Vakarua 32 - Vakavakadewa Vou kei na iVola tale eso

¹ “I vuravura kei lomalagi, drau rogoci au mai, ka vakatudaliga ki na noqu vosa.

² Ena mirimiri me vaka na mata ni uca na noqu i vakavuvuli, ka tau me vaka na tegu ki na dela i vuravura na noqu vosa; me vaka na uca mirimiri ki na dela ni co, ka vaka na uca tau bi ki na kau e se qai tubu cake.

³ Au na vakacaucautaka na yaca i Jiova, ka ra na tukuna na tamata na nona cecere.

⁴ “Sa nomuni i sasabai kaukauwa o Jiova, ka sa uasivi sara ka dodonu na nona sala kecega; Sa yalodina ka dauvosa vakadodonu na nomuni Kalou, ka sa vakayacora na cakacaka dodonu ka savasava.

⁵ Ia, o kemuni ga sa sega ni yalodina ka cakacaka lasu, ka sa sega ni kilikili mo ni okati me nona tamata, ni o ni sa kawa tamata dauveivakaisini ka i valavala ca.

⁶ O koya li oqo na sala mo ni qaravi Jiova kina, oi kemuni na yavu tamata lialia ka yalowai? Sai koya ga na tamamuni, na Dauniveibuli ka buli kemuni, ka sa vakavuna mo ni yaco me dua na matanitu.

⁷ “Ni nanuma na gauna sa oti, na gauna e liu sara; tarogi ira na tamamuni me ra tukuna vei kemuni na ka sa yaco, tarogi ira na qase me ra talanoataka na gauna sa sivi.

⁸ O Koya sa Cecere Sara sa solia ki na veimatanitu na nodra vanua, ka sa lewa na i yalayala ni vanua me tawani me vaka na i wiliwili ni luve i Isireli.

⁹ Ni sai votavota i Jiova o ira na nona tamata, sa wasei tani o Jekope me nona.

¹⁰ “A sa kunei ira ni ra veilakoyaki voli ena vanua dravuisiga, ena vanua lala ka liwavi cagi. A sa taqomaki ira ka qaravi ira vinaka, ka sa maroroi ira me vaka na loa ni matana.

¹¹ Me vaka na ikeli sa vakavulica na luvena me vuka, ka sa ciqomi koya vinaka tale ni sa tevuka na tabana, sa vakakina na veimaroroi i Jiova me kakua ni bale sobu o Isireli.

¹² O Jiova vakaikoya sa liutaki ira na nona tamata; ka sa sega ni vukei mai vua na kalou tani.

¹³ “Sa solia vei ira me ra lewa na vanua veidelana, ia me ra kania na veika bula ena loma ni vanua. Era sa kunea na oni ni veikau ena maliwa ni veivatu; na nodra veiolive era tubu ga vakaveitalia ena qele veivatu.

¹⁴ Sa levu na sucu e rawa mai na nodra me kei na bulumakau, era taukena na sipi, me kei na bulumakau vinaka duadua, na witi uasivi kei na waiwai vinaka sara.

¹⁵ “Era sa vutuniyau na tamata i Jiova, ka viavialevu; era sa levulevu ka sinai ena kakana. Era sa biuta na Kalou ka buli ira ka vakanadakuya na nodra i vakabula.

¹⁶ Na nodra qaravi kalou tani sa loma vuvu kina o Jiova; na nodra i tovo vakasisila sa vakavuna me cudru.

¹⁷ Era sa vakacaboisoro ki na veikalou lasu, na veikalou era a sega ni bau kila o ira na nodra qase, na veikalou ka sega ni bau rokovi e Isireli.

¹⁸ Era sa guilecava na nodra Kalou, ka i vakabula, o koya sa solia vei ira na bula.

¹⁹ “Ni sa raica na ka oqo o Jiova, a sa cudru ka besetaki ira na luvena tagane kei na yalewa.

²⁰ A sa kaya, ‘Au na sega tale ni vukei ira, ia ka'u na qai raica se na cava ena yacovi ira, o ira na tamata dauveivakaisini ka yalo kaukauwa.

²¹ Era sa vakacudrui au ena vuku ni nodra matakau, ka'u sa vuvutaki ira na nodra veikalou eso, na kalou era sa sega ni kalou vakaidina. Ia ka'u na lesia ena dua matanitu me vakacudrui ira; ka'u na vakavuna me ra dauvuvu vata kei na dua na matanitu lecaika.

²² Na noqu cudru ena caudre vaka na bukawaqa ka vakama na veika kecega e vuravura. Ena yaco sara ki na vuravura e ra, ka vakama na yavu ni veiulunivanua.

²³ “Au na kauta mai vei ira vakaveitarataravi na leqa ka vakaotia vei ira na noqu gasau ni dakaititi.

²⁴ Era na mate ena viakana kei na katakata; era na mate mai na veimate vakarerevaki. Ka'u na tala na manumanu kila me vakasasataki ira, kei na gata batigaga me kati ira.

²⁵ Na i valu ena vakavuna na mate ena veitolo ni sala; a veika vakadomobula ena ravuravu ena veimatavuvale. Era na mate kece na goneyalewa kei na gonetagane; ka sega ni vakuai kina na gonelalai se o ira na qase.

