Vakarua 16 - Vakavakadewa Vou kei na iVola tale eso

Na Lakosivia

¹ Mo ni vakarokorokotaki Jiova na nomuni Kalou ena nomuni marautaka na Solevu ni Lakosivia ena vula o Epipi. Na vuna oqo ni a vakabulai kemuni kina o Jiova mai Ijipita ena dua na bogi ni vula o ya.

² Mo ni vakacabora na nomuni i soro ni Lakosivia vei Jiova, mai vei ira na nomuni qele ni sipi kei na bulumakau ena tiki ni vanua sa digitaka o Jiova.

³ Mo ni kakua ni kania vata kei na madrai vakatubu. Me vitu na siga na nomuni kania na madrai sega ni vakatubu, me vaka o ni a kania ni bera na nomuni vakusakusa ka biuti Ijipita mai. Mo ni kania na madrai oqo; ena vakatokai me madrai ni rarawa, mo ni nanuma kina ena veisiga kecega ni nomuni bula na siga o ni a lako tani mai kina mai Ijipita, na vanua ni veivakararawataki.

⁴ Me vitu na siga me kakua ni kune kina e dua na i vakatubu ena dua na vale ena nomuni vanua. Na lewe ni manumanu ka vakamatei ena yakavi ni matai ni siga, me laukana taucoko ena bogi ga o ya.

⁵ Mo ni kakua ni vakacabora na i soro ni Lakosivia ena loma ni dua ga na nomuni veikoro sa solia vei kemuni o Jiova na nomuni Kalou;

⁶ ia me vakamatei ga ena vanua sa digitaka o Jiova na nomuni Kalou me vakatikora kina na yacana. Me vakacabori ena yakavi, na gauna o ni a biuti Ijipita mai kina.

⁷ Mo ni vakasaqara ka kania ga ena vanua sa lesi me dau qaravi kina na Kalou, ka mo ni dui lesu tale ki na nomuni i tikotiko ena mataka cake.

⁸ Ena ono na siga ka tarava mo ni kana madrai sega ni vakatubu kina, ia ena i kavitu ni siga mo ni soqoni vata kina ka lotu vei Jiova na nomuni Kalou; me kakua na cakacaka e siga o ya.

Na Solevu ni Tatamusuki

⁹ Wilika me vitu na macawa mai na gauna o ni tekivu tamusuka kina na nomuni sila,

¹⁰ mo ni qai marautaka na nomuni Solevu ni Tatamusuki. Mai vakarokorokotaki Jiova na nomuni Kalou ena nomuni solia na veika o ni sa lomasoli kina me veiganiti kei na ka ni veivakalougatataki sa sovaraka vei kemuni o Jiova na nomuni Kalou.

¹¹ Mo ni cakava ena reki ena mata i Jiova vata kei ira na luvemuni, kei ira na nomuni dauveiqaravi na Livai, kei na vulagi, kei na luveniyali, kei na yada era tiko ena nomuni veikoro. Ni cakava na ka oqo ena vanua sa digitaki me dau qaravi kina na Kalou.

¹² Nanuma mo ni muria na lawa kece oqo, ka kakua sara ni guilecava ni o ni a bobula tu ena vanua o Ijipita.

Raici Lesu na Solevu ni Valetabanikau

¹³ Mo ni marautaka na nomuni Solevu ni Valetabanikau me vitu na siga, ena gauna o ni sa samu sila oti kina ka qaqia na nomuni qerepi taucoko sara.

¹⁴ Mo ni marautaka vata kei ira na luvemuni, na nomuni dauveiqaravi, na Livai, na vulagi, na luveniyali, kei ira na yada era tiko ena nomuni dui veikoro.

¹⁵ Mo ni vakacaucautaka na nomuni Kalou o Jiova ena solevu oqo me siga vitu, ena vanua sa digitaki me dau qaravi kina o koya. Ni vakayacora ena reki baleta ni sa vakalougatataka o Jiova na nomuni vua ni qele kei na nomuni cakacaka.

¹⁶ Na tagane kece sara ena nomuni vanua me ra dau mai lotu vakatolu vei Jiova na nomuni Kalou ena dua na yabaki, ena vanua sa digitaki me dau qaravi kina o koya, ena Solevu ni Madrai Sega ni Vakatubu, ena Solevu ni Tatamusuki kei na Solevu ni Valetabanikau. Na tagane yadua me na kauta mai e dua na nona i solisoli,

¹⁷ me solia me vaka na ka sa vakalougatataki koya kina o Jiova na nomuni Kalou.

Kena Vakayacori na Lewa Dodonu

¹⁸ Na veimataqali yadua me lesia vei kemuni eso na turaganilewa kei na so na vakailesilesi ena veikoro kece sa solia vei kemuni o Jiova na nomuni Kalou. O ira oqo me ra na lewai ira vakadodonu sara na tamata.

¹⁹ Me ra tamata dodonu, me ra kakua ni veitotaki ena nodra vakatulewa; me ra kakua sara ni taura e dua na i lavo ni veivaqumi, se, dua tale na mataqali i yau, baleta na i loloma vakaoqo sa dau vakamatabokotaki ira na tamata vuku ka vakavuna me ra vakatauca na lewa tawa dodonu.

²⁰ Mo ni cakacaka vakadodonu ka savasava, me rawa kina mo ni la'ki vakaitikotiko ka taukena na vanua sa solia vei kemuni o Jiova na nomuni Kalou.

Vakarau Vakatabui ena Vakacaboisoro

²¹ Mo ni kakua ni biuta e dua na i vakatakarakara buli ena kau ni kalou yalewa o Asera ena yasa ni cabocabonisoro o ni sa cakava vei Jiova na nomuni Kalou;

²² se mo ni vakaduria kina e dua na duru vatu; ni sa cata na veika oqo o Jiova na nomuni Kalou.