Vakatakila 16 - Vakavakadewa Vou kei na iVola tale eso

Na Bilo ni Cudru ni Kalou

¹ Au a qai rogoca e dua na domolevu mai na valenisoro ka sa vosa vakaoqo vei iratou na agilosi e vitu: “Dou lako ka sovaraka ki vuravura na bilo ni cudru ni Kalou e vitu!”

² A sa lako yani na i matai ni agilosi ka sovaraka na nona bilo ki vuravura. A sa tauvi ira kina na tamata sa tu vei ira na nona maka na manumanu rerevaki kei ira era sa dauqarava na kena i vakatakarakara na vidikoso ca ka rui mosimosi.

³ Sa qai sovaraka na i karua ni agilosi na nona bilo ki na wasawasa. A sa vuki na wai me vaka na dra ni tamata mate, ka ra sa mate na veika bula kecega sa tu e wasawasa.

⁴ Sa qai sovaraka na i katolu ni agilosi na nona bilo ki na veiuciwai kei na veimataniwai, ka sa vuki na wai me dra.

⁵ Ia ka'u sa qai rogoca ni sa kaya na agilosi sa lewa na wai, “O ni sa dodonu ena nomuni lewa oqo, oi kemuni na Yalosavasava, oi kemuni sa bula edaidai ka o ni sa bula talega eliu!

⁶ O ira oqo era a vakadavea na nodra dra na yalosavasava kei ira na parofita, ka o ni sa solia kina vakaoqo vei ira na dra me ra gunuva. Sa rauta vinaka me ra sotava na ka oqo!”

⁷ Au a qai rogoca e dua na domo mai na i cabocabonisoro, ni sa kaya, “Oi kemuni na Turaga na Kalou Kaukauwa! Sa dina ga ka dodonu na nomuni lewa!”

⁸ Sa qai sovaraka na i kava ni agilosi na nona bilo ki na matanisiga, ka sa vakatarai vua na matanisiga me vakamai ira na tamata ena kena bukawaqa katakata.

⁹ Era sa kama vakaca sara na tamata mai na katakata vakadomobula oqo, ka ra sa vosavakacacataka kina na yaca ni Kalou, o koya sa lewa na veika ni veivakararawataki oqo. Ia era sa sega ga ni vuki tani mai na nodra i valavala ca ka vakacaucautaka na nona lagilagi.

¹⁰ Sa qai sovaraka na i kalima ni agilosi na nona bilo ki na nona i tikotiko na manumanu rerevaki. A sa solegi ena butobuto na nona matanitu na manumanu rerevaki, ka ra sa kati yamedra na tamata baleta na nodra mosi,

¹¹ ka ra sa vosavakacacataka na Kalou ni lomalagi ena vuku ni nodra rarawa mosimosi kei na nodra tauvi vidikoso. Ia era sa sega ga ni vuki tani mai na nodra sala ca.

¹² A sa qai sovaraka na i kaono ni agilosi na nona bilo ki na uciwai levu na Uferetisi. A sa maca vakadua na uciwai, ka sa vakarautaka oqo na sala me baleti ira na tui eso sa lako mai na tokalau.

¹³ Au sa qai raica e tolu na yalo velavela sa vaka na boto na kedratou i rairai. Eratou sa lako mai na gusu ni drakoni, mai na gusu i koya na manumanu rerevaki, kei na gusuna na parofita vakailasu.

¹⁴ Sa i iratou oqo na yalo ni tevoro sa dau cakava na veicakacaka mana eso. O iratou na yalo e tolu oqo sa lako yani vei ira na tui ni veivanua e vuravura taucoko, me vakasoqoni ira vata mai ki na i valu ena siga bibi o ya, na Siga ni Kalou Kaukauwa.

¹⁵ “Rogoca! Au na lako yani me vaka na daubutako! Sa kalougata o koya sa yadra tiko ka maroroya tiko na nona i sulu, me kakua kina ni veilakoyaki luvawale voli ka vakamadualaki ena matana levu!”

¹⁶ A ratou sa vakasoqoni ira vata mai na tui ki na vanua sa vakatokai ena vosavakaiperiu o Amaketone.

¹⁷ Sa qai sovaraka na i kavitu ni agilosi na nona bilo ki na maliwa lala. A sa qai rogo mai na i tikotiko vakaturaga mai na valenisoro e dua na domolevu, ka sa kaya, “Sa qai vakayacori oti!”

¹⁸ A sa tibi na livaliva, ka sa lutu na kurukuru kei na vavadugudugu, ka sa yaco e dua na uneune levu. A sega mada ni se bau dua na uneune levu me vakaoqo me tekivu mai na gauna e buli kina na tamata; ni sa ca vakalevu sara na kena oqo!

¹⁹ A sa kavida i tolu na koro levu, ka ra sa vakarusai na veikoro ni veimatanitu kece sara. A sa qai nanuma na koro levu o Papiloni na Kalou, ka sa vakayacori koya me gunuva na waini mai na nona bilo, io na waini ni nona cudru waqawaqa.

²⁰ Era sa takali tani na veiyanuyanu kecega, ka ra sa sega ni kune na veiulunivanua kece sara.

²¹ Sa qai lutu mai lomalagi vei ira na tamata na uca cevata lelevu, ka kedra bibi yadudua sa rauta ni 50 na kilokaramu. Era sa vosavakacacataka na Kalou o ira na tamata ena vuku ni ka ni veivakararawataki oqo ni uca cevata, ni sa rui vakadomobula dina.