Vakarua 28 - Vakavakadewa Vou kei na iVola tale eso

Na Veivakalougatataki ni Talairawarawa

¹ “Kevaka o ni talairawarawa vei Jiova na nomuni Kalou, ka muria ena yalodina na nona i vunau kece, au sa vunauci kemuni kina edaidai, ena cakava o koya mo ni cecere duadua mai vei ira na veimatanitu kecega e vuravura.

² Mo ni talairawarawa vei Jiova na nomuni Kalou me nomuni kina na veivakalougatataki kece oqo:

³ “O Jiova ena vakalougatataka na nomuni veikoro kei na nomuni vanua.

⁴ “O Jiova ena vakalougatataki kemuni me vuqa na luvemuni, ka me levu na nomuni vua ni qele, na nomuni bulumakau kei na sipi.

⁵ “O Jiova ena vakalougatataka na nomuni sila kei na kakana kecega o ni cakava mai kina.

⁶ “O Jiova ena vakalougatataka na veika kecega o ni cakava.

⁷ “O Jiova ena vakamalumalumutaki ira na nomuni meca ena gauna era valuti kemuni kina. Era na valuti kemuni mai ena dua ga na yasana, ia era na dro tani mai vei kemuni kina veiyasana kecega.

⁸ “O Jiova na nomuni Kalou ena vakalougatataka na nomuni cakacaka ka vakasinaita na nomuni lololo ena sila. Ena vakalougatataki kemuni o koya ena vanua sa solia oqo vei kemuni.

⁹ “Kevaka o ni talairawarawa vei Jiova na nomuni Kalou ka vakayacora na veika kecega sa vakarota vei kemuni, ena qisi kemuni o koya mo ni nona tamata digitaki me vaka sa yalataka.

¹⁰ Era na qai raica na veimatatamata kecega e vuravura ni sa digitaki kemuni o Jiova mo ni nona tamata digitaki, era na qai rerevaki kemuni.

¹¹ Ena qai vakalevutaka o Jiova na luvemuni, ka na levu na nomuni manumanu kei na nomuni vua ni qele ena vanua a yalataka vei ira na nomuni qase o koya me na solia vei kemuni.

¹² Ena vakatauca mai na uca ena kena gauna ena nona lololo sa vutuniyau ena veika e vuqa mai lomalagi, ka vakalougatataka na nomuni cakacaka kecega. O ni na qai soli ka ga yani ki na veivanua e vuqa, ia o ni na sega ni bau kerekere ki na dua na vanua.

¹³ Ena qisi kemuni o Jiova mo ni liuliu vei ira na veimatanitu, ka o ni na sega ni tu sara e muri, o ni na tu ga e cake ka sega ni tu e ra, kevaka o ni talairawarawa ena yalodina ki na nona i vakaro kecega au sa solia vei kemuni edaidai.

¹⁴ Mo ni kakua sara ni talaidredre ki na dua vei ira na vunau au sa solia vei kemuni edaidai, se cuva ka qarava e dua na kalou tani.

Na i Sau ni Talaidredre

¹⁵ “Ia kevaka o ni talaidredre vei Jiova na nomuni Kalou, ka sega ni muria ena yalodina na nona i vunau kei na lawa ka'u sa vakarota oqo vei kemuni edaidai, ena qai yaco vei kemuni na veika ca kecega oqo:

¹⁶ “O Jiova ena cudruva na nomuni veikoro kei na nomuni veivanua.

¹⁷ “O Jiova ena cudruva na nomuni sila kei na kakana kecega o ni sa vakarautaka mai kina.

¹⁸ “O Jiova ena cudruvi kemuni ena nona vakalailaitaka na i wiliwili ni luvemuni, ena lutu sobu na vua ni nomuni qele, ka lailai na nomuni bulumakau kei na sipi.

¹⁹ “O Jiova ena cudruva na veika kece sara o ni cakava.

