Vakarua 34 - Vakavakadewa Vou kei na iVola tale eso

Na Mate nei Mosese

¹ A sa cabe cake o Mosese mai na veibuca kei Moapi ki na Ulunivanua o Nipo, ka yacova na tikina cecere e Ului Pisika, ena tokalau kei Jeriko. A vakaraitaka vua o Jiova mai kea na vanua taucoko mai Kiliati me yaco sara ki Tani,

² na vanua taucoko o Navitalai na vanua i Ifereimi kei Manasa, na vanua i Juta me yaco sara ki na Wasa Meditereni;

³ na ceva kei Juta kei na buca me yaco sara ki Jeriko, na koro ni veiloga niusawa.

⁴ A qai kaya o Jiova vei Mosese, “Sai koya oqo na vanua au a yalataka vei Epara-ama, kei Aisake, kei Jekope me'u solia vei ira na nodratou kawa. Au sa na solia wale ga mo raica, ia o na sega ga ni lako takoso mo yaco kina.”

⁵ A mate mai kea o Mosese; ena vanua o Moapi me vaka na ka a kaya o Jiova.

⁶ A qai buluti koya mai kea o Jiova ena buca mai Moapi veidonui kei na koro o Peci-piori. Ia me yacova mai edaidai, e sega ni dua e kila na vanua dina sa bulu kina.

⁷ A sa 120 na yabaki i Mosese ena gauna sa mate kina; ia na i tuvaki ni yagona se kaukauwa vinaka tu ka rai vakavinaka tu na matana.

⁸ Era a tagicaki Mosese na Isireli ena buca mai Moapi me tolusagavulu na siga. Sa qai mudu na nodra vakaloloku ni oti o ya.

⁹ Ia o Josua na luve i Nuni sa sinai ena yalomatua ka ni a digitaki koya o Mosese me kena i sosomi. Era a talairawarawa na Isireli vei Josua ka muria na i vakaro i Jiova ka solia vei ira o Mosese.

¹⁰ Me tekivu mai na gauna o ya, a sega ni bau dua tale na parofita e Isireli me vakataki Mosese ni a veivosaki kei Jiova ni rau sa veirai mata.

¹¹ A sega talega ni dua na parofita me cakava na veika mana ka veivakurabuitaki me vaka sa cakava o Mosese, ni a talai koya o Jiova vua na tui Ijipita, vei ira na nona vakailesilesi kei na nona vanua taucoko.

¹² A sega talega ni dua na parofita me cakava rawa na veika lelevu ka vakarerevaki me vaka sa cakava o Mosese ena matadra kecega na Isireli.