tu na i vakawaqa ni ka boi vinaka sa buli ena koula, ka la'ki tucake tu ena mata ni cabocabonisoro. A sa soli vua e levu sara na ka boi vinaka me cabora vata kei na nodra masu na tamata yalosavasava ena dela ni cabocabonisoro koula ena mata ni tikotiko vakaturaga.

⁴ A sa tubu cake na kubou ni veika boi vinaka kei na nodra masu na tamata ni Kalou mai na ligana na agilosi sa tu ena mata ni Kalou.

⁵ Sa qai kauta na agilosi na i vakawaqa ni ka boi vinaka, ka vakasinaita ena qilaiso waqa mai na i cabocabonisoro, ka viritaka ki vuravura. A sa voqa cake mai na vavadugudugu kei na lutu ni kurukuru, a sa tatatibitibi na liva, ka yaco na uneune.

Na Davui

⁶ E ratou sa qai vakarau na agilosi e vitu me ratou uvuca na davui e vitu sa tiko vei ratou.

⁷ A sa uvuca na i matai ni agilosi na nona davui, ka sa lutu sobu mai ki na vuravura na uca cevata kei na bukawaqa sa waki vata tu na dra. A sa vakamai e dua na i katolu ni vuravura, kei na dua na i katolu ni wiliwili ni vunikau, kei na veico drokadroka.

⁸ Sa qai uvuca na i karua ni agilosi na nona davui, ka sa kolotaki ki wasawasa e dua na ka sa vaka e dua na ulunivanua levu sa caudre tu ena bukawaqa. A sa vuki me dra e dua na i katolu ni wasawasa,

⁹ a sa mate e dua na i katolu ni veika bula e wasawasa, ka sa vakacacani e dua na i katolu ni wiliwili ni waqa kece sara.

¹⁰ Sa qai uvuca na i katolu ni agilosi na nona davui, ka sa lutu mai lomalagi e dua na kalokalo levu sa caudre tu me vaka na cina, ka sa lutu ki na dua na i katolu ni wiliwili ni veiuciwai kei na veimataniwai.

¹¹ Na yaca ni kalokalo o ya o “Duvagaga”. A sa gaga kina na i katolu ni wasewase ni wai, ka ra sa mate e lewe vuqa na tamata sa gunuva, baleta ni sa gaga vakalevu na kena i gunugunu.

¹² Sa qai uvuca na i kava ni agilosi na nona davui. A sa ravuti vakaukauwa e dua na i katolu ni matanisiga, kei na dua na i katolu ni vula, kei na dua na i katolu ni veikalokalo, ka sa yali kina e dua na i katolu ni kedra rarama; a sa vakabutobutotaki kina e dua na i katolu ni siga kei na dua na i katolu ni bogi.

¹³ Ia ka'u a raica, ka rogoca e dua na ikeli sa kaci tiko vakadomoilevu vakaoqo ni sa vuka voli ena maliwa lala, “A ka rarawa! A ka rarawa! A ka rarawa vakadomobula ena yacovi ira sa tiko e vuravura ena gauna ena voqa cake mai kina na domo ni davui eratou vakarau uvuca tiko oqo na vo ni agilosi e tolu!”