Vakarua 12 - Vakavakadewa Vou kei na iVola tale eso

Vakarusa na i Cabocabonisoro Tani

¹ “Sai ira oqo na lawa kei na i vunau mo ni qarauna vinaka sara mo ni muria ena gauna kece o ni bula kina ena vanua sa solia vei kemuni o Jiova na nodra Kalou na nomuni qase. Mo ni vakatudaliga kina!

² Ena vanua o ni sa na taukena, mo ni talaraka sobu na vanua kece era dau qarava kina na nodra kalou o ira na kena i taukei e liu; oqori ena veiulunivanua cecere, ena veidelana, kei na veiruku ni vunikau draudrau vinaka.

³ Mo ni basuraka sobu na nodra i cabocabonisoro kece ka vorolaka na nodra matakau vatu. Ni vakama na i vakatakarakara kece nodra kalou yalewa o Asera, ka taya sobu na nodra matakau ceuti kecega, me kakua tale ni qaravi ena veivanua o ya.

⁴ “Mo ni kakua sara ni qaravi Jiova na nomuni Kalou ena i valavala era qarava kina na nodra veikalou na veimatatamata oqo.

⁵ Ia mo ni qai vakasoqoni vata ga ena vanua ena digitaka o Jiova na nomuni Kalou mai na nodra vanua na veimataqali kece sara me na vakatikora kina na yacana. Mo ni qai dau lako kina,

⁶ ka vakacabora vua na nomuni soro kama kei na nomuni i soro tale eso, na dua na i katini ni nomuni yau, na nomuni solisoli, na i loloma o ni sa yalataka vei Jiova, na ka o ni via solia kei na ulumatua ni nomuni bulumakau kei na nomuni sipi.

⁷ Mo ni kana mai kea ena mata i Jiova na nomuni Kalou ena marau, oi kemuni kei ira na nomuni vuvale ena vuku ni veika vinaka sa vakalougatataki kemuni kina o Jiova.

⁸ “Mo ni kakua ni la'ki vakayacora me vaka na ka eda cakava tiko edaidai, me cakava na tamata yadua na ka e dui vinaka vua,

⁹ ka ni o ni sa bera ni yacova na vanua ni vakacegu kei na nomuni votavota ka sa solia vei kemuni o Jiova na nomuni Kalou.

¹⁰ O ni na qalo kosova na uciwai na Joritani, ka tawana na vanua sa solia vei kemuni o Jiova na nomuni Kalou me nomuni votavota. Sa na taqomaki kemuni o koya mai vei ira na kemuni meca me yaco kina mo ni bula sautu.

¹¹ Ia, ki na vanua sa digitaka o Jiova me i tikotiko ni yacana, mo ni kauta kina na veika kece au sa vakarota vei kemuni: na nomuni i soro kama, na i madrali, na i katini, na i loloma kei na ka talei eso o ni sa yalataka vei Jiova.

¹² Mo ni marau mai kea, ena mata i Jiova na nomuni Kalou, o iko kei ira na luvemuni na nomu dauveiqaravi, kei ira na kawa i Livai era tiko ena nomuni veikoro, o ira ka sega na nodra tiki ni qele, se, taukena e dua na ka ena koro.

Na Vanua ni Vakacaboisoro

¹³ Qarauna, mo ni kakua ni vakacabora na nomuni soro ena vanua ga o ni vinakata.

¹⁴ Mo ni vakacabora ga ena vanua sa digitaka o Jiova, ena loma ni dua na vanua ena nomuni mataqali. Me vakacabori taudua ga e kea na nomuni veisoro kama ka cakava talega kina na veika kece au sa vakarota vei kemuni.

¹⁵ “Ia sa vakatarai vei kemuni mo ni vakamatea ka kania na nomuni manumanu ena veivanua ga o ni tiko kina. Ni kania ga na levu ni ka sa solia vei kemuni o Jiova na nomuni Kalou. Ni kania kece, o ira era savasava kei ira era tawa savasava me vaka o ni kania na lewe ni dia se lewe ni kaseli.

¹⁶ Na kedra dra mo ni kakua ni kania: ia me sovaraki ga ki na qele me vaka na wai.

¹⁷ Se me kakua sara ni dua na ka o ni vakacabora vua o Jiova me laukana ena nomuni dui tikotiko: me vaka na i katini ni nomuni sila, waini, se, waiwai ni olive; ka vaka talega kina na ulumatua ni nomuni sipi kei na nomuni bulumakau, na ka o ni yalataka, se ka o ni via solia, se dua tale na i solisoli.

¹⁸ Mo ni kania ga na veika oqo ena mata i Jiova na nomuni Kalou ena vanua sa digitaki mo ni qaravi koya kina: oi kemuni vata kei ira na luvemuni, o ira na nomuni dauveiqaravi vata kei ira na kawa i Livai era tiko ena nomuni veikoro. O ni na marau ena mata i Jiova na nomuni Kalou ena ka kecega o ni cakava.

¹⁹ Ni qarauna vinaka mo ni kakua sara ni weletaki ira na luve i Livai ena gauna kecega o ni bula kina ena nomuni vanua.

²⁰ “Ia ena gauna sa vakalevutaka kina na i yalayala ni nomuni vanua o Jiova na nomuni Kalou me vaka sa yalataka vei kemuni, sa tara mo ni kana lewe ni manumanu ena gauna ga o ni gadreva kina.

²¹ Ia kevaka sa rui yawa na vanua sa digia o Jiova me dau qaravi kina, sa rawa mo ni vakamatea ga na