Vakarua 6 - Vakavakadewa Vou kei na iVola tale eso

Na i Vunau Levu

¹ Sai koya na i vunau kece ka vakarota vei au o Jiova na nomuni Kalou, me'u vakatavulica vei kemuni mo ni muria ena vanua o ni sa vakarau la'ki taukena mo ni tawana,

² me rawa kina vei kemuni, na luvemuni kei na makubumuni; mo ni rerevaki Jiova na nomuni Kalou, ena veisiga kece ni nomuni bula ka muria na nona lawa kei na nona i vunau kece ka'u sa vakarota vei kemuni me rawa ni dede kina na nomuni bula.

³ O koya oqo kemuni na Isireli, mo ni vakarorogo ka talairawarawa kina. Ena qai vinaka mai na ka kecega vei kemuni, ka o ni na yaco me matanitu levu, ka taukena na vanua vinaka sa dave kina na sucu kei na oni, me vaka sa yalataka o Jiova na nodra Kalou na nomuni qase.

⁴ Ni rogoca, oi kemuni na Isireli: O Jiova na noda Kalou, o Jiova sa duabau ga.

⁵ Mo ni lomani Jiova na nomuni Kalou ena yalomuni taucoko, ena lomamuni taucoko, kei na nomuni kaukauwa taucoko.

⁶ Mo ni kakua sara ni guilecava na i vunau kece au sa vakaroti kemuni kina edaidai.

⁷ Vakavulica oqo vei ira na luvemuni. Tokaruataka tale ni o ni sa tiko ena nomuni vale, se, ni o ni sa tiko tani, ena gauna ni nomuni vakacegu kei na gauna ni nomuni cakacaka.

⁸ Ni vesuka e ligamuni ka tokara e yadremuni; oqo me i vakatakilakila se dau veivakananumi vei kemuni.

⁹ Mo ni vola ena veiduru ni katuba ni nomuni vale kei na nomuni matamata ni bai.

Na i Vakaro me Baleta na Talaidredre

¹⁰ “Me vaka a yalataka o Jiova na nomuni Kalou vei ira na nomuni qase, vei Epara-ama, Aisake kei Jekope ni na solia vei kemuni e dua na vanua e tu na kena veikoro lelevu ka vutuniyau o ni a sega ni tara.

¹¹ Na kena veivale era sinai ena veika vinaka o ni a sega ni biuta kina, ka ra tu na kena veikeliwai o ni a sega ni kelia; na kena veivaini kei na veiolive o ni a sega ni tea. Sa na kauti kemuni o Jiova ki na vanua o ya, ka sa tu kina na veika kece o ni via kania,

¹² ni qarauna sara mo ni kakua ni guilecavi Jiova, o koya ka a vakabulai kemuni mai na vanua o Ijipita, na vanua o ni a vakabobulataki tu kina.

¹³ Mo ni rokovi Jiova na nomuni Kalou ka qaravi koya duadua ga, ka vakayacora na nomuni vosa ni yalayala kecega ena yacana.

¹⁴ Kakua ni muri ira na kalou tani, na nodra kalou na tamata era tu wavoliti kemuni,

¹⁵ baleta ni o Jiova na nomuni Kalou ka sa tiko kei kemuni, sa Kalou vuvu. Na nona cudru waqawaqa ena vagolea vei kemuni ka na vaqeyavutaki kemuni mai na dela i vuravura.

¹⁶ “Mo ni kakua ni vakatovolei Jiova na nomuni Kalou me vaka o ni a cakava mai Masa.

¹⁷ Mo ni muria vakavinaka sara na i vunau i Jiova na nomuni Kalou, na nona i vakaro kei na nona lawa.

¹⁸ Ni cakava na veika sa dodonu ka vinaka ena mata i Jiova, ka o ni na qai vinaka kina. Ena qai taukeni na vanua vinaka sa yalataka o Jiova vei ira na nomuni qase,

¹⁹ ka o ni na vakasavi ira tani na kemuni meca me vaka sa yalayala kina o Jiova.

²⁰ “Ena gauna mai muri era na tarogi kemuni na luvemuni, ‘Na cava sa vakarota kina o Jiova na noda Kalou me da talairawarawa ki na i vunau kece oqo?’

²¹ Mo ni qai tukuna vei ira, ‘Keimami a bobula tu vua na tui Ijipita, sa qai sereki keimami mai o Jiova ena nona kaukauwa levu.

²² Keimami a raica sara ga ena mata i keimami ni a cakava o Jiova na veika mana, kei na veika veivakurabuitaki lelevu ka rerevaki vei ira na kai Ijipita, ka vakakina vua na nodra tui kei ira kece na nona vakailesilesi.

²³ A sereki keimami mai Ijipita me kauti keimami mai ka solia vei keimami na vanua oqo me vaka sa yalataka vei ira na neimami qase.

²⁴ A sa qai vakarota vei keimami o Jiova me keimami muria na lawa kece sara ka dokai koya. Kevaka eda sa vakayacora vakakina, ena qai wanonova matua na noda vanua ka vakayacora me vuavuai tikoga.

²⁵ Kevaka keimami muria vakavinaka na i vunau kecega oqo ena mata i Jiova na noda Kalou, me vaka sa vakarota vei keda, eda na vakadonui.