²⁰ “Kevaka o ni vakayacora na veika ca ka vakanadakui Jiova, sa na kauta mai vei kemuni na veivakarusai, na veilecayaki, ka na leqa na veika kecega o ni cakava, me la'ki yacova na nomuni sa vakarusai vakusakusa kece.

²¹ Ena tala vakaveitarataravi mai na veimate ca kei na matetaka vei kemuni me yacova sara ni sa sega ni vo tale e dua vei kemuni ena vanua o ni sa vakarau la'ki tawana.

²² Ena ravuti kemuni o Jiova ena mate dauveitauvi e vuqa, na vuvuce kei na katakata sivia ni yago. Ena tala o koya na lauqa balavu kei na cagi katakata me vakacacani kina na nomuni i teitei. Na veileqa kece oqo ena muri kemuni tiko me yacova na nomuni mate.

²³ Ena sega ni tau e dua na uca, ena yaco me kaukauwa vaka na kaukamea na nomuni qele.

²⁴ Me i sosomi ni uca, ena tala vei kemuni o Jiova na cava-kuvuniqele kei na cava-mataninuku, me yacova sara ni o ni sa vakarusai.

²⁵ “Ena vakavuna o Jiova me ra vakadrukai kemuni o ira na kemuni meca. O ni na valuti ira mai na dua na yasana, ia o ni na dro lesu ki na veiyasana kecega; ka ra na rere na veimatanitu kecega e vuravura ni ra sa raica na ka e yacovi kemuni.

²⁶ Ni o ni sa mate, era na kania na yagomuni o ira na manumanu vuka kei na manumanu kila ni vanua ka na sega ni dua me na vakasavi ira.

²⁷ Ena vakatauca vei kemuni o Jiova na bo me vaka a cakava vei ira na kai Ijipita. Ena vakavuna o koya me kacabote ka mosi sara na yagomuni. Na karokaro ena robota na yagomuni ka na sivia na kena milamila, ia o ni na sega ni vakabulai rawa mai kina.

²⁸ Ena vakavuna o Jiova mo ni lialia, ena ravuti kemuni o koya mo ni mataboko ka veilecayaki.

²⁹ O ni na vakayayamo voli ena rarama ni sigalevu me vaka e dua na tamata mataboko, ka o ni na sega ni kunea rawa na nomuni gaunisala. O ni na sega ni toso cake rawa ena dua na ka o ni cakava. Ia o ni na vakacacani ka dau butakoci tikoga ka na sega ni dua me na vukei kemuni.

³⁰ “O ni na veimusumusuki kei na dua na goneyalewa, ia ena dua tale na tagane ena vakawatitaka. O ni na tara e dua na vale ia o ni na sega ni tawana. O ni na tea na veivaini ia o ni na sega ni vakayagataka na vuana.

³¹ Ena vakamatei, na nomuni bulumakau e matamuni, ia o ni na sega ni kania e dua na lewena. Ena kau yani vakaukauwa na nomuni asa ni o ni a rai tu ka ra na sega ni kau lesu tale mai vei kemuni. Na nomuni sipi era na soli yani vei ira na kemuni meca ka na sega ni dua me na vukei kemuni.

³² Ena soli yani na luvemuni tagane kei na luvemuni yalewa vei ira na kai tani ni o ni rai tu. Ena oca na matamuni ena veisiga yadua ena vaqarai ira na luvemuni me ra lesu mai, ia o ni na oca wale.

³³ E dua tale na matanitu tani ena vakayagataka na vua ni nomuni qele kece kei na veika kece o ni rawata, ia o ni na vakararawataki tikoga ka vakacacani.

³⁴ Na veika o ni raica ena vakavuna mo ni lialia.

³⁵ Ena vakatauva o Jiova ena durumuni kei na yavamuni na bo mosi, o ni na sega ni vakabulai rawa mai kina. Ena robota na yagomuni taucoko na bo me tekivu sara mai na ulumuni me yaco sara ki na qeteqete ni yavamuni.

