Vakarua 24 - Vakavakadewa Vou kei na iVola tale eso

Na Veibiu kei na Vakawati Vou Tale

¹ Kevaka e dua na tagane sa vakamautaka e dua na yalewa, ia e muri sa qai sega ni vinakati koya baleta ni sa kunea vua eso na i vakarau e sega ni taleitaka, ka sa vola e dua na i volatara ni veibiu ka solia vua, ka vakatalai koya tani yani mai na nona i tikotiko,

² ka sa mani lako yani o yalewa ka vakawatitaki koya tale e dua na tagane.

³ Ia kevaka sa qai sega talega ni vinakati koya na tagane o ya, ka sa vola tale e dua na i volatara ni veibiu ka solia vua, ka vakatalai koya tani mai na nona i tikotiko, se kevaka sa mate na tagane oqo ka i karua ni watina,

⁴ ia sa qai tabu vua na i matai ni watina tagane, o koya ka a vola na i volatara ni veibiu, me vakawatitaki koya tale na yalewa oqo, ni sa okati me tawa savasava o koya. Kevaka e tauri koya tale me watina, ena ka vakasisila sara vei Jiova. Mo ni kakua sara ni cakava na i valavala ca levu oqo ena vanua sa solia vei kemuni o Jiova na nomuni Kalou.

Na Veilawa Tale Eso

⁵ Kevaka e dua na tagane e sa qai vakawati vou me kakua ni curu ki na mataivalu se dua na i lesilesi raraba. Me vakagalalataki mada o koya me dua na yabaki, ka me tiko ga ena nona i tikotiko ka vakamarautaka na watina.

⁶ Kevaka o ni solia vakadinau vua e dua na tamata e dua na ka, ni kakua ni taura na nona vatu ni qaqi sila me i vakadinadina ni veiyalayalati. Oqo ena kauta tani na i yaya e dau vakarautaki kina na kedratou kakana vakamatavuvale me ratou bula kina.

⁷ O koya vei kemuni e vesuka e dua tale na luve i Isireli, ka vakabobulataki koya, se volitaki koya yani ena makete ni bobula, me vakamatei na tamata o ya. Ena sala o ni na vakawabokotaka kina na i tovo ca oqo.

⁸ Ena vuku ni vukavuka, ni qarauna mo ni vakayacora vinaka na ka kece era sa tukuna na bete na luve i Livai vei kemuni. Mo ni muria vinaka na i vakasala kece au sa solia vei ira.

⁹ Mo ni nanuma na ka sa cakava o Jiova na nomuni Kalou vei Miriama e gaunisala, ni o ni a lako tani mai Ijipita.

¹⁰ Kevaka o ni solia vakadinau e dua na ka vua e dua na tamata, ni kakua ni curu ki na nona vale ka la'ki kauta mai na i sulu ena solia mei vakadei ni veiyalayalati.

¹¹ Waraki koya ga e tuba ka laiva me kauta mai o koya vei kemuni.

¹² Ia kevaka sa tamata dravudravua, me kakua ni vakabogi vei iko na i vakadei ni veiyalayalati.

¹³ Vakasuka vua ni sa dromu na siga, me vakayagataka ena gauna ni moce. Ena marau kina na wekamu o ya, ka vaka talega kina o Jiova na nomuni Kalou.

¹⁴ Mo kakua ni vakaisina e dua na tamata dravudravua se leqa ena nomu sega ni via solia na kena i sau ni cakacaka, se ra lewenivanua o Isireli se kai tamata vulagi sa tiko ena dua na nomuni koro.

¹⁵ Me saumi vua na kena i sau ni dua na siga ni bera ni dromu na matanisiga ena veisiga yadua; sa gadreva o koya na i lavo, ka sa nuitaka tu ni na soli vua. Ia kevaka o ni sega ni saumi ira, era na tagi vei Jiova ena vukumuni, ka o ni sa cala kina.

¹⁶ Me ra kakua ni vakamatei na i tubutubu ena vuku ni veika ca era cakava na luvedra. Me ra kakua talega ni vakamatei na gone ena vuku ni veika ca era cakava na nodra i tubutubu. Na tamata sa vakamatei me mate ga ena vuku ni ka ca sa cakava.

¹⁷ Mo ni kakua ni kauta tani na nodra dodonu na kai matanitu tani kei ira talega na luveniyali. Kua sara ni kauta na nona i sulu e dua na yada me i vakadei ni ka sa kerea.

¹⁸ Nanuma ni o ni a bobula mai Ijipita, a qai sereki kemuni mai kea o Jiova na nomuni Kalou. Sai koya oqo au sa solia kina vei kemuni na i vakaro oqo.

¹⁹ Ni o ni sa kumuna na ka o ni a tea, o ni mani sega ni kumuna mai eso na sila o ni a tamusuka, ni kakua ni lesuva tale. Me ra biu ga me kedra na vulagi, na luveniyali, kei na yada; ena vakalougatataki kemuni kina o Jiova na nomuni Kalou ena ka kecega o ni cakava.

²⁰ Ni o ni sa betia oti na nomuni vua ni olive, kakua ni lesuva tale na kena vo. Me biu tu ga me kedra na vulagi, na luveniyali kei na yada.

²¹ Ni o ni sa kumuna oti na nomuni qerepi, ni kakua ni lesuva tale vakarua. Na qerepi era vo tu me qai medra na luveniyali, na vulagi kei na yada.

²² Mo ni kakua sara ni guilecava ni o ni a bobula mai Ijipita; sai koya oqo au sa solia kina vei kemuni na i vakaro oqo.