Vakarua 13 - Vakavakadewa Vou kei na iVola tale eso

¹ “Kevaka sa tubu mai vei kemuni e dua na parofita se dua na dautadra ka vakaraitaka vei kemuni e dua na cakacaka mana se dua na ka e veivakurabuitaki,

² ka sa mani yaco dina na cakacaka mana o ya se na ka veivakurabuitaki e tukuna, Ia kevaka e kaya mo ni goleva ka qarava na veikalou tani o ni sega ni kila,

³ mo ni kakua sara ni muria na nona vosa na parofita se dautadra o ya. Sa vakayagataki koya o Jiova na Kalou me vakatovolei kemuni, ka me kila kina se o ni sa lomana dina li na nomuni Kalou o Jiova mai na lomamuni kei na yalomuni, se sega.

⁴ Mo ni muri Jiova ka rokovi koya; mo ni talairawarawa vua ka maroroya na nona i vunau; mo ni qaravi koya ni dou sa sokalou ka yalodina ki vua.

⁵ Ia mo ni vakamatei ira na dautadra se parofita era tukuna vei kemuni mo ni vorati Jiova na nomuni Kalou, o koya ka kauti kemuni tani mai Ijipita na vanua o ni a bobula kina. Sa vu ni ca na tamata o ya ni sa tovolea me kauti kemuni tani mai na sala ni bula sa vakarota vei kemuni o Jiova mo ni bula kina. E dodonu me vakamatei na mataqali tamata vaka o ya me oti kina na ca vei kemuni.

⁶ “Ena rawa sara mada ga vua na tacimuni, se na luvemuni tagane se yalewa, se na watimuni o ni sa lomana, se e dua na wekamuni voleka me vakauqeti kemuni lo mo ni qaravi ira na veikalou tani, na veikalou o ni sega ni bau kila se ra a qarava na nomuni qase.

⁷ E dua tale beka ena rairai uqeti kemuni mo ni cuva ki na nodra kalou na tamata era tiko volekati kemuni, se na nodra kalou o ira era yawa sara mai vei kemuni.

⁸ Ia mo ni kakua sara ni vakadonuya me rawai iko; kakua ni rogoca na nodra vosa. Ni kakua sara ni kauwaitaki ira, se lomani ira, se mo ni taqomaki ira.

⁹ Mo ni vakamatei ira. Mo liutaki ira sara ga ena vakaviriki koya ka qai muri na tamata kecega.

¹⁰ Mo ni vakaviriki koya ena vatu me mate sara baleta ni sa saga me vagolei kemuni tani mai vua o Jiova na nomuni Kalou ka sereki kemuni ni o ni a bobula tu mai Ijipita.

¹¹ Era na qai rogoca kece na Isireli na ka sa yaco, era na qai rere ka na sega ni cakava tale na ka ca oqo vei kemuni.

¹² “Ia kevaka o ni rogoca ni tukuni me baleta e dua vei ira na koro sa solia vei kemuni na nomuni Kalou o Jiova mo ni tikora,

¹³ O ira na tamata ca mai vei kemuni era sa lako yani ka liutaki ira ka vakasesei ira na lewe ni koro ka kaya, “Me da lako ka qaravi ira na veikalou tani eso, o ira o ni sega ni kilai ira.”

¹⁴ Ia kevaka o ni rogoca e dua na ka vakaoqo, ni vaqaqa vinaka sara. Kevaka o ni sa vakadinadinataka ni yaco dina tiko na ka ca oqo,

¹⁵ ni vakamatea kece sara na tamata ena koro o ya ka vakarusa vakadua talega na koro, na ka kecega era tiko kina kei na nodra manumanu kece sara.

¹⁶ Kumuna vata kece na veika era taukena na tamata ena koro o ya ka mai binia ena loma ni rara, ka vakama vata, na koro kei na veika kece sara e tu kina me i soro kama vei Jiova na nomuni Kalou. Me kakua sara ni tara cake tale ka me biu sara tu ga me rusa vakadua.

¹⁷ Mo ni kakua sara ni maroroya me nomuni e dua na ka e dodonu me vakarusai; ena qai vuki kina o Jiova mai na nona cudru waqawaqa me lomani kemuni. Ena qai yalo loloma vei kemuni ka vakalewevuqataki kemuni me vaka sa yalataka vei ira na nomuni qase,

¹⁸ kevaka o ni na muria na nona i vakaro kecega au sa wasea vei kemuni edaidai mo ni cakava na ka sa dodonu ena mata i Jiova na nomuni Kalou.