Vakarua 19 - Vakavakadewa Vou kei na iVola tale eso

Lawa e Baleta na Veikoro me i Drodro

¹ “Ena gauna era sa vakarusai ira oti kina na tamata era i taukei ni vanua ka sa solia oqo vei kemuni o Jiova na nomuni Kalou, ka o ni sa vakamalumalumutaki ira oti ka vakaitikotiko ena nodra veikoro kei na nodra veivale,

² mo ni qai digitaka e tolu na koro lelevu ka vakatakilakilataki iratou ena vanua sa solia vei kemuni o Jiova na nomuni Kalou mo ni taukena.

³ Mo ni vakarautaka na kena yawa ka wasea vakatolu na vanua sa solia vei kemuni o Jiova na nomuni Kalou me nomuni, me na rawa kina vua na daulaba me dro ki na dua vei iratou na koro oqo.

⁴ Sai koya oqo na i vakarau me baleta na tamata ka dro ki kea me taqomaka na nona bula. Kevaka e dua sa vakamatea ena vakacalaka e dua na tamata ka sega mada ga ni rau veimecaki, ia me dro yani ki na veikoro lelevu oqo.

⁵ A kena i vakaraitaki oqo: kevaka e rau sa lako ki veikau me rau ta buka e rua na tamata, ka sa qai taucu laivi mai na yame ni matau i koya ka ta buka tiko, ka mani lauta sara na wekana ka mani mate sara kina, ia sa rawa vua na tamata o ya me dro ki na dua vei iratou na koro e tolu me maroroi kina na nona bula.

⁶ Kevaka e dua wale tikoga na koro ni drodro ka rui toka vakayawa, sa na rawarawa kina ni ra toboki koya koso o ira e sa dodonu me ra sauma lesu na i sau ni dra, ka ra mani vakamatea mai na dela ni nodra cudru e dua na tamata tawa cala. Na vuna oqo ni a yaco vakacalaka na nona vakamatei nona i tokani ka rau sega ni veimecaki.

⁷ Sai koya oqo na vuna au sa vakaroti kemuni kina mo ni vagalalataka e tolu na koro lelevu me i drodro.

⁸ Ia ena gauna sa vakalevutaka kina na nomuni vanua o Jiova na nomuni Kalou me vaka sa yalataka vei ira na nomuni qase ka solia vei kemuni na vanua kece a yalataka,

⁹ ia kevaka o ni muria vakavinaka kece na nona i vunau, na nomuni Kalou, ka bula voli me vaka na nona i vakaro, mo ni qai digitaka tale e tolu na koro me kena i kuri,

¹⁰ me na rawa kina me ra kakua ni vakamatei o ira e sega ni dodonu me ra vakamatei ka, me kakua talega ni beitaki vei kemuni na nodra mate ena vanua sa solia vei kemuni o Jiova na nomuni Kalou.

¹¹ Ia kevaka e dua na tamata sa nakita me labata na wekana, sa mani vakamavoataki koya sara vakaca ka mani mate sara kina, sa qai dro ki na dua vei iratou na koro ni drodro oqo,

¹² me ra na qai kauti koya o ira na i liuliu ni nona koro ka soli koya vua na tamata sa nona i tavi me sauma lesu na i sau ni dra ka me vakamatei sara na tamata o ya.

¹³ Mo ni kakua sara ni lomani koya, ia mo ni vakasavasavataki Isireli ga mai na i sau ni dra ni tamata cala, me na yaco kina vei kemuni na vinaka.

Na i Yalayala ni Vanua Makawa

¹⁴ Mo ni kakua ni tosoya na i yalayala ni nodra vanua na wekamuni, ka sa vakataudeitaki ena dua na gauna makawa sara ena vanua sa vakarau solia vei kemuni o Jiova na nomuni Kalou.

Na Lawa me Baleti Ira na i Vakadinadina

¹⁵ Ena sega ni rawa ni vakadinadinataki ni cala e dua na tamata ka beitaki ena dua na cala, kevaka e lewe dua ga na i vakadinadina. Ia, e dodonu ga me rua, se tolu na i vakadinadina ni sa bera ni vakadeitaki ni sa cala dina na tamata o ya.

¹⁶ Kevaka e dua na tamata e via vakacacana e dua tale ena nona beitaki koya vakailasu ni cakava ena dua na cala,

¹⁷ sa dodonu me rau lako ruarua yani ena mata ni Kalou, ka me ra vakatulewa ena vukudrau o ira na bete kei ira na turaganilewa era veiliutaki ena gauna o ya.

¹⁸ Era na vaqaqa sara vakavinaka o ira na turaganilewa na ka oqo, ia kevaka e kunei ni lasu na i vakadinadina ka bubului vakailasu ena vuku ni wekana,

¹⁹ me qai tau vua na i totogi e dodonu me colata na tamata beitaki. Oqo na sala ena vakawabokotaka kina na i tovo ca vakaoqo mai vei kemuni.

²⁰ Era na qai rogoca na ka oqo na tamata kece, ka ra na qai rere kina, ena qai sega ni dua ena via cakava tale na i tovo ca oqo.

²¹ Mo ni kakua sara ni yalololoma. Na i totogi ena vakaoqo: na bula me i sau ni bula, na mata me i sau ni mata, na bati me i sau ni bati, na liga me i sau ni liga, kei na yava me i sau ni yava.