Vakatakila 20 - Vakavakadewa Vou kei na iVola tale eso

Na Yabaki Udolu

¹ Au a qai raica e dua na agilosi sa lako sobu tiko mai lomalagi, ka taura tiko e ligana na ki ni qara e sega na botona kei na dua na sinucodo bibi.

² A sa qai vesuka o koya na drakoni, na gata makawa o ya, na Tevoro se o Setani, ka sa vesuki koya ena sinucodo me dua na udolu na yabaki.

³ A sa biuti koya na agilosi ki na qara sa sega na botona, ka sogota, ka dregata, me kakua kina ni temaki ira tale na veimatanitu me yacova ni sa oti na dua na udolu na yabaki. Ni sa oti o ya, ena qai sereki tale o koya me dua ga na gauna lekaleka.

⁴ Ia au a qai raica eso na i tikotiko vakaturaga, era sa dabe tiko kina eso ka sa soli vei ira na kaukauwa me ra turaganilewa. Au a raica talega na yalodra na tamata sa tamusuki na uludra ena vuku ni nodra a vakadinadinataka na veika dina sa vakatakila o Jisu kei na vosa ni Kalou. Era a sega ni vakarokorokotaka na manumanu rerevaki se na kena i vakatakarakara, ka sega talega ni ra ciqoma na maka ni manumanu rerevaki ena yadredra se ena ligadra. Era sa bula tale mai na mate ka veiliutaki vata kei Karisito me dua na udolu na yabaki.

⁵ (Era sa sega ni bula tale mai na mate o ira na vo ni mate me yacova ni sa oti na udolu na yabaki.) Sa i koya oqo na i matai ni tu cake tale mai na mate.

⁶ Sa ka ni marau ka kalougata vakalevu sara o ira sa okati ena i matai ni tucake tale mai na mate oqo. Sa sega ni qai lewai ira rawa na i karua ni mate; era na bete ga ni Kalou ka bete i Karisito, ka ra na lewa vata kei koya me dua na udolu na yabaki.

Sa Vakadrukai o Setani

⁷ Ni sa na oti na dua na udolu na yabaki, ena qai sereki o Setani mai na vanua sa vesuki tiko kina,

⁸ ka na lako yani o koya me temaki ira na veimatanitu era sa tiko ena veiyasa i vuravura kecega, o ya o Koki kei Mekoki. Ena vakasoqoni ira vata mai o Setani me ra ia na i valu, ka kedra i wiliwili sa vaka na mata ni nuku ni matasawa.

⁹ Era sa roboti vuravura taucoko ka vakavolivolita na nodra i tikotiko na tamata ni Kalou kei na koro levu sa dau lomana. Ia sa qai lutu mai lomalagi na bukawaqa ka vakarusai ira.

¹⁰ A sa qai viritaki na tevoro, o koya sa dautemaki ira, ki na drano bukawaqa kei na sulifure, ena vanua e rau sa viritaki oti kina na manumanu rerevaki kei na parofita vakailasu; ka ratou na vakararawataki ena siga kei na bogi ka tawamudu.

Na Veilewai Levu

¹¹ Au a qai raica e dua na i dabedabe vulavula levu vakatui kei koya sa dabe tiko kina. E rau sa dro tani mai vua o lomalagi kei vuravura ka rau sa yali vakadua sara yani.

¹² Au a raici ira era sa mate oti, o ira sa cecere kei ira na tamata wale, era sa tu ena mata ni tikotiko vakaturaga, ka sa tevuki eso na i vola. Sa qai tevuki talega e dua tale na i vola, ka sai koya oqo na i Vola ni Bula. Era sa lewai na mate mai na veika era sa kitaka me vaka sa volai tu ena i vola.

¹³ Sa qai solia mai na wasawasa na tamata mate kece era sa tu kina. O mate talega kei na nodra vuravura na mate e rau sa soli ira mai na tamata mate era sa tu vei rau; ka ra sa lewai na tamata yadua me vaka na nodra i valavala.

¹⁴ E rau sa qai viritaki ki na drano bukawaqa o mate kei na nodra vuravura na mate. (Na drano bukawaqa oqo sai koya na i karua ni mate.)

¹⁵ Ia o ira vakayadua sa sega ni volai na yacadra ena i Vola ni Bula era sa viritaki ga ki na drano bukawaqa.