²⁶ Sa rawa vei au me'u vakarusai ira vakadua sara, me kakua kina ni dua tale e nanumi ira.

²⁷ Ia au sega ni vinakata me ra dokadoka kina na nodra meca, ni ra kaya ni ra sa vakadrukai ira na noqu tamata, ka ni sai au ga ka a vakamalumalumutaki ira.’

²⁸ “O Isireli e dua na matanitu sa sega tu ni macala; sa sega na yalomatua e tu vei ira.

²⁹ Era sega ni raica rawa na vu ni nodra vakadrukai; era sa sega ni kila rawa na i balebale ni veika sa yaco.

³⁰ A cava na vuna sa vakadrukai kina na udolu mai na lewe dua, kei na 10,000 mai na lewe rua wale ga? O Jiova, na nodra Kalou, sa biuti ira; na nodra Kalou qaqa sa soli ira yani.

³¹ Era sa kila na nodra meca ni ra kalou malumalumu na nodra veikalou, sa sega ni kaukauwa me vakataka na Kalou ni Isireli.

³² O ira na nodra meca, era sa ca me vakataki Sotoma kei Komora, era sa vaka na vunivaini sa vuataka na qerepi gaga ka rawa ni veivakamatei,

³³ me vaka na waini sa caka mai na weli gaga ni gata.

³⁴ “Sa kila o Jiova na ka era sa cakava na kedra meca; ka sa waraka na gauna dodonu me totogitaki ira kina.

³⁵ O Jiova ena qai sausaumi lesu ka totogitaki ira; ena yaco na gauna me ra na bale sobu; na gauna ni nodra rusa sa toro voleka.

³⁶ O Jiova ena vueti ira na nona tamata ni sa raica ni sa oti na nodra kaukauwa. Ena yalololoma vei ira era sa qaravi koya, ni sa raica na nodra yalomalumalumu.

³⁷ Ia, ena qai tarogi ira na nona tamata o Jiova, ‘Sa evei na veikalou kaukauwa o ni a dauvakararavi kina?

³⁸ O ni a vakani ira ena uro ni nomuni i soro ka vakacabora vei ira na waini me ra gunuva. Me ra lako mada mai oqo ka vukei kemuni; me ra kusa mai ka vueti kemuni.

³⁹ “ ‘Oi au, sai au duadua ga na Kalou; sa sega tale ni dua na kalou dina. Au sa vakavuna na mate ka'u sa solia na bula, Au sa vakavuna na mavoa ka'u sa vakamavotaka na mavoa; ka sa sega e dua me na vorati au rawa.

⁴⁰ Me vaka ni sai au dina ga na Kalou bula. Au sa laveta na ligaqu ka yalataka

⁴¹ ni'u na vagatara na noqu i seleiwau taliva, ka raica me vakayacori na lewa dodonu. Au na sauma lesu vei ira na kequ meca ka totogitaki ira era sa cati au.

⁴² Na noqu gasau ni dakaititi ena tuturu mai kina na nodra dra kei na noqu i seleiwau ena vakamatei ira kece sa saqati au. Au na sega ni vakabula e dua sa valuti au; o ira mada ga sa mavoa kei na kaivesu era na mate.’

⁴³ “Oi kemuni na veimatanitu, ni vakacaucautaki ira na tamata i Jiova, ni sa cudruvi ira kece sa ia na veivakamatei. Sa ia na sausaumi lesu o koya vei ira na kena meca, ka sa vosota na nodra caka cala na nona tamata.”

⁴⁴ E rau a qai cavuta na qaqa ni sere oqo o Mosese kei Josua na luve i Nuni, me rawa ni ra rogoca kece na Isireli.

Otioti ni Vakasala i Mosese

⁴⁵ Ni sa tukuna oti kece na vosa ni Kalou vei ira na Isireli o Mosese,

⁴⁶ a sa qai kaya, “Qarauna vinaka sara mo ni muria na i vakaro au sa solia vei kemuni edaidai. Vakatavulica vei ira na luvemuni me ra qarauna vinaka talega, me ra muria ena yalodina na vosa ni Kalou.

⁴⁷ Sa sega ni vosa wale ga na veivosa oqo; ia, sa vosa mo ni bula kina. Mo ni muria me balavu kina na nomuni bula ena vanua o ni sa lako tiko kina ena tai kadua ni Joritani ka o ni sa vakarau la'ki tawana.”

Tukuni Taumada na Mate i Mosese

⁴⁸ Ena siga vata ga o ya a kaya kina vei Mosese o Jiova,

⁴⁹ Mo cabeta cake mada na tokaitua na Aparimi, ena vanua o Moapi, donuya na koro o Jeriko. Kabata na Ulunivanua o Nipo ka rai yani ki na vanua o Kenani, na vanua au sa vakarau solia vei ira na Isireli.

⁵⁰ O na mate ena ulunivanua o ya me vaka na mate i Eroni na tuakamu mai na Ulunivanua o Ori,

⁵¹ baleta ni drau a sega ni dinati au, ena matadra na Isireli, ena wai mai Meripa volekata na koro o Katesi ena vanua lala o Sini, drau a sega ni vakarokorokotaki au ena matadra na tamata.

⁵² O na raica tu ga yani vakayawa na vanua au sa solia vei ira na Isireli, ia o na sega ga ni yaco kina.