Vakatakila 11 - Vakavakadewa Vou kei na iVola tale eso

Na i Vakadinadina e Rua

¹ A sa qai soli vei au e dua na kau rabalailai balavu ka sa vaka na i rairai ni gasau ni vakarau, ka sa tukuni vei au, “Mo lako ka vakarautaka mai na valenisoro ni Kalou kei na i cabocabonisoro, ka wilika mai na levu ni tamata era sa sokalou tiko kina.

² Ia mo kakua ga ni vakarautaka na lomanibai ena taudaku ni vale, baleta ni sa soli oti na tikina o ya vei ira sa sega ni kila na Kalou, o ira era na buturaka sobu na Koro Tabu me vula vasagavulukarua.

³ Au na vakatala yani e rua na noqu i vakadinadina sa vakaisulu ena sulu taga, ka me rau kacivaka na i tukutuku ni Kalou ena loma ni 1,260 na siga o ya.”

⁴ Oi rau na noqu i vakadinadina oqo sai rau na vuniolive e rua kei na i tutu-ni-cina e rua ka sa tu ena mata ni Turaga kei vuravura.

⁵ Ni kevaka e dua sa vinakata me vakacacani rau, ena lako mai gusudrau na bukawaqa ka vakarusai ira na nodrau meca; ena vakamatei vakaoqo o koya sa via vakacacani rau.

⁶ Sa tu vei rau na kaukauwa me rau sogoti lomalagi me kakua kina ni tau na uca ena gauna e rau sa kacivaka voli kina na i tukutuku ni Kalou. Sa tu talega vei rau na kaukauwa vei ira na veimataniwai, me rau vukica na wai me dra; sa tu talega vei rau na kaukauwa me rau samuti vuravura ena ka ni veivakararawataki kecega, ka me vaka ga na ka erau sa vinakata.

⁷ Ia ni rau sa vakaotia na nodrau i tukutuku, ena qai valuti rau o koya na manumanu rerevaki sa cabe cake mai na loma ni qara sa sega na botona. Ena vakadrukai rau o koya, ka vakamatei rau,

⁸ ka na biu wale tu ga na yagodrau ena saqata ni koro levu, ena vanua sa lauvako kina na nodrau Turaga ki na kauveilatai. A sa vakatokai vakaibalebale se vakaiyaloyalo na koro o ya me o Sotoma, se o Ijipita.

⁹ Era na la'ki vakaraica tu na yagodrau me tolu veimama na siga o ira na tamata mai na veimatanitu kecega, kei na veiyavusa, kei na veimataqali vosa duidui eso, kei na veimatatamata ka ra na sega ni vakatara me la'ki buluti na yagodrau ena i bulubulu.

¹⁰ Era na rekitaka na nodrau mate na lewe rua oqo o ira na kai vuravura. Era na solevu ka veisoli ka-ni-loloma, baleta ni rau a kauta mai ki vuravura na veivakararawataki levu oi rau na parofita oqo.

¹¹ Ia ni sa oti e tolu veimama na siga, sa qai ceguvi rau na Kalou ena i cegu ni bula, ka rau sa tucake mai; ka ra sa rere kecega na tamata sa raici rau.

¹² A rau sa qai rogoca na parofita e dua na domolevu mai lomalagi ni sa kaya vei rau, “Drau lako cake mai ki ke!” Ni ra sa sarasara tu na nodrau meca, erau sa qai lako cake ki lomalagi ena o.

¹³ E na gauna vata ga o ya, a sa yaco e dua na uneune levu; a sa vakarusai e dua na i katini ni koro levu, ka ra mate e lewe 7,000 na tamata. Sa tuburi ira na vo ni tamata na rere levu ka ra sa vakacaucautaka ga na kaukauwa i koya na Kalou ni lomalagi.

¹⁴ Sa qai takali yani na i karua ni ka rarawa, ia sa voleka sara mai na kena i katolu!

Na i Kavitu ni Davui

¹⁵ A sa qai uvuca na i kavitu ni agilosi na nona davui, ka sa rogo levu mai lomalagi na veidomo eso, era sa kaya, “Na kaukauwa ni lewa me baleti vuravura sa qai yaco oqo me nona na noda Turaga kei na nona Karisito, ka na veiliutaki tikoga o koya ka sega ni mudu!”

¹⁶ Era sa qai bale sobu vakatoboicu ena vakarokoroko o ira na qase e lewe ruasagavulukava sa daudabe tiko ena nodra i tikotiko vakaturaga ena mata ni Kalou, ka ia na sokalou ki vua na Kalou,

¹⁷ ka kaya: “Kemuni na Turaga na Kalou Kaukauwa, O ni sa bula edaidai, o ni a bula eliu, o ni na bula tikoga! Keimami sa vakavinavinakataki kemuni Ena nomuni sa taurivaka na nomuni kaukauwa levu Ka ia na vakataulewa!

¹⁸ Era sa cudru vakalevu na tamata sa sega ni kila na Kalou, Baleta ni sa yaco mai oqo na gauna ni nomuni cudru, Na gauna me ra sa veilewaitaki kina na mate. Sa kena gauna oqo me ra saumi kina na nomuni dauveiqaravi, na parofita, Kei ira na yalosavasava kecega, o ira kece sara sa rokova na yacamuni, Se ra tamata wale se ra cecere. Sa kena gauna oqo me ra vakarusai kina o ira sa vakarusai vuravura tiko!”

¹⁹ A sa dolavi na vale ni Kalou mai lomalagi, ka sa laurai ni tiko e loma na Kato ni Veiyalayalati. A sa tarava mai na tibi ni liva, na vavadugudugu kei na lutu ni kurukuru, na uneune, kei na tau bi ni uca cevata.