Vakarua 18 - Vakavakadewa Vou kei na iVola tale eso

Na Nodra i Votavota na Bete

¹ Ena sega na nodra i votavota ni vanua e Isireli na bete, ena mataqali i Livai. Era na bula ga ena i madrali kei na i soro tale eso sa dau cabe vei Jiova.

² Era na sega ni taukena e dua na tiki ni qele me vakataki ira na veimataqali tale eso. Sa nodra i votavota ga o Jiova me vaka a yalataka oti vei ira o koya.

³ Kevaka e dua sa mai vakacabora e dua na bulumakau se na sipi, me qai soli me kedra i votavota na bete na tabana, na galegalena, kei na ketena.

⁴ Me soli talega vei ira na bete na i sevu ni nomuni sila, waini vou, waiwai, kei na vutika ni sipi.

⁵ Sa digitaka o Jiova na mataqali i Livai mai vei ira na nomuni veimataqali kecega me ra qaravi koya ena cakacaka vakabete ka tawa mudu.

⁶ Kevaka e dua na Livai e vinakata me biuta na nona i tikotiko e Isireli, sa na rawa vua me lako mai ki na vanua digitaki me qaravi Jiova kina,

⁷ ka vakaitavi e kea ena cakacaka vakabete vei Jiova na nona Kalou, me vakataki ira na Livai era veiqaravi tiko e kea ena mata i Jiova.

⁸ Me votai talega o koya ena i votavota ni magiti me tautauvata kei ira na bete tale eso, ka dina ga ni ra dau vakailavo ena kena volitaki na i yau vakavuvale.

Vakasala me Kua na i Tovo Vakasisila

⁹ Ni o ni sa yaco ki na vanua sa solia vei kemuni o Jiova na nomuni Kalou, ni kakua sara ni vakamuria na nodra i tovo vakasisila na veimatanitu era tiko kina.

¹⁰ Mo ni kakua ni vakacabori ira na luvemuni ena bukawaqa ni nomuni i cabocabonisoro. Mo ni kakua ni laivi ira na nomuni tamata me ra cakava na cakacaka vakadaurairai, se vakaraica na i vakatakilakila ni vinaka kei na ca, se vakadraunikau,

¹¹ se daucakaisausau, ka tarogi ira se kere i vakasala vei ira na tevoro.

¹² Sa cati ira na tamata sa dau cakava na ka vakasisila vakaoqo o Jiova na nomuni Kalou, ka sai koya o ya na vuna sa vakasavi ira tani kina e matamuni na veimatanitu mai na vanua o ya.

¹³ Me ka taucoko sara na nomuni yalodina tiko vei Jiova na nomuni Kalou.

Na Yalayala me Baleta na Parofita

¹⁴ A qai kaya o Mosese, Ena vanua o ni vakarau la'ki taukena, era dau vakamuria o ira na lewena na nodra i vakasala na daurairai kei ira era kila na i vakatakilakila eso, ia o Jiova na nomuni Kalou sa sega ni vakadonuya mo ni cakava na ka oqo.

¹⁵ Ena solia vei kemuni o Jiova na nomuni Kalou e dua na parofita me vakataki au mai vei ira na wekamuni, ia mo ni talairawarawa vua.

¹⁶ Ena siga o ni a soqoni vata kina mai Ului Saineai, o ni a kerea kina mo ni kakua tale ni rogoca na vosa i Jiova se raica tale na bukawaqa ni nona i serau, de o ni mate.

¹⁷ Ia a qai kaya vei au o Jiova, Era sa kerekere vakayalomatua.

¹⁸ Au na solia vei ira e dua na parofita me vakataki iko. Au na tukuna vua na ka me kaya, ia ena tukuna o koya vei ira na tamata na veika kece au sa vakarota vua.

¹⁹ Ena vosa o koya ena yacaqu, ia au na totogitaka na tamata ena sega ni muria na nona vosa.

²⁰ Ia kevaka e dua na parofita sa tukuna e dua na i tukutuku me baleti ira na veikalou tani, se o koya sa nanuma me vosataka na yacaqu ena dua na vosa ka'u a sega mada ni vakaroti koya kina, ena mate na parofita o ya.

²¹ O ni na taroga beka, se kila rawa vakacava ni sega ni lako mai vei Jiova na i tukutuku ni parofita o ya.

²² Kevaka e dua na parofita e vosa ena yaca i Jiova ka sega ni mani yaco na ka e kaya, sa macala ni sega ni tukutuku i Jiova. Na parofita o ya sa vosa vakaikoya ga, mo ni kakua ni rere kina.