³⁶ “Ena kauti kemuni kei na nomuni tui o Jiova ki na dua na vanua tani o ni a sa sega mada ni bau bula kina e liu, se o ira na nomuni qase. O ni na qarava mai kea na veimatakau caka ena kau kei na vatu.

³⁷ Era na kurabui na tamata ena veivanua ena veibiuyaki kemuni kina o Jiova ena vuku ni ka sa yaco vei kemuni; era na veiwalitaki kemuni ka vakalialiai kemuni.

³⁸ “Ena levu sara na sore ni kau o ni na tea, ia ena lailai wale ga na ka o ni na tamusuka, baleta ni ra na kania na vodre na veika o ni tea.

³⁹ O ni na tea na veivaini ka samaka, ia o ni na sega ni kumuna na vuana, se gunuva na kena waini, baleta ni na kani ira na baca ni vaini.

⁴⁰ Era na tubu na olive ena nomuni veivanua kecega, ia ena sega ni dua na nomuni waiwai ni olive, baleta ni ra na qeqera kecega na vuana.

⁴¹ O ni na vakaluveni tagane kei yalewa, ia era na kau tani mai vei kemuni, baleta ni na kau vakavesu ena i valu.

⁴² Na nomuni kau kei na vua ni qele kece era na kania na manumanu lalai.

⁴³ “Era na toso cake na vulagi era tiko kei kemuni me ra cecere sara, ia o kemuni na yaco mo ni lolovira sara.

⁴⁴ Ena tu vei ira na i lavo me ra solia vakadinau vei kemuni, ia ena sega ni dua na ka e tu vei kemuni mo ni solia vakadinau vei ira. Era na yaco me ra liutaki kemuni.

⁴⁵ “Ena yaco mai na veika ca kece oqo vei kemuni. Era na mai tiko ga kei kemuni me yacova sara ni o ni sa vakarusai, baleta ni o ni sega ni talairawarawa vei Jiova na nomuni Kalou ka sega ni muria na nona i vunau kei na nona i vakaro sa solia vei kemuni.

⁴⁶ Era i vakadinadina ni cudru ni Kalou vei kemuni kei ira na nomuni kawa ka sega ni mudu.

⁴⁷ Sa vakalougatataki kemuni o Jiova ena veika kecega, ia o ni sa qai bese ga ni qaravi koya ena reki kei na yalo marau.

⁴⁸ Ena ka oqo, o ni na qaravi ira kina na kemuni meca ena talai ira mai o Jiova. O ni na viakana, ka viagunu, ka luvaiwale, ka gadreva na veika kecega. O Jiova ena vakararawataki kemuni sara vakalevu me yacova na nomuni sa vakarusai.

⁴⁹ Ena kauta mai o Jiova e dua na matanitu o ni sega ni bau kila na nodra vosa, me valuti kemuni. Era na lako sobu mai vei kemuni me vaka e dua na ikeli.

⁵⁰ Era na vakaraitaki i tovo kaukauwa vei kemuni ka sega ni lomana e dua, se ra gone se qase cake.

⁵¹ Era na kania na nomuni bulumakau kei na nomuni vua ni qele; o ni na mate ena viakana. Era na sega ni vakavoca e dua na kemuni sila, na waini, na waiwai olive, na bulumakau, se na sipi, me yacova na nomuni mate.

⁵² Era na valuta na veikoro kece ena vanua sa solia vei kemuni o Jiova na nomuni Kalou, ka ra na bale na veibai ni koro cecere o ni vakanuinui kina.

⁵³ “Ena gauna era na wavokita kina na meca na nomuni veikoro, o ni na leqa sara ena kakana ka rawa sara mo ni kani ira tale kina na luvemuni sa solia vei kemuni o Jiova na nomuni Kalou.

