Vakarua 8 - Vakavakadewa Vou kei na iVola tale eso

E Dua na Vanua Vinaka me Taukeni

¹ “Ni qarauna mo ni vakayacora vakavinaka na i vunau kece sara au sa vakarota vei kemuni edaidai, mo ni bula ka tubu kina mo ni lewe vuqa, ka vakatawana na vanua sa yalataka o Jiova vei ira na nomuni qase.

² Ni nanuma na i tovo ni nona a tuberi kemuni voli mai o Jiova na nomuni Kalou ena i lakolako balavu ena loma ni vanua lala ena vasagavulu na yabaki sa oti, me rawa kina ni vakamalumalumutaki kemuni, ka vakatovolei kemuni me kila na lomamuni se o ni na muria na nona i vakaro se segai.

³ A sa vakavuna mo ni yalomalumalumu ka viakana; ia, a sa qai vakani kemuni ena mana, e dua na mataqali kakana o ni sega ni se bau kania se o ira na nomuni qase. A sa cakava oqo mo ni vulica kina ni sa sega ni bula na tamata ena madrai duadua ga; ia sa bula ga ena vosa kecega sa lako mai na gusu ni Kalou.

⁴ E a sega ni bau madra mai na i sulu o ni tokara voli, ka sega ni bau vuce na yavamuni ena loma ni vasagavulu na yabaki o ya.

⁵ Ni kakua ni guilecava ni sa dau veivakadodonutaki ka veitotogitaki o Jiova na nomuni Kalou me vaka ga ni sa vakavulica na luvena e dua na tama ni gone.

⁶ O koya oqo mo ni muria na vunau i Jiova na nomuni Kalou ena nomuni muria na nona sala ka rerevaki koya.

⁷ Ni sa kauti kemuni tiko o Jiova na nomuni Kalou ki na dua na vanua bulabula vinaka. Na vanua ni veiuciwai, na veimataniwai kei na veiuciwai vuni ka drodro lo e loma ni qele me sovaraki yani ki na kena veibuca kei na kena veibaba;

⁸ na vanua sa bula kina na witi kei na barile, na vunivaini kei na vunilolo, na pomekaraneti, na vanua ni veiolive kei na oni.

⁹ O ni na sega ni viakana se dravudravua ena dua na ka, ena vanua o ya. Na kena veivatu e sinai ena kaukamea, kei na kena veidelana o ni na rawa ni keli kopa mai kina.

¹⁰ Ena levu sara na kemuni kakana, ka o ni na qai vakavinavinakataki Jiova na nomuni Kalou ena vuku ni vanua bulabula vinaka sa solia vei kemuni.

Vakasala me Kua ni Guilecavi o Jiova

¹¹ “Ni qarauna mo ni kakua sara ni guilecavi Jiova na nomuni Kalou; kei na i vunau au sa solia vei kemuni edaidai.

¹² Ni o ni sa kana ka mamau, ka tara na veivale vinaka ka tiko kina,

¹³ ka sa tubu me levu na nomuni bulumakau, na sipi, na siliva, na koula, kei na veika kecega o ni taukena;

¹⁴ ia ni qarauna mo ni kakua ni dokadoka ka guilecavi Jiova na nomuni Kalou, o koya ka a vakabulai kemuni mai Ijipita, na vanua o ni a vakabobulataki tu kina.

¹⁵ A qai tuberi kemuni ena loma ni vanua lala levu ka rerevaki sa levu kina na gata batigaga kei na batibasaga, a qai vakadavea na memuni wai mai na vatu qaqa.

¹⁶ A vakani kemuni o koya ena mana mai na vanua lala, e dua na mataqali kakana era a sega ni sa bau tovolea vakadua na nomuni qase, a vakayalomalumalumutaki kemuni, ka vakatovolei kemuni, ka mo ni vinaka kina e gauna mai muri.

¹⁷ Qarauna sara mo ni kakua ni kaya e lomamuni ni o ni sa yaco mo ni vutuniyau ena nomuni kaukauwa kei na nomuni i gu ga vakataki kemuni.

¹⁸ Mo ni nanuma vinaka ni sai Jiova ga na nomuni Kalou ka sa solia vei kemuni na kaukauwa mo ni vutuniyau kina. Sa kitaka oqo baleta ni sa yalodina tiko edaidai ki na veiyalayalati sa vakayacora kei ira na nomuni qase.

¹⁹ Ni kakua sara ni guilecavi Jiova na nomuni Kalou, mo ni vuki tani kina ki vei ira na veikalou tani ka qaravi ira, au sa tukuna rawa vei kemuni edaidai, ni o ni na vakarusai vakaidina.

²⁰ Me vaka na nona vakarusai ira na veimatanitu tani o Jiova e matamuni, ena vakarusai kemuni talega vakakina o Jiova kevaka o ni na talaidredre ki na nona vosa.