Vakatakila 10 - Vakavakadewa Vou kei na iVola tale eso

Na Agilosi kei na i Vola Vivigi Lailai

¹ Au a qai raica e dua tale na agilosi kaukauwa sa lako sobu tiko mai lomalagi. A sa solegi koya tu na o, ka sa cawiri e uluna e dua na drodrolagi; sa vaka na matanisiga na matana ka sa vaka na duru bukawaqa na yavana.

² A sa taura tu e ligana e dua na i vola vivigi lailai, ka sa tevuki tu. A sa biuta tu na yavana i matau ki wasawasa kei na yavana i mawi ena vanua mamaca,

³ ka sa kaci ena domolevu me vaka na domo ni laione. Ni sa kaci oti, e ratou sa qai sauma mai vakadomoilevu na kurukuru e vitu.

⁴ Ena gauna ga eratou sa vosa kina na kurukuru e vitu, au sa vakarau tu me'u volavola. Ia ka'u a qai rogoca e dua na domo mai lomalagi ni tukuna mai vei au, “Maroroya me ka vuni na veika eratou sa kaya na kurukuru e vitu; mo kakua sara ni vola!”

⁵ Sa qai dodoka cake ki lomalagi na ligana i matau o koya na agilosi ka'u raica ni tucake tu ena wasawasa kei na vanua mamaca,

⁶ ka sa vosa bubului ena yaca ni Kalou, o koya sa bula tikoga ka tawamudu, ka sa bulia na lomalagi kei na veika sa tu kina, na vuravura kei na veika sa tu kina, vata kei na wasawasa kei na veika sa tu kina. A sa kaya na agilosi, “Sa na sega tale na wawa!

⁷ Ia ena gauna sa uvuca kina na nona davui na i kavitu ni agilosi, ena vakacavara vinaka kina na Kalou na nona i tuvatuva vuni, me vaka sa vakadewataka oti vei ira na nona dauveiqaravi, o ira na parofita.”

⁸ Sa qai vosa tale vei au na domo ka'u a rogoca mai lomalagi, ni sa kaya, “Mo lako ka taura na i vola vivigi sa tevuki tu ena ligana na agilosi sa tucake tu ena wasawasa kei na vanua mamaca.”

⁹ Au sa qai lako yani vua na agilosi ka kaya vua me solia vei au na i vola vivigi lailai. Sa qai kaya vei au o koya, “Taura ka kania; ena la'ki vuki me gaga e ketemu, ia sa kamikamica sara me vaka na oni e gusumu.”

¹⁰ Au sa qai taura na i vola vivigi lailai mai na liga i koya na agilosi, ka'u a kania; a sa kamikamica sara me vaka na oni e gusuqu, ia sa qai vuki me gaga e ketequ ni'u sa kania oti.

¹¹ Sa qai tukuni mai vei au, “Sa dodonu vakaoqo mo kacivaka tale na i tukutuku ni Kalou me baleta na veimatanitu, kei na veimatatamata, kei na veimataqali vosa, kei na tui eso.”