Vakarua 15 - Vakavakadewa Vou kei na iVola tale eso

Na i Kavitu ni Yabaki

¹ “Ena veiyavitu na yabaki, mo ni bokoca laivi na nodra dinau kece o ira era dinau vei kemuni.

² Me vakaoqo na kena i vakarau: o ira yadua era solia na dinau vua e dua na nona i tokani na Isireli me bokoca laivi. Me kakua ni la'ki soqona mai na i sau ni dinau, baleta ni sa kacivaki oti na yabaki ni veisereki i Jiova.

³ E rawa mo ni la'ki soqona mai na i sau ni nona dinau e dua na vulagi, ia mo ni kakua ga ni la'ki taura mai na i sau ni nona dinau e dua vei kemuni.

⁴ “Ena vakalougatataki kemuni o Jiova na nomuni Kalou ena vanua sa solia vei kemuni mo ni taukena. Ena sega ni dua vei kemuni ena dravudravua

⁵ kevaka o ni talairawarawa vei Jiova ka vakayacora na vunau kece au sa vakarota vei kemuni edaidai.

⁶ Ena vakalougatataki kemuni o Jiova me vaka sa yalataka. O ni na soli i yau ki na veimatanitu e vuqa, ia o ni na sega ni kerekere mai vua e dua tale; o ni na lewa e vuqa na vanua, ia ena sega ni lewai kemuni e dua na matanitu.

⁷ “Kevaka e tiko e dua na tamata dravudravua ena nodra veikoro na wekamuni, ena vanua sa solia vei kemuni o Jiova na nomuni Kalou, mo ni kakua ni bureitaka vua e dua na ka.

⁸ Ia, me tiko vei kemuni na yalo loloma ni dau solisoli, ka solia wale ga yani vua na veika kecega e gadreva.

⁹ Qarauna mo ni kakua ni vakanananu ca vakaoqo: Sa voleka na i kavitu ni yabaki, na yabaki ni veisereki, mo ni kakua ni vakaraitaka na nomuni yalo ca vua na wekamuni dravudravua o ya ka sega talega ni solia vua e dua na ka. Sa rawa vua me vakamamasu ka beitaki kemuni vei Jiova, ia ena qai kunei kina ni o ni sai valavala ca vakaidina.

¹⁰ Mo ni solia vakalevu vua, ena yalo e savasava; ni o sa kitaka vakaoqo, ena qai vakalougatataki kemuni kei na cakacaka kecega ni ligamuni o Jiova na nomuni Kalou.

¹¹ Ena kunei tikoga ena veigauna kece na tamata dravudravua, o koya oqo au sa vakarota kina mo ni dau dodo liga ka vukei ira na wekamuni kei ira era dravudravua ka vakaleqai tu ena nomuni vanua.

Na Nodra Sereki na Bobula

¹² “Kevaka sa volitaki vei kemuni e dua na wekamuni Iperiu tagane se yalewa, ka sa qaravi kemuni tiko ena ono na yabaki, mo ni qai sereki koya me galala ena i kavitu ni yabaki.

¹³ Ni o ni sa sereka e dua na bobula tagane, mo ni kakua ni vakalaiva me lako liga lala yani.

¹⁴ Mo ni solia wale vua na veika sa vakalougatataki kemuni kina o Jiova na nomuni Kalou, oqo me vaka na sipi, sila kei na waini.

¹⁵ Mo ni nanuma ni o ni a bobula tu mai na vanua o Ijipita, ka qai sereki kemuni mai kina o Jiova na nomuni Kalou; o koya oqo au sa vakarota kina vei kemuni na i vakaro oqo edaidai.

¹⁶ “Ia kevaka sa kaya na nomuni bobula ni sega ni via lako baleta ni lomani kemuni kei na nomuni vuvale ni sa vinaka vua, me sa tiko ga vakadua kei kemuni;

¹⁷ mo ni qai taura e dua na i cula ka cula na vuso ni daligana me kena i tatara na i sogo ni vale, sa na qai nomuni bobula o koya ka tawa mudu. Me qai caka talega na ka oqo vua na nomuni yalewa bobula.

¹⁸ Mo ni kakua ni yalovakatani ni o ni sa sereka e dua na bobula; ka ni a sa qaravi kemuni oti na bobula oqo ena loma ni ono na yabaki ka taura ga e veimama ni kena i sau e dua na tamata cakacaka saumi. Mo ni cakava oqo, ena qai vakalougatataki kemuni kina o Jiova na nomuni Kalou ena ka kecega o ni sa cakava.

Baleti Ira na Ulumatua ni Bulumakau kei na Sipi

¹⁹ “Mo ni vakacabora vei Jiova na ulumatua tagane kece ni nomuni bulumakau kei na nomu sipi. Kua ni vakacakacataka na ulumatua ni nomuni bulumakau, se kotiva na vutika ni nomuni sipi ulumatua.

²⁰ Ena veiyabaki kece mo ni kania na manumanu ulumatua kece kei ira na nomuni vuvale ena mata i Jiova ena vanua sa digitaka o koya me qaravi kina.

²¹ Ia kevaka e dua na ka e leqa vei ira na manumanu, e lokiloki beka, se mataboko, se tauva e dua na mate ca, ia me kakua ni vakacabori oqo vei Jiova na nomuni Kalou.

²² Me ra laukana ga na manumanu vaka o ya ena dui nomuni veikoro. Mo ni kana kece sara kina, o ira era savasava kei ira era tawa savasava, me vaka ga na nomuni kania na kaseli se na dia.

²³ Kakua ni kania na kedra dra, ia me sovaraki ga ki na qele me vaka na wai.