Vakarua 3 - Vakavakadewa Vou kei na iVola tale eso

Vakadrukai o Oki na Tui Pasani

¹ “Ni oti o ya eda a vuki ka lako cake yani ena sala vaka ki Pasani. A qai lako mai o Oki na tui Pasani kei ira kecega na nona tamata ka mai vala vata kei keda ena koro o Etirei.

² Ia a qai kaya vei au o Jiova, “Mo kakua ni rerevaki koya, ni'u na soli koya, kei ira na nona tamata, kei na nona vanua taucoko vei iko. Mo cakava vua na ka vata ga o a cakava vei Sioni na nodra tui na Amoraiti ka tiko mai Esiponi.”

³ “A qai soli Oki talega na tui Pasani kei ira na nona tamata kecega o Jiova na noda Kalou ki na ligada; ia eda a qai vakamatei ira kece sara.

⁴ Ena gauna vata talega o ya keimami a tara kina na nona veikoro kece sara, a sega tale ni dua na koro me keimami sega ni taura mai vei ira. A onosagavulu kece na levu ni koro, ena yasayasa kece vaka-Arikopi, na matanitu nei Oki, na tui Pasani.

⁵ Na veikoro kece oqo era vakabai cecere sara, ka ra vakamatamata, ka kaukamea na kena i sogo. A vuqa talega na koro era sega ni vakabai.

⁶ Eda a vakarusa na nodra veikoro kece sara ka vakamatei ira kece sara na tagane, yalewa kei ira na gone, me vaka eda a cakava ki na veikoro kece nei Sioni na tui Esiponi.

⁷ Ia eda a kauta na nodra manumanu kei na i yau kece ena nodra veikoro.

⁸ “Ia ena gauna o ya eda a taura mai kina vei rau na nodra tui na Amoraiti, na vanua ena tokalau ni Joritani, me tekivu mai na bucabuca ni Arinoni me yaco sara ki na Ulunivanua o Erimoni.

⁹ (Era vakatoka na Ulunivanua o Erimoni na kai Saitoni me yacana o Sirioni, ia era vakatoka na Amoraiti me yacana o Siniri.)

¹⁰ Eda a taura na vanua kece nei Oki na tui Pasani: na veikoro e delana, na yasayasa kece vaka-Kiliati kei Pasani me yaco sara ki na koro e rua o Salika kei Etirei.”

¹¹ (A sa qai vo taudua voli ga o Oki na tui Pasani vei ira na vo-ni-bula ni Refaimi. Na nona kisinimate, sa buli ena vatu, e va na mita na kena balavu, ka volekata na rua na mita na kena raba. E se rawa ni raici na yavu ni vatu oqo e Rapa, e dua na nodra koro levu na luve i Amoni.)

Yavusa e Tauyavu ena Tokalau ni Joritani

¹² “Me baleta na vanua eda a taukena ena gauna o ya, au a wasea ki na yavusa i Rupeni kei Kata na vanua ena vualiku me tekivu mai na koro o Aroeri volekata na Uciwai na Arinoni kei na dua na tiki ni vanua veidelana o Kiliati vata kei na kena veikoro.

¹³ Au a wasea ki na veimama ni yavusa i Manasa na vo ni vanua o Kiliati, kei na vanua taucoko o Pasani, na matanitu nei Oki, o ya na yasayasa kece vaka-Arikopi.” (Na vanua kece o Pasani a kilai tu ni nodra vanua na Refaimi.

¹⁴ O Jairi, mai na mataqali i Manasa, a sa taura na vanua kece vaka-Arikopi, o ya o Pasani, me yaco sara ki na nodra i yalayala na luve i Kisuri kei Meka. A sa vakatoka na kena veikoro me yacana o Avevoci Jairi me yacova mai edaidai.)

¹⁵ “Au a soli Kiliati vei ira na Mekiri ena yavusa i Manasa.

¹⁶ Au sa wasea ki na yavusa i Rupeni kei Kata na vanua me tekivu sara mai Kiliati ki na Uciwai na Arinoni. Na veimama ni uciwai me i yalayala ena ceva ka yaco sara ki na i yalayala ena vualiku ni uciwai na Japoki, na nodra i yalayala na luve i Amoni.

¹⁷ Na nodra i yalayala ki ra a yaco sara ki na uciwai na Joritani. Me tekivu sara mai na drano o Kalili mai na vualiku me yaco sara ki na Waitui Mate ena ceva; a yaco ki na ruku ni Ulunivanua o Pisika ki na tokalau.

¹⁸ Ena gauna talega o ya, au a solia kina vei ira na i vakaro oqo: “Sa solia vei kemuni na vanua oqo ena tokalau ni Joritani o Jiova na nomuni Kalou, mo ni taukena. Ia oqo mo ni vakaiyaragitaki ira na nomuni tamata ni vala ka talai ira yani ki na tai kadua ni Joritani, liutaki ira yani na Isireli, ka vukei ira me ra taukena na nodra vanua.

¹⁹ Ia o ira ga na watimuni, luvemuni, kei na nomuni manumanu, (au kila ni sa levu sara na nomuni manumanu,) me ra tiko ga mai ena veikoro au a solia oti vei kemuni.

²⁰ Mo ni vukei ira na wekamuni me ra tawana na vanua sa solia tiko vei ira o Jiova ena ra ni uciwai na Joritani me yacova sara ni sa solia o Jiova me ra tiko vakacegu. Ni oti o ya sa qai rawa mo ni lesu tale mai ki ke, na vanua au sa wasea oti vei kemuni.”

²¹ Au a qai vakaroti Josua: “O sa raica na veika kece sa cakava o Jiova na nomu Kalou vei rau na tui, o Sioni kei Oki; ena cakava talega vakakina o koya ki na veimatanitu kecega o ni na la'ki valuta.

²² Mo kakua ni rerevaki ira, ka ni na vala ena vukumuni o Jiova na nomuni Kalou.”

²³ Ena gauna o ya au a masu vagumatua ka kaya,

²⁴ “Kemuni Jiova na Kalou cecere, au kila ni o ni sa vakaraitaka vei au na i tekivu wale ga ni veika lelevu ka veivakurabuitaki o ni sa vakarau cakava. Sa sega tale ni dua na kalou mai lomalagi, se, e vuravura me vakayacora rawa na veika lelevu o ni sa cakava.”

²⁵ Mo ni vakatara mada Jiova me'u kosova na uciwai na Joritani ka raica na vanua bulabula ena tai kadua, na kena vanua veidelana rairai vinaka kei na veiulunivanua e Lepanoni.”

²⁶ Ia a cudruvi au o Jiova ena vukumuni ka sega ni rogoci au. A sa kaya ga vei au, “Sa rauta mada! Kua tale ni tukuna vei au na ka oqori!

²⁷ Lako cake ki na dela ni Ulunivanua o Pisika ka rai yani vaka ki na vualiku, na ceva, ka rai vaka ki na tokalau ka vakakina ki na ra. Raica vakavinaka na veika o raica baleta ni o na sega ni takosova na uciwai na Joritani.

²⁸ Ia mo vakaroti Josua, ia mo vakayaloqaqataki koya ka vakaukauwataka, baleta ni sai koya ena liutaki ira yani na tamata ki na tai kadua me ra tawana na vanua o na sarava.”

²⁹ O koya oqo eda sa mani mai tiko ga yani ena bucabuca ka toka veibasai kei na koro o Peci Piori.