Vakatakila 7 - Vakavakadewa Vou kei na iVola tale eso

Na 144,000 na Isireli

¹ Ni sa oti na veika oqo, au sa qai raica e va na agilosi ni ratou tucake tu ena tutu i vuravura e va, ka ratou vesuka tu na matanicagi e va me kakua kina ni liwa na cagi ena dela ni vuravura, se ena wasawasa, se liwava e dua na vunikau.

² Au sa raica sara e dua tale na agilosi ni sa lako cake mai na tokalau, ka sa taura tu na vatu ni drega nei koya na Kalou bula. Sa qai kaci yani vakadomoilevu o koya vei iratou na agilosi e va, o iratou sa lesi mai vua na Kalou me ratou ia na cakacaka ni vakacaca ena vuravura kei na wasawasa.

³ A sa kaya na agilosi, “Dou kakua mada ni vakacacana na vuravura, se na wasawasa, se na veivunikau, me yacova mada na gauna keitou sa vakatakilakilataka oti kina ena drega na yadredra na dauveiqaravi ni noda Kalou.”

⁴ Sa qai tukuna vei au ni kedra i wiliwili sa dregati era sa lewe 144,000 mai na nodra veiyavusa kecega na Isireli.

⁵ Mai na yavusa i Juta sa dregati, era sa lewe 12,000, mai na yavusa i Rupeni era sa lewe 12,000, mai na yavusa i Kata era sa lewe 12,000.

⁶ Mai na yavusa i Aseri sa dregati, era sa lewe 12,000, mai na yavusa i Nafitalai era sa lewe 12,000, mai na yavusa i Manasa era sa lewe 12,000.

⁷ Mai na yavusa i Simione sa dregati, era sa lewe 12,000, mai na yavusa i Livai era sa lewe 12,000, mai na yavusa i Isikari era sa lewe 12,000.

⁸ Mai na yavusa i Sevuloni sa dregati, era sa lewe 12,000, mai na yavusa i Iosefo era sa lewe 12,000, mai na yavusa i Penijamini era sa lewe 12,000.

Na i Soqosoqo Levu Mai na Veivanua

⁹ Ia ni sa oti oqo, au sa qai rai yani ka raica e dua na i binibini tamata levu, sa sega ni wilika rawa e dua na tamata na kedrai wiliwili! Era sa lako mai oqo mai na veimataqali tamata kecega, na veiyavusa, na veimatanitu, na veimataqali vosa kece sara, ka ra sa tucake tu ena mata ni tikotiko vakaturaga kei na mata ni Lami, era sa vakaisulu ena i sulu vulavula, ka ra taura toka e ligadra na taba ni niusawa.

¹⁰ Era sa kacivaka mai ena domolevu, “Na veivakabulai sa vu ga mai vua na noda Kalou, o koya sa dabe tiko ena i tikotiko vakaturaga, kei koya na Lami!”

¹¹ Era sa tu wavokita na i tikotiko vakaturaga o ira kece na agilosi, kei ira na qase, kei iratou na veika bula e va, ka ra sa bale sobu ka cuva vakatoboicu ena mata ni tikotiko vakaturaga, ka vakarokorokotaka na Kalou,

¹² ka ra kaya, “Emeni! Sa nona ga na noda Kalou ka tawamudu na vakamolimoli, kei na lagilagi, kei na vuku, kei na vakavinavinaka, kei na vakarokoroko, kei na kaukauwa, kei na qaqa! Emeni!”

¹³ Sa qai tarogi au vakaoqo e dua na qase, “O cei beka o ira oqo sa vakaisulu vulavula, ka ra sa lako beka mai vei?”

¹⁴ Au sa qai kaya vua, “Au sa sega saka ni kila. O ni sa kila ga oi kemuni.” Sa qai kaya vei au, “Sa i ira oqo era sa bula mai na veivakararawataki levu. Era sa savata na nodra i sulu ka vakavulavulataka ena dra ni Lami.

¹⁵ Oqori na vuna era sa tu kina ena mata ni tikotiko vakaturaga ni Kalou ka qaravi koya ena siga kei na bogi ena loma ni nona vale tabu. Ia o koya sa tiko ena i tikotiko vakaturaga sa taqomaki ira ni sa tiko vata ga kei ira.

¹⁶ Era na sega ni viakana se viagunu tale; ka sega talega ni na kati ira na katakata ni siga se dua tani tale na mataqali katakata,

¹⁷ baleta ni sa nodra i vakatawa na Lami ka sa tiko ena loma ni tikotiko vakaturaga, ka na liutaki ira o koya ki na i vurevure ni wai ni bula; ia na Kalou ena qusia laivi na wainimata mai na matadra kecega.”