Vakarua 31 - Vakavakadewa Vou kei na iVola tale eso

Sosomitaki Mosese o Josua

¹ A vakuria o Mosese na nona vosa vei ira na Isireli,

² ka kaya, “Au sa yabaki 120 edaidai, ka sa sega soti ni rawarawa vei au me'u veiliutaki tikoga. Sa kaya talega vei au o Jiova ni'u na sega ni lako yani ki na tai kadua ni Joritani.

³ Ia o Jiova na nomuni Kalou ena liu e matamuni me vakarusai ira na veimatanitu era tu e kea, me na rawa kina vei kemuni mo ni la'ki tawana na nodra vanua; ia o Josua ena liutaki kemuni, me vaka sa tukuna o Jiova.

⁴ Ena cakava vei ira na veimatatamata oqo o Jiova na ka vata ga sa cakava vei Sioni kei Oki, na nodra tui na Amoraiti, ni a vakarusa na nodra vanua.

⁵ Ena solia na qaqa o Jiova vei kemuni mo ni rawai ira, ia mo ni cakava vei ira na veika kece sara au a tukuna vei kemuni.

⁶ Mo ni kaukauwa ka qaqa. Ni kakua ni rerevaki ira na veimatatamata oqo. O Jiova na nomuni Kalou ena tiko kei kemuni. Ena sega ni laivi kemuni se biuti kemuni.”

⁷ A qai kacivi Josua mai o Mosese ka mai vosa vua ena matadra kecega na Isireli, “Mo kaukauwa ka qaqa; ni sai iko o na liutaki ira na tamata oqo mo ni la'ki tawana na vanua sa yalataka o Jiova vei ira na nodra qase.

⁸ Ena liutaki iko o Jiova ka na tiko vata kei iko. Ena sega ni laivi iko se biuti iko. Mo kakua sara ni rere se yalolailai.”

Na Lawa me Dauwiliki ena Veiyabaki Vitu

⁹ A sa qai vola o Mosese na Lawa ni Kalou ka solia vei ira na bete, kei ira na Livai era colata tiko na Kato ni Veiyalayalati i Jiova, vata kei ira na nodra qase na Isireli.

¹⁰ A sa qai vakaroti ira o Mosese ka kaya, “Ena i kavitu kece ni yabaki ni sa yaco mai na yabaki ni veisereki me dau bokoci kina na dinau mo qai wilika vakadomoilevu ena Solevu ni Valetabanikau.

¹¹ Mo ni wilika vei ira na Isireli na lawa ni Kalou oqo ni ra sa lako mai me ra mai lotu ena vanua sa dauqaravi duadua ga kina na Kalou.

¹² Mo ni qai soqoni ira vata kece mai na tagane, na yalewa, na gone kei ira na vulagi era tiko ena nomuni veikoro, me ra mai rogoca kina na tamata kecega me ra vulica me ra rerevaki Jiova na nomuni Kalou, ka muria na nona lawa kece ena yalodina.

¹³ Ena sala oqo era na rogoca kina na lawa i Jiova na nomuni Kalou, o ira na luvemuni era a sega ni bau rogoca vakadua. Era na qai vulica kina me ra rerevaki Jiova ena gauna kecega era tiko kina ena vanua o ni sa vakarau la'ki tawana ena tai ka dua ni Joritani.”

Otioti ni Vakasala i Jiova vei Mosese

¹⁴ A qai kaya vei Mosese o Jiova, “Sa toro voleka mai na gauna mo mate kina. Kacivi Josua ka kauti koya mai ki na Vale ni Veitavaki me'u vakaroti koya ena vuku ni tavi oqo.” E rau a lako yani o Mosese kei Josua ki na Vale ni Veitavaki,

¹⁵ sa qai rairai vei rau mai kea o Jiova ena duru o ka mai tu ena katuba ni vale tabu.

¹⁶ A qai kaya vei Mosese o Jiova, “Raica, sa toro voleka mai na gauna ni nomu mate, ka ra na sega ni dinati au na tamata oqo ena gauna o sa mate kina, ka voroka na veiyalayalati au sa vakayacora vata kei ira. Era na biuti au ka qaravi ira na veikalou tani ni vanua era sa vakarau la'ki tawana.

¹⁷ Ni sa yaco oqo, au na cudruvi ira ka biuti ira, ka ra na qai vakarusai. Ena yacovi ira e vuqa na leqa rerevaki, ka ra na vakila ni sa yaco vei ira na veika oqo baleta ni'u sa sega ni tiko vata kei ira, oi au o Jiova, na nodra Kalou.

¹⁸ Au na vunitaki au mai vei ira ena siga o ya baleta ni ra sa cakava na veika ca ka qaravi ira na veikalou tani.

¹⁹ “Ia mo vola mada na sere oqo. Vakavulica na sere vei ira na Isireli, ka me noqu i vakadinadina me'u beitaki ira kina.

²⁰ Au na kauti ira ki na vanua sa dave kina na sucu kei na oni, me vaka au a yalataka vei ira na nodra qase. Era na la'ki kania e kea na kakana kecega era via kania, ka ra na tiko vakacegu. Ia era na qai vuki tani ka qarava na veikalou tani. Era na biuti au ka voroka na noqu veiyalayalati,

²¹ ka na yacovi ira e vuqa na leqa rerevaki. Ia na sere oqo ena lagati voli ga, ka me kena i vakadinadina vei ira. Ia oqo, ni se bera ni'u kauti ira ki na vanua au sa yalataka me'u solia vei ira, au sa kila rawa tu na veika era sa nakita tiko.”

²² Ena siga vata tikoga o ya, sa vola kina o Mosese na sere, ka vakavulica talega vei ira na Isireli.

²³ A sa qai vosa vei Josua na luve i Nuni o Jiova, “Mo kaukauwa ka qaqa. O na liutaki ira na Isireli ki na vanua au sa yalataka vei ira, ia au na tiko vata ga kei iko.”

²⁴ A sa vola o Mosese na Lawa ni Kalou ena dua na i vola, ka sa qarauna matua me kakua ni yali e dua na ka.

²⁵ Ni sa oti o ya, a sa qai vakaroti ira na Livai era dau colata na Kato ni Veiyalayalati, ka kaya,

²⁶ “Mo ni kauta na i vola ni Lawa ni Kalou oqo ka la'ki biuta ena yasa ni Kato ni Veiyalayalati i Jiova na nomuni Kalou; ka me tiko ga e kea me i vakadinadina ni nodra beitaki na nona tamata.

²⁷ Au sa kila na nomuni yalokaukauwa kei na nomuni vakadrecike, kevaka era sa vakadrecike vei Jiova ena gauna au sa bula tiko kina, sa na qai levu cake sara na nodra vakadrecike ena gauna au sa mate kina.

²⁸ Soqoni ira vata kece mai na i liuliu ni nomuni veimataqali kei ira na vakailesilesi ki mataqu, me'u tukuna vei ira na veika oqo. Ena noqu i vakadinadina ena nodra beitaki o vuravura kei lomalagi.

²⁹ Au sa kila ni ra na yaco me ra ca sara ka biuta na ka au a vakatavulica vei ira ena gauna au sa mate kina. Ia e muri era na sota kaya na leqa baleta ni ra vakacudrui Jiova ena vuku ni nodra vakatara na ka e sa vakatabuya.”

Na Sere i Mosese

³⁰ A qai cavuta o Mosese na qaqa ni sere taucoko, ka ra sa vakarorogo na Isireli.