Vakatakila 5 - Vakavakadewa Vou kei na iVola tale eso

Na i Vola Vivigi kei na Lami

¹ Au a qai raica ena ligana i matau i koya sa dabe tiko ena i tikotiko vakaturaga e dua na i vola vivigi sa volai tu e loma, e dakuna talega, ka sa dregati ena drega e vitu.

² Au a raica talega e dua na agilosi kaukauwa sa kacivaka tiko ena domolevu, “O cei sa ganiti koya me cecega na drega ka tevuka na i vola vivigi?”

³ Ia sa sega ga ni kune e dua mai lomalagi, se ena vuravura, se ena ruku i vuravura me tevuka rawa na i vola vivigi ka rai ki loma.

⁴ Au a tagi vakalevu ni sa sega ni kune e dua e ganita me tevuka na i vola vivigi se me rai ki loma.

⁵ Sa qai kaya vei au e dua vei ira na qase, “Kakua ni tagi! Raica! O koya na Laione ni yavusa i Juta, na kawa vakaturaga i Tevita, sa rawata o koya na qaqa, ni sa rawa vua me cecega na drega e vitu ka tevuka na i vola vivigi.”

⁶ Au a qai raica e dua na Lami sa duri tu ena lomadonu ni tikotiko vakaturaga, ka sa wavoliti koya na veika bula e va kei ira na qase. Na i rairai ni Lami sa vaka e dua sa vakamatei. E vitu na kena i leu ka vitu na matana, ka oqo ga na yalo ni Kalou e vitu sa talai ki vuravura taucoko.

⁷ Sa qai lako na Lami ka la'ki taura na i vola vivigi mai na liga i matau i koya sa dabe tiko ena i tikotiko vakaturaga.

⁸ Ni sa kauta yani o koya na i vola vivigi, era sa bale sobu ena vakarokoroko ena mata ni Lami na veika bula e va kei ira na qase e ruasagavulukava. O ira yadua era sa dui taura tiko e dua na api kei na bilo koula eso sa sinai ena ka boi vinaka, o ya na nodra masu na tamata ni Kalou.

⁹ Era sa lagata e dua na sere vou vakaoqo: “Sa ganiti kemuni mo ni taura na i vola vivigi Ka cecega na kena drega. Ni kemuni a vakamatei, ka ni o ni sa volia na tamata ena nomuni dra me ra nona na Kalou Mai vei ira kecega na veiyavusa, na duivosavosa, na veimataqali tamata, kei na veimatanitu.

¹⁰ O ni sa vakayacori ira me ra lewe ni matanitu vakabete sa qarava na noda Kalou, Ka ra na veiliutaki e vuravura.”

¹¹ Au a qai raica ka rogoca na domodra na agilosi ka kedra i wiliwili sa udolu vakaudolu ka milioni vakamilioni! Era sa vakavolivolita na i tikotiko vakaturaga, na veika bula e va, kei ira na qase,

¹² Ka ra laga tiko ena domolevu, “Sa ganita ga na Lami ka sa vakamatei Me nona na qaqa, na i yau, na yalomatua, na kaukauwa Na rokovi, na lagilagi, kei na vakacaucau!”

¹³ Au a qai rogoci ira na veika bula kecega mai lomalagi, e dela ni vuravura, ena ruku i vuravura, kei na loma ni wasawasa — a veika kecega sa cegu rawa — ni ra sa seretaka voli, “Me soli ga vua sa tiko ena i tikotiko vakaturaga kei koya na Lami Na vakamolimoli kei na vakarokoroko, na kaukauwa kei na lagilagi, Ka sega ni mudu!”

¹⁴ E ratou sa qai kaya na veika bula e va, “Emeni!” Era sa qai bale sobu na qase ena vakarokoroko.