Vakatakila 1 - Vakavakadewa Vou kei na iVola tale eso

¹ Sa volai ena i vola oqo na i tukutuku ni veika sa vakatakila o Jisu Karisito. Sa solia vua na Kalou na veika sa rairai mai oqo me vakaraitaka na veika sa voleka ni yaco mai vei ira na nona tamata. A sa vakaraitaka na Karisito na veika oqo ni sa tala yani na nona agilosi vua na nona dauveiqaravi o Joni,

² o koya ka sa tukuna na veika kecega sa raica. Sa i koya oqo na nona i tukutuku me baleta na vosa ni Kalou kei na dina sa vakatakila o Jisu Karisito.

³ Sa kalougata o koya sa wilika ka rogoca na vosa ni parofisai oqo, ka vakabauta na veika sa volai kina; ni sa voleka sara na gauna me ra na vakayacori kina.

Veikidavaki ki na Soqosoqo Lotu e Vitu

⁴ Mai vei Joni kivei ira na i soqosoqo lotu e vitu mai Esia: Me nomuni ga na loloma kei na vakacegu sa solia mai vei kemuni na Kalou, o koya sa bula tiko edaidai, a sa bula mai liu, ka na bula tikoga ena veisiga ni mataka, ka sa solia talega mai o iratou na yalo e vitu ena mata ni nona i tikotiko vakaturaga,

⁵ sa soli vakakina mai vei Jisu Karisito, o koya na dautukutuku yalodina, na ulumatua vei ira na tucake tale mai na mate, ka nodra daunilewa na tui kece sara ni vuravura oqo. Sa lomani keda sara o koya, ka sa sereki keda mai na noda i valavala ca ena vuku ni nona mate,

⁶ ka sa vakayacori keda me dua na matanitu ka matabete me veiqaravi vua na nona Kalou ka Tamana. Sa nei Jisu Karisito ga na lagilagi kei na kaukauwa ka sega ni mudu! Emeni.

⁷ Raica, sa lako mai o koya ena dela ni veio! Era na raici koya na mata kecega, o ira talega era a suaki koya. Era na tagicaki koya na veimatatamata kece sara e vuravura. Sa na yaco ga me vakaoqo! Emeni!

⁸ “Oi au na Alifa kei na Omeka (na i vakatekivu kei na i vakataotioti),” sa kaya na Turaga na Kalou Kaukauwa, o koya sa bula tiko edaidai, a sa bula mai liu, ka na bula tikoga ena veisiga ni mataka.

A Raivotu me Baleti Karisito

⁹ Oi au o Joni na wekamuni, ka'u sa nomuni i tokani Vakarisito ena noda vosota vata tiko na veika rarawa sa yaco vei ira sa lewe ni nona matanitu. Au a la'ki biu ena yanuyanu o Patimo baleta ni'u a vunautaka na vosa ni Kalou kei na dina sa mai vakatakila o Jisu.

¹⁰ A sa liutaki au na Yalo Tabu ena siga ni Turaga, ka'u a qai rogoca ni voqa mai dakuqu e dua na domo sa rogo levu me vaka na davui,

¹¹ ka sa kaya vakaoqo “Mo vola na veika o sa raica ena dua na i vola, ka qai vakauta na i vola ki na i soqosoqo lotu e vitu: ki Efeso, kei Simurina, kei Perikamo, kei Caetaira, kei Sariti, kei Filadelafia, kei Leotisea.”

¹² Au a qai rai vuki me'u raici koya ka vosa tiko mai vei au, ka'u sa raica e vitu na i tutu-ni-cina koula,

¹³ ia sa tiko ena kedra maliwa e dua ka sa vaka na i rairai ni tamata, a sa daramaka tu o koya e dua na i sulu vakatui ka sa yaco sara ki yavana na kena balavu, ka sa vau tu ki lomaserena na i vau koula.

¹⁴ Sa vulavula na uluna me vaka na vuti ni sipi vula, se na uca cevata; ka sa vaka na yameyame ni buka na yaloka ni matana;

¹⁵ a sa tatalivaliva na yavana me vaka na parasa sa vakasavasavataki vinaka ka boroi vakamatau, kei na rorogo ni domona sa vaka na vadugu ni savu.

¹⁶ A sa taura cake tu e ligana i matau e vitu na kalokalo, ka sa basika cake mai gusuna na i seleiwau gata ka batirua. Na matana e sa vaka na matanisiga ni sa solia taucoko na nona i serau.

¹⁷ Ia ni'u sa raici koya, au a qai bale sobu ki yavana me vaka na tamata sa cibati koya. A sa tabaki au ena ligana i matau o koya, ka kaya, “Kakua ni o rere! Oi au na i Vakatekivu kei na i Vakataotioti.

¹⁸ Oi au o koya sa bula! Au a sa mate, ia oqo ka'u sa bula tikoga ka tawamudu. Sa tu talega vei au na kaukauwa ni kena lewai o mate kei na vuravura ni mate o etesi.

¹⁹ Ia mo vola sara na veika o sa raica, na veika o sa raica tu oqo kei na veika ena yaco emuri.

²⁰ Sa vakaoqo na i balebale vuni ni kalokalo e vitu o sa raica e ligaqu i matau vata kei na i tutu-ni-cina koula e vitu: na kalokalo e vitu sai iratou na agilosi ni soqosoqo lotu e vitu, kei na i tutu-ni-cina e vitu sai iratou na i soqosoqo lotu e vitu.