Vakarua 27 - Vakavakadewa Vou kei na iVola tale eso

Na i Vunau ni Kalou sa Volai ena Vatu

¹ A qai vakaroti ira na tamata o Mosese kei ira na nodra i liuliu na Isireli ka kaya, Mo ni talairawarawa ki na i vunau kece au sa vunauci kemuni edaidai.

² Ena siga o ni sa na qalo kosova kina na uciwai na Joritani ka yaco ki na vanua sa solia vei kemuni o Jiova na nomuni Kalou, mo ni qai vakaduria eso na vatu lelevu ka boroya ena lase,

³ ka vola e deladra na vosa kecega ni vunau oqo. Ena gauna o ni sa yaco kina ki na vanua sa dave kina na sucu kei na oni sa yalataka vei kemuni o Jiova na nodra Kalou na nomuni qase,

⁴ ia, ni o ni sa tiko ena tai kadua ni Joritani, mo ni qai la'ki vakaduria na veivatu oqo ena dela ni ulunivanua, o Ipali, me vaka au sa vakarota vei kemuni edaidai, ka boroya ena lase.

⁵ Ia mo ni tara e kea e dua na i cabocabonisoro kivei Jiova na nomuni Kalou, me caka oqo ena vatu sa sega ni ta mai na dua na i yaya ni cakacaka kaukamea,

⁶ baleta na i cabocabonisoro o ni sa tara me nona o Jiova na nomuni Kalou e dodonu me caka ena vatu ka sega ni ta. Mo ni vakacabora e kea na veisoro eso me vakamai,

⁷ ka vakacabora talega e kea ka kania ena marau na i soro ni veivinakati ena mata i Jiova na nomuni Kalou.

⁸ Mo ni qai vola sara vakakina ena dela ni veivatu sa boro ena lase na vosa kece ni vunau oqo.

⁹ A qai vosa o Mosese vata kei ira na bete era kawa i Livai vei ira kecega na Isireli, ka kaya, “Kemuni na Isireli, ni tu vakanomodi mada mo ni vakarorogo mai vei au. E daidai o ni sa yaco kina mo ni nona tamata na nomuni Kalou o Jiova.

¹⁰ Mo ni talairawarawa vua ka muria na nona i vunau kei na lawa au sa vakarota vei kemuni edaidai.”

Na Cudruvi ni Talaidredre

¹¹ A qai kaya tale vei ira na Isireli o Mosese:

¹² Ni o ni sa takosova na Joritani, o ira na veimataqali oqo me ra la'ki tucake tu ena Ulunivanua o Qerisimi, ena gauna sa kacivaki kina na vosa ni veivakalougatataki vei ira na Isireli o ira na Simione, Livai, Juta, Isakari, Iosefo kei Penijamini.

¹³ O ira na veimataqali oqo me ra la'ki tucake tu ena Ulunivanua o Ipali, ena gauna sa kacivaki kina na vosa ni veicudruvi: o ira na Rupeni, Kata, Aseri, Sevuloni, Tani kei Navitalai.

¹⁴ Ia me ra qai kacivaka na vosa oqo ena domo levu o ira na Livai:

¹⁵ “ ‘Ena yaco na cudru ni Kalou vei koya sa cakava e dua na matakau mai na vatu, kau, se kaukamea ka qai qarava vuni tiko. Sa cata vakaukauwa o Jiova na vakalou ki na kalou tani. “Me ra na qai sauma kece na tamata, ka kaya, ‘Emeni!’

¹⁶ “ ‘Ena yaco na cudru ni Kalou vei koya sa beca na tamana kei na tinana.’ “Me ra na qai sauma kece na tamata, ka kaya, ‘Emeni!’

¹⁷ “ ‘Ena yaco na cudru ni Kalou vei koya sa tosoya na nona i yalayala ni vanua e dua na wekana.’ “Me ra na qai sauma kece na tamata, ka kaya, ‘Emeni!’

¹⁸ “ ‘Ena yaco na cudru ni Kalou vei koya sa tubera ena sala cala e dua na mataboko.’ “Me ra na qai sauma kece na tamata, ka kaya, ‘Emeni!’

¹⁹ “ ‘Ena yaco na cudru ni Kalou vei koya sa tabaka sobu na nodra dodonu na vulagi, na luveniyali kei na yada.’ “Me ra na qai sauma kece na tamata, ka kaya, ‘Emeni!’

²⁰ “ ‘Ena yaco na cudru ni Kalou vei koya sa vakamaduataka na tamata, ni sa veiyacovi kei na dua vei ira na wati tamana.’ “Me ra na sauma kece na tamata, ka kaya, ‘Emeni!’

²¹ “ ‘Ena yaco na cudru ni Kalou vei koya sa veiyacovi kei na dua na manumanu.’ “Me ra na qai sauma kece na tamata, ka kaya, ‘Emeni!’

²² “ ‘Ena yaco na cudru ni Kalou vei koya sa veiyacovi kei na ganena, na luve i tamana se na luve i tinana.’ “Me ra na qai sauma kece na tamata, ka kaya, ‘Emeni!’

²³ “ ‘Ena yaco na cudru ni Kalou vei koya sa veiyacovi kei na tina i watina.’ “Me ra na qai sauma kece na tamata, ka kaya, ‘Emeni!’

²⁴ “ ‘Ena yaco na cudru ni Kalou vei koya sa labata vuni e dua na tamata.’ “Me ra na qai sauma kece na tamata, ka kaya, ‘Emeni!’

²⁵ “ ‘Ena yaco na cudru ni Kalou vei koya sa taura na i lavo e saumi kina me labata e dua na tamata.’ “Me ra qai sauma kece na tamata, ka kaya, ‘Emeni!’

²⁶ “ ‘Ena yaco na cudru ni Kalou vei koya sa sega ni muria taucoko na i vakaro kei na vakavuvuli ni Kalou.’ “Me ra na qai sauma kece na tamata, ka kaya, ‘Emeni!’