Vakarua 2 - Vakavakadewa Vou kei na iVola tale eso

Na Veilakoyaki Voli mai na Vanua Lala

¹ Eda a qai gole tani mai kea ka lako yani ki na vanua lala ena sala sa gole vaka ki na Wasa Damudamu me vaka sa vakarota vei keda o Jiova, ka la'ki tiko voli ena veidelana mai Sia ena dua na gauna balavu.

² A sa qai kaya vei au o Jiova,

³ “Sa rui balavu na gauna eda tiko voli kina ena vanua veidelana o ya, ka dodonu me da sa lako cake vaka ki na vualiku,

⁴ a tukuna vei au me'u tukuna vei kemuni na veivakaro oqo: ‘O ni sa vakarau lakova yani oqo na nodra vanua na wekamuni, o ira na kawa nei Iso era tiko ena vanua veidelana o Sia. Era na rerevaki kemuni,

⁵ ia mo ni kakua ni veivala kei ira ni'u na sega ni solia vei kemuni e dua na tiki ni nodra vanua, ena sega mada ga ni dua na mita vakarivirivi. Au a solia na veidelana mai Sia vei Iso me nona i votavota.

⁶ Mo ni volia mai vei ira na kakana kei na wai me na rawa mo ni kana ka gunu tiko kina.’

⁷ “Mo ni nanuma na nona vakalougatataki kemuni o Jiova na nomuni Kalou ena veika kecega o ni sa vakayacora. Sa dau taqomaki kemuni ena nomuni veilakoyaki voli ena vanua lala levu oqo. Sa tiko voli ga kei kemuni ena loma ni vasagavulu na yabaki oqo, ka o ni sega sara ni bau leqa ena dua na ka.”

⁸ Ia eda sa qai lako yani ka biuta na sala e mua mai na koro o Eliaci kei Esioni Keperi vaka ki na Waitui Mate, ka qai gole yani ki na vua-i-cake ki Moapi.

⁹ A qai kaya vei au o Jiova, “Ni kakua ni vakasosataki ira na kai Moapi, o ira na kawa i Loti, se vakatekivuna e dua na veivala kei ira. Au a sa solia na koro levu o Ari kivei ira, ka'u na sega ni solia vei kemuni e dua na tiki ni nodra vanua.”

¹⁰ (E dua na yavusa tuwawa ka kaukauwa era vakatokai na Emimi, era a tiko e liu mai Ari. Era tamata balabalavu me vakataki ira na Anakimi, e dua talega na yavusa tuwawa.

¹¹ Era vakataki ira na Anakimi; era vakatokai talega me ra Refaimi, ia era vakatokai ira o ira na kai Moapi me ra Emimi.

¹² Era a vakaitikotiko taumada mai Itomi na kawa i Ori, ia era a qai vakasavi tani mai kea mai vei ira na kawa i Iso, ka ra vakarusa na nodra matanitu, ka tawana na nodra vanua, me vakataki ira ga na Isireli ena nodra a qai vakasavi ira tani na kedra meca mai na nodra vanua ena dua na gauna e muri, ka tikora me vaka sa solia vei ira o Jiova.)

¹³ “Eda a qai qalokosova yani na uciwai o Sereti me vaka sa vakarota vei keda o Jiova.”

¹⁴ A yaco oqo ni sa oti e 38 na yabaki ena noda biuta mai na vanua o Katesi Banea. O ira kece na tamata ni vala ka bula ena i tabatamata o ya era a mate kece sara, me vaka sa yalataka o Jiova.

¹⁵ A sa saqati ira tikoga o Jiova me yacova ni ra sa vakarusai kece sara.

¹⁶ Ena gauna era sa mate kece kina na liga ni wau, mai vei ira na tamata,

¹⁷ a qai vosa vei au o Jiova, ka kaya,

¹⁸ “E daidai o ni sa na takosova kina na i yalayala kei Moapi mai Ari.

¹⁹ Ia o ni sa na qai volekata yani na nodra vanua na luve i Amoni, ni kakua ni vakasagai ira, se, valuti ira. Au na sega ni solia vei kemuni e dua na nodra tiki ni qele na luve i Amoni me nomuni i votavota, baleta ni'u sa solia oti vei ira na kawa i Loti.”

²⁰ (E kilai tale tu ga na vanua oqo me vanua i Refaimi, o ira na a tiko e liu e kea; ia o ira na luve i Amoni era vakatokai ira me ra Samisumi.

²¹ Era lewe levu ka kaukauwa, ka tamata balabalavu me vakataki ira na Anakimi. A qai vakarusai ira o Jiova e matadra na luve i Amoni, sa qai curu yani ka vakasavi ira ka tiko e kea me ra kedra i sosomi.

²² Na ka talega oqo sa vakayacora o Jiova ena vukudra na kai Sia, o ira na kawa i Iso era tiko ena veidelana kei Itomi. A vakarusai ira na kai Ori me ra taura na nodra vanua o ira na kai Itomi ka tiko kina me yacova na siga edaidai.

²³ Era sa mai vakaitikotiko o ira era gole mai na yanuyanu o Kiriti ena vanua vaka ki na baravi ni Meditereni. Era a valuti ira na kai Arimi, o ira na i taukei dina ni vanua, ka ra taukena na nodra vanua taucoko sara me yaco sara ki na ceva ni koro o Qasa.)

²⁴ “Ni lako yani oqo ka takosova na uciwai o Arinoni. Raica, au sa soli Sioni na Amoraiti ka tui Esiponi ki na ligamuni, ka vakakina na nona vanua. Mo tekivu taura na nona vanua ena nomuni sa valuti koya.

²⁵ Me tekivu edaidai ka lako yani, au na vakavuna me ra domobula ka rerevaki kemuni na tamata kece ena ruku i lomalagi. Era na sautaninini ena rere ka kani yatedra ni ra rogoca na kemuni i tukutuku.”

Vakadrukai Tui Sioni o Ira na Isireli

²⁶ Ia au a qai tala yani eso na mata mai na vanua lala o Kitemoci vei Sioni na tui Esiponi me ratou kauta na i tukutuku ni veisaututaki oqo, ka kaya:

²⁷ “Ni laivi keimami mada me keimami lako kosova na nomuni vanua. Keimami na muria tikoga na gaunisala levu, ka na sega sara ni gole ki na i matau, se ki na i mawi.

²⁸ Keimami na sauma na kakana keimami kania kei na wai keimami gunuva. Na ka ga keimami vinakata o ya me keimami lako kosova na nomuni vanua,

²⁹ me yacova ni keimami sa qalo kosova na uciwai na Joritani me keimami lako yani ki na vanua sa solia vei keimami o Jiova na neimami Kalou. Era a vakadonuya na kawa i Iso era tiko mai Sia e Itomi, kei ira na kai Moapi era tiko mai Ari me keimami lako kosova mai na nodra vanua.”

³⁰ Ia sa sega ga ni vakadonuya o Sioni na tui Esiponi me keimami takoso. O Jiova na nomuni Kalou sa vakaukauwataka na lomana me bese kina, ka sa rawa kina me da vakadrukai koya ka taura na nona vanua me yacova na siga edaidai.

³¹ A qai kaya vei au o Jiova, “Raica, au sa vakavuna me tawa yaga ena matamuni o Sioni kei na nona vanua; ni taura na nona vanua ka taukena.”

³² A qai lako mai o Sioni na tui kei ira kece na nona tamata me ra vala kei keda volekata na koro o Jeasa,

³³ ia, a soli Sioni o Jiova ki na noda kaukauwa, eda a qai vakamatei koya kei ira na luvena kei ira na nona tamata kecega.

³⁴ Ena gauna vata talega o ya, eda a vesuka ka vakarusa kina na koro kecega ka vakamatea na tagane, yalewa kei na gone. Eda a sega tale ni vakabula e dua na tamata.

³⁵ Eda a qai taura na nodra manumanu kei na i yau ena nodra veikoro.

³⁶ A solia vei keda o Jiova na noda Kalou na koro kecega me tekivu mai Aroeri, ena bati ni bucabuca o Arinoni ka vakakina na veikoro kecega ena loma ni buca o ya me yaco sara ki Kiliati. A sega sara ni bau dua na bainikoro me cecere vei keda.

³⁷ Ia eda a sega ga ni toro voleka yani ki na nodra vanua na kawa i Amoni, se, ki na uciwai na Japoki, se, ki na veikoro, se, ki na vanua veidelana, se ki na dua tale na vanua ka vakarota o Jiova na noda Kalou me da kakua ni lako kina.