Vakarua 20 - Vakavakadewa Vou kei na iVola tale eso

Vakaro ni Veivaluvaluti

¹ Ni o ni sa lako ka vala vata kei ira na kemuni meca, ka raica ni sa levu cake na nodra qiqinivalu, nodra ose kei na nodra mataivalu mai vei kemuni, mo ni kakua sara ni rerevaki ira. Ena vala vata kei kemuni o Jiova na nomuni Kalou, o koya ka vakabulai kemuni mai na vanua o Ijipita.

² Ni bera ni tekivu na i valu, me qai lako mai e dua na bete me mai vosa ki na mataivalu,

³ ka kaya, Kemuni na Isireli ni vakarorogo mada! E daidai o ni sa na lako yani mo ni vala. Kua sara ni rerevaki ira na kemuni meca, se yalolailai, se taqaya;

⁴ ni sa lako vata kei kemuni o Jiova na nomuni Kalou ka na solia vei kemuni na qaqa.

⁵ Me ra qai vosa na turaganivalu vei ira na tamata, ka kaya, E dua beka na tamata e tiko eke ka sa qai tara oti ga e dua na vale ka sa bera ni vakatabuya? Kevaka e tiko e dua me qai lesu yani o koya ki na nona i tikotiko. De na qai mate o koya ena i valu ka na qai dua tani tale na tamata ena vakatabuya na nona vale.

⁶ E bau dua beka na tamata e tiko eke ka sa qai tea ga e dua na loganivaini ia a sega mada ni sa bau tauca na vuana? Kevaka e tiko e dua, me lesu tale o koya ki na nona vale, de na qai mate o koya ena i valu, ka na qai dua tale na tamata ena vakayagataka na i sevu ni vuana.

⁷ E bau tiko beka eke e dua na tamata ka sa duguca oti e dua na goneyalewa me watina? Kevaka e tiko e dua, me lesu tale o koya ki nona vale. De na qai mate o koya ena i valu ka na qai dua tale na tagane e vakawatitaka na yalewa sa musuki oti tu vua.

⁸ Era na kaya talega na turaganivalu vei ira na sotia, E bau tiko beka e dua na tamata sa yalolailai ka rere? Kevaka e tiko e dua, me lesu tale o koya ki na nona i tikotiko, de na qai vakayalolailaitaki ira talega na kena vo.

⁹ Ia ni sa oti na nodra vosa na turaganivalu vei ira na sotia me ra qai veiliutaki yani na i liuliu ni veiwasewase.

¹⁰ Ni o ni sa lako yani mo ni valuta e dua na koro, ni solia mada e liu vei ira na lewena na digidigi ni veisaututaki.

¹¹ Kevaka era sa dolava mai na matamata me ra soro, era na qai nomuni bobula, ia me ra vakacakacakataki vakaukauwa.

¹² Kevaka era sega ni via soro na lewena ka digitaka me ra vala, mo ni valuta sara na koro o ya.

¹³ Ia ni sa soli ira vei kemuni o Jiova na nomuni Kalou ka o ni sa rawa sara na koro o ya, mo ni qai vakamatei ira kece sara na kena tagane.

¹⁴ Ia mo ni qai tauri ira na yalewa, na gone, na manumanu kei na veika kece e tu ena koro o ya me ra nomuni i toki ni valu. Ni vakayagataka na veika kece e nodra na kemuni meca, sa solia vei kemuni o Jiova na nomuni Kalou.

¹⁵ Me vaka o ya na veika mo ni vakayacora ki na veikoro era yawa mai vei kemuni ka ra sega ni koro ni vanua oqo.

¹⁶ Ia ni o ni valuta na veikoro ena vanua sa solia o Jiova na nomuni Kalou mo ni taukena ni kakua tale ni vakabula e dua na ka bula.

¹⁷ Vakarusai ira taucoko sara vakadua na tamata; o ira na Itaiti, na Amoraiti, na Kenaiti, na Perisaiti, na Ivaiti kei ira na Jepusaiti, me vaka sa vakarota o Jiova na nomuni Kalou,

¹⁸ me ra kakua tale ni vakavulici kemuni mo ni cakava na veika vakasisila era dau cakava ni ra qaravi ira na nodra veikalou, ka o ni na qai valavala ca kina vei Jiova na nomuni Kalou.

¹⁹ Ena gauna o ni valuta tiko kina e dua na koro, ni kakua ni tatalaka sobu na kena veikau vuata, veitalia ga kevaka e balavu sara na gauna o ni valuta tiko kina. Mo ni kania na vuana, ia ni kakua ga ni vakarusa na vuna; o ira na veikau vuata era sega ni kemuni meca.

²⁰ E rawa mo ni taya na veikau ka sega ni dau vua ka vakayagataka me nomuni i kabakaba me yacova ni sa vakadrukai na koro.