⁵⁴ Ena yaco talega vua na tagane sa dau yalovinaka ka dauveikauwaitaki ena kemuni maliwa me na bureitaka na kakana vua na tacina, se na watina sa daulomana, se vei iratou na luvena se bula tiko,

⁵⁵ ka na sega ni wasea vua e dua vei iratou na tiki ni lewe i luvena dina sa kania tiko. Oqo na ka e sa vo ga vua baleta na dredre levu sa sotavi mai vei ira na meca era sa vesuka vakaukauwa na koro.

⁵⁶ O koya mada ga na yalewa yalovinaka ka sucu turaga, o koya sa vutuniyau ka sa cata me tara na qele na qeteqete ni yavana, ena vakakina na nona i valavala. Ni sa vesuki vakaukauwa na nona koro, na kaukauwa ni nona vakasaqaqara kakana ni sa basika na leqa ena la'ki vakavuna me kania lo kina na luvena ka se qai vakasucuma vou

⁵⁷ kei na i tokatoka ni gone. Ena sega ni wasea o koya vei watina sa daulomana se vua e dua vei iratou na luvena.

⁵⁸ “Kevaka o ni na sega ni muria ena yalodina na i vakavuvuli kecega ni Kalou ka volai ena i vola oqo, ka sega ni vakarokorokotaka na yaca rogo ka veivakurabuitaki i Jiova na nomuni Kalou,

⁵⁹ ena qai tala vei kemuni kei ira na nomuni kawa, na mate ca ka sega na kena wainimate kei na mate ca dauveitauvi ena tete yani, ia ena sega ni tarovi rawa.

⁶⁰ Ena kauta tale mai vei kemuni na veimate o ni a donuya ka raica mai Ijipita, me ra na tauvi kemuni ka sega ni o ni na bula mai kina.

⁶¹ Ena kauta talega mai vei kemuni na veimataqali mate rerevaki kei na matetaka kecega, ka sega ni bau tukuni ena i vola ni lawa oqo me yacova ni o ni sa vakarusai.

⁶² Dina ga ni o ni na lewe levu sara me vaka na levu ni kalokalo e lomalagi, ia ena qai bula wale ga e vica vei kemuni, baleta ni o ni sega ni talairawarawa vei Jiova na nomuni Kalou.

⁶³ Ia me vaka ni a taleitaka o Jiova me vakatoroicaketaki kemuni kei na nona vakalewevuqataki kemuni, ena taleitaka talega me vakarusai kemuni ka vaqeyavutaki kemuni. O ni na kau tani mai na vanua o ni sa vakarau la'ki taukena.

⁶⁴ “Ena vakasavi kemuni o Jiova ki na veimatanitu kecega, ki na i yalayala kei vuravura ka dua me yaco tale ki na yasana ka dua. O ni na qarava mai kea na kalou matakau caka ena kau kei na vatu. Na veikalou o ni a sega ni sa bau qarava vakadua o kemuni, se, o ira na nomuni qase.

⁶⁵ O ni na sega ni kunea e dua na vakacegu ena dua na vanua, ka na sega ni bau dua na vanua o ni na vakatoka me nomuni. Ena vakasinaiti kemuni o Jiova ena nuiqawaqawa, yalolailai kei na veilecayaki.

⁶⁶ Ena veilecayaki tu ga na nomuni bula. O ni na vakasinaiti ena rere ena siga kei na bogi, ka rerevaka na mate ena veigauna kecega.

⁶⁷ Ena rise na ketemuni ena rere ena vuku ni veika kecega o ni raica. Ena veimataka lailai o ni na gadreva me tei totolo mai na bogi, ia ena bogi o ni na gadreva me tei totolo mai na mataka lailai.

⁶⁸ Ena kauti kemuni lesu tale o Jiova ena waqa ni bobula ki Ijipita, veitalia ga ni a sa yalataka oti tu vei kemuni ni o ni na sega ni lesu tale ki kea. O ni na tovolea mai kea mo ni volitaki kemuni vei ira na kemuni meca mo ni bobula, ia ena sega ni dua ena voli kemuni.