Vakatakila 12 - Vakavakadewa Vou kei na iVola tale eso

Na Yalewa kei na Drakoni

¹ A sa qai rairai mai lomalagi e dua na ka levu ka sa rui dredre sara ni vakamacalataki. Oqo e dua na yalewa, a sa vakaisulu tu ena matanisiga ka sa tiko ena ruku ni yavana na vula, ka sa daramaka e uluna na i sala kalokalo e tinikarua.

² Ia ni sa bukete tiko ka sa voleka sara ni vakasucu, a sa tagi ga vakadomoilevu ena vuku ni mosi kei na rarawa ni sa taratara me vakasucu.

³ A sa rairai tale mai lomalagi e dua tale na ka sa dredre sara ni vakamacalataki. Oqo e dua na drakoni damudamu vakaitamera, e vitu na uluna ka tini na kena i leu, ka tokara toka ena uluna yadua na i sala vakaturaga e vitu.

⁴ A sa vakayagataka na buina me yarataka kina mai lomalagi e dua na i katolu ni kalokalo ka kolotaki ira sobu ki vuravura. A sa duri tu vakadua na drakoni ena mata i koya na yalewa, me rawa kina vua me kania sara na luvena ni sa qai sucu mai.

⁵ A sa qai vakasucuma na yalewa e dua na gonetagane, o koya me na liutaka na veimatanitu kecega ena i titoko kaukamea. Ia sa tauri tani vakaukauwa ga mai vei tinana na gone oqo ka sa kau vua na Kalou, ki na nona i tikotiko vakaturaga.

⁶ Sa qai dro na yalewa ki na vanua dravuisiga, ki na tikina sa vakarautaka tu na Kalou me baleti koya, ka me na maroroi kina me 1,260 na siga.

⁷ A sa kacabote na i valu mai lomalagi. Sa ia na i valu o Maikeli kei ira na nona agilosi me ra valuta na drakoni, o koya sa vala lesu kei ira na nona agilosi;

⁸ ia sa qai vakadrukai na drakoni, ka sa sega ni vakatarai vua kei ira na nona agilosi me ra tiko tale mai lomalagi.

⁹ A sa biu tani mai na drakoni vakaitamera — o koya na gata makawa, sa vakatokai na Tevoro, se o Setani, o koya sa dauvakaisina na vuravura taucoko. A sa viritaki sobu mai ki vuravura kei ira taucoko sara na nona agilosi.

¹⁰ Au a qai rogoca e dua na domolevu mai lomalagi, sa kaya, “Sa qai yaco mai oqo na veivakabulai ni Kalou! Sa qai vakatakila oqo na Kalou na nona kaukauwa ni sa Tui o koya! Sa qai vakaraitaka oqo na nona Mesaia na kaukauwa sa tu vua! Ni sa qai viritaki tani mai lomalagi oqo o koya sa daubeitaki ira na wekada vakayalo ena veisiga kei na veibogi ena mata ni Kalou.

¹¹ O ira na wekada era sa vakadrukai koya ka ra sa rawata na qaqa ena vuku ni dra ni Lami kei na dina era sa kacivaka; ka ni ra sa loma rawarawa me ra solia na nodra bula, ka bole mate.

¹² Mo reki kina, o iko lomalagi, kei kemuni kece sara sa vakaitikotiko kina! Ia ena kalouca ga o vuravura kei na wasawasa! Ni sa lako sobu yani vei kemudrau na Tevoro, ka sa sinai sara ena cudru katakata, baleta ni sa kila o koya ni sa lekaleka sara na nona gauna.”

¹³ Ia ni sa kila na drakoni ni sa viritaki sobu ki vuravura, a sa tekivu vakacemuria na yalewa ka a vakasucuma na gonetagane.

¹⁴ A sa qai soli vua na yalewa e rua na tabana vakaikeli lelevu me rawa kina ni vuka sara ki na nona i tikotiko ena vanua dravuisiga, ki na vanua me la'ki maroroi kina me rauta e tolu veimama na yabaki, ka me kakua ni ravuti koya kina na drakoni.

¹⁵ A sa qai luaraka na wai mai na gusuna na drakoni me dave muria na yalewa, me vakacirimi koya ena waluvu.

¹⁶ Ia sa qai veivuke o vuravura vei koya na yalewa, ni sa dalaga ka tiloma na wai sa luaraka mai na drakoni.

¹⁷ A sa cudruva vakaukauwa na yalewa na drakoni, ka sa la'ki veivala kei ira na kena vo ni nona kawa na yalewa, o ira kece sa muria tiko na veivakaro ni Kalou ka yalodina tikoga ki na veika dina sa vakatakila o Jisu.

¹⁸ A sa duri tu na drakoni ena vanua veinukunuku ni matasawa.