Vakarua 22 - Vakavakadewa Vou kei na iVola tale eso

¹ Kevaka o raica na nona bulumakau, se sipi e dua na wekamu ni Isireli ni tasere tu, mo kakua ni laiva tu ga. Vakalesuya ki vua na kena i taukei.

² Ia kevaka e yawa sara na vanua e tiko kina na kena i taukei, se o sega beka ni kilai koya e nona, mo kauta ga ki na nomu i tikotiko. Ni sa vakasaqara mai na kena i taukei, mo qai solia lesu vua.

³ Mo cakava talega na ka oqo kevaka o kunea e dua na asa, se dua na i sulu, se dua ga na ka sa yali vua e dua na nomu i tokani ni Isireli.

⁴ Kevaka e bale na nona asa, se bulumakau e dua na wekamu ni Isireli, mo kakua ni laiva tu ga. Mo vukei koya me vakatura cake tale na nona manumanu.

⁵ Me kakua ni dua na yalewa e daramaka na i sulu ni tagane, ka me kakua talega ni dua na tagane me daramaka na i sulu ni yalewa; sa sega ni vinakati ira era dau kitaka na ka vakaoqo o Jiova na nomuni Kalou.

⁶ Kevaka o kunea e dua na sova ni manumanu ena dua na vunikau, se ena dela ni qele, ni oviovi tiko kina na tina ni manumanu, mo kakua ni kauta na tina ni manumanu vuka, kei na luvena.

⁷ Sa rawa mo kauta na luvena ia mo laiva ga na tinana me bula; me na balavu kina na nomuni bula ka me yaco kina na vinaka vei kemuni.

⁸ Ni o sa tara e dua na nomu vale vou, nanuma mo vakabaitaka wavoki talega na dela ni vale. O na qai sega ni beitaki kevaka e dua e mate ni lutu mai kina.

⁹ Kakua ni tea tale e dua na sore ni kau ena nomuni loganivaini, kevaka o kitaka na ka oqo, sa na tabu sara ni o na vakayagataka na qerepi, se na vuanikau o ni tea vata kaya.

¹⁰ Kakua ni vakaivuataki rau vata e dua na bulumakau kei na dua na asa me rau siviyara.

¹¹ Kakua ni daramaka e dua na i sulu e caka ena vutika ni sipi vata kei na lineni.

¹² Mo ni cula eso na wa-talitali me ra lili toka ena va na tutu ni i sulu o ni na ubi kemuni kina.

Lawa ni Tiko Savasava ni Tagane kei na Yalewa

¹³ Kevaka e dua na tagane sa kauta e dua na yalewa me watina, ia e muri, ni sa veiyacovi kaya oti, sa nanuma me biuta ni sa oti na nona gadrevi koya.

¹⁴ Sa qai nakita me beitaka vakailasu ka bilitaka ni a sega ni goneyalewa dina ena siga rau a vakamau kina ka ni a sa veiyacovi oti o koya kei na tagane ni bera na vakamau.

¹⁵ Kevaka a yaco na ka oqo me rau qai kauta na i tubutubu ni yalewa beitaki na i davodavo ni vakamau me vakadinadinataka ni a sega dina ni bau veiyacovi oti e liu na luvedrau. Me rau la'ki vakaraitaka vei ira na qase ni nodratou koro ena mataveilewai.

¹⁶ Me qai kaya na tama ni goneyalewa vei ira na qase ni koro, Au a solia na luvequ yalewa me rau vakamau kei na tagane oqo, ia sa besetaki koya edaidai;

¹⁷ ka sa beitaka vakailasu ka kaya ni a sa veiyacovi oti kei na tagane ni rau bera ni vakamau. Sai koya oqo na i vakadinadina ni a sa bera ni bau veiyacovi oti mada e liu na luvequ yalewa. Ni raica mada na i davodavo ni vakamau.

¹⁸ Me ra qai tauri koya ka veibeitaki o ira na qase ni koro ka vakanakuitaki koya.

¹⁹ Ia me ra kaya vua me nona i totogi e dua na drau na tiki ni lavo siliva ka me solia na i lavo oqo ki vua na tama ni goneyalewa, ka ni sa vakarogocataka e dua na goneyalewa ni Isireli. Me i kuri ni totogi, o ya me watina tikoga, ena gauna kece sara ni nona bula, ka me kakua sara ni biuta.

²⁰ Ia kevaka e kunei ni dina na veibeitaki ka sa sega ni dua na i vakadinadina ni a sa sega ni sa veiyacovi na yalewa,

²¹ me ra kauta na yalewa ki na mata ni katuba ni vale nei tamana, ka vakaviriki koya e kea o ira na tagane ni koro o ya ena vatu me mate. Sa vakayacora na yalewa o ya e dua na i vakarau vakamadua vei keda ni sa veiyacovi o koya kei na tagane ni sa tiko ga e vale nei tamana, ni sa bera ni vakawati. Sai koya oqo na sala o ni vakawabokotaka kina na i tovo ca oqo,

²² Kevaka e kune e dua na tagane ni veiyacovi kei na dua na yalewa vakawati me rau vakamatei ruarua. Na sala oqo o ni na vakawabokotaka kina vakadua na i tovo ca oqo e Isireli.

²³ Kevaka e dua na tagane ena dua na koro, e kune ni veiyacovi kei na dua na goneyalewa sa musuki oti tu me watina e dua na tagane.

²⁴ Mo ni kauti rau ruarua ki na taudaku ni koro ka vakaviriki rau ena vatu me rau mate. Me mate na yalewa baleta ni sega ni kaila me kerea na veivuke, ka ni a yaco na ka o ya ena dua na koro, na vanua e dodonu me rogoci kina na nona kaila. Me mate talega na tagane baleta ni sa veiyacovi kei na dua na yalewa sa musuki oti tu vua e dua na wekana na Isireli. Na sala oqo o ni na vakawabokotaka kina na i tovo ca oqo.

²⁵ Kevaka e dua na tagane mai na taudaku ni vanua sa kucuva e dua na yalewa sa musuki oti tu vua e dua tale na tagane, ia me na vakamatei ga na tagane.

²⁶ Me kakua ni caka e dua na ka vua na yalewa baleta ni sa sega ni cakava e dua na cala me na vakamatei kina. Na cala oqo e vaka ga ni dua na tamata e mokuta e dua tale na tamata ka vakamatea.

²⁷ Na tagane oqo sa kucuva na yalewa ka sa musuki oti tu me vakawati ena taudaku ni vanua, ka sa sega ni dua e vukei yalewa rawa ka dina ga ni a sa kaila ni kere veivuke.

²⁸ Kevaka e dua na tagane e kune ni vesuka e dua na yalewa e sa bera ni musuki vua e dua na tagane,

²⁹ me sauma na tagane o ya e limasagavulu na tiki ni siliva vei tama i yalewa o ya o koya na tagane me watina, baleta ni a vakasaurarataki koya me rau veiyacovi, ka me kakua sara ni biuti koya ena gauna kece e bula kina.

³⁰ Me kakua ni dua na tagane me vakawati kei na wati tamana; sa tabu vua me vakadukadukalitaka na i mocemoce i tamana.