Vakarua 29 - Vakavakadewa Vou kei na iVola tale eso

Nona Veiyalayalati o Jiova kei Isireli

¹ Sai koya oqo na vosa ni veiyalayalati sa vakarota vei Mosese o Jiova me cakava vata kei ira na Isireli ena vanua o Moapi. Oqo e i kuri ni veiyalayalati sa cakava o Jiova vata kei ira ena Ulunivanua o Saineai.

² A qai kacivi ira vata mai na tamata o Mosese, ka kaya vei ira, O ni a raica e matamuni na veika kece sa cakava o Jiova vua na tui Ijipita, kei ira na nona vakailesilesi ka vakakina ki na nona matanitu taucoko.

³ O ni a raica na mate vakarerevaki, na cakacaka mana eso, kei na ka veivakurabuitaki sa cakava o Jiova.

⁴ Ia me yacova mai edaidai o ni sa bera ga ni vuli rawa mai na veika o ni a sota kaya.

⁵ Ena loma ni vasagavulu na yabaki sa kauti kemuni voli mai kina o Jiova ena loma ni vanua lala ka sega ni vuca na nomuni sulu, se ca na nomuni i vava.

⁶ E a sega na kakana mo ni kania, ka sega na waini se na gunu kaukauwa mo ni gunuva, ia sa solia o Jiova na veika o ni sa gadreva — mo ni kila kina ni sai koya ga na nomuni Kalou.

⁷ Ni o ni sa yaco mai ki na vanua oqo, e rau a lako mai o Sioni na tui Esiponi kei Oki na tui Pasani me rau vala kei keda. Ia eda a vakadrukai rau,

⁸ ka taura na nodrau vanua ka wasea vei rau na mataqali i Rupeni kei Kata kei na veimama ni mataqali i Manasa.

⁹ Qarauna mo ni vakayacora na vosa kece ni veiyalayalati oqo, mo ni na toro cake kina ena veika kece o ni cakava.

¹⁰ E daidai o ni sa tucake kece tu ena mata i Jiova na nomuni Kalou; o ira na i liuliu ni nomuni veimataqali, na nomuni qase, na nomuni vakailesilesi kei ira kece na tagane e Isireli.

¹¹ O ira na luvemuni, yalewa kei ira na vulagi era tiko kei kemuni me ra dau ta nomuni buka, se taki memuni wai.

¹² O ni sa tu eke edaidai mo ni curu ki na veiyalayalati oqo sa cakava o Jiova na nomuni Kalou vata kei kemuni, ka colata na kena i tavi.

¹³ Me qisi kemuni edaidai mo ni nona tamata ka yaco o koya me nomuni Kalou me vaka a yalataka vei kemuni ka bubului kina vei ira na nomuni qase, vei Epara-ama, Aisake, kei Jekope.

¹⁴ Sa sega ni o kemuni wale ga ka tu eke sa cakava kina o Jiova na veiyalayalati oqo kei na kena i tavi.

¹⁵ Ia sa cakava vata kei keda kece eda tu eke edaidai kei ira talega na noda kawa era na qai tubu mai muri.

¹⁶ O ni sa kila na i vakarau ni bula mai Ijipita, kei na i vakarau ni bula ena noda lakova mai na nodra vanua na veimatanitu tani.

¹⁷ O ni a raica na nodra veimatakau vakasisila sa caka mai na kau, vatu, siliva kei na koula.

¹⁸ Mo ni qarauna vinaka me kakua ni dua na tagane, se yalewa, se vuvale, se dua na mataqali e tu eke edaidai me na gole tani mai vei Jiova na noda Kalou ka qarava na nodra veikalou na veimatanitu tani. Na ka oqo ena vaka e dua na wakanikau sa tubu cake me yaco me vuataka na vuanikau gaga.

¹⁹ Mo ni qarauna me kakua ni dua e tu eke edaidai ka rogoca na veika e vinakati ena veiyalayalati oqo, me vakadinata e lomana. Na ka oqo ena vakarusai kemuni taucoko na tamata dodonu se tamata i valavala ca.

²⁰ Ena sega ni vosota o Jiova na tamata vaka o ya. Ia ena yacovi koya na cudru waqawaqa i Jiova ka na yacovi koya na veika caca kecega sa volai ena i vola oqo me yacova ni sa vakarusai koya vakadua o Jiova.

²¹ Ena cakava vua na tamata o Jiova me i dusidusi vei ira na mataqali kecega e Isireli, ka vakatauca vua na vosa ni cudru kecega ka sala vata kei na veiyalayalati a volai ena i vola ni vakavuvuli i Jiova.

²² Ena veitabatamata e muri, era na raica na luvemuni kei ira na vulagi era lako mai na veivanua yawa, na veimate ca kei na veileqa rerevaki ena kauta mai o Jiova ki na nomuni vanua.

²³ Ena mamaca na vanua taucoko ka ubia na sulifure kei na masima, ena sega ni dua na ka e tei rawa kina. Na co mada ga ena sega ni bula rawa kina. Na nomuni vanua ena vakataki Sotoma kei Komora, Atima kei Sepoimi, na vanua sa vakarusa o Jiova ena nona cudru katakata.

²⁴ Era na qai taroga na veimatanitu kecega ka kaya, ‘Na cava sa vakayacora kina na veika oqo ki na nodra vanua o Jiova? Na cava na vu ni nona cudru vakalevu?’

²⁵ Era na qai kaya na tamata, ‘E baleta ni ra sa sega ni maroroya na veiyalayalati ka cakava vata kei ira o Jiova na Kalou ni nodra qase ena gauna sa kauti ira tani mai kina mai Ijipita.

²⁶ Era a qarava na veikalou tani era a sega ni qarava e liu, na veikalou sa vakatabuya o Jiova me ra qarava.

²⁷ A sa qai cudruvi ira na nona tamata o Jiova ka kauta mai ki na nodra vanua na veileqa kecega sa volai ena i vola oqo.

²⁸ A sa qai tubu cake ga na cudru i Jiova, ka sa cavuraki ira tani kina mai na nodra vanua ena dela ni nona cudru waqawaqa ka viritaki ira yani ki na dua na matanitu tani, ka ra sa tiko voli kina edaidai.’

²⁹ “E tu talega eso na ka vuni sa sega ni vakaraitaka o Jiova na noda Kalou, ia sa vakaraitaka na nona lawa, ia o keda kei ira na noda kawa me da talairawarawa kina ka tawa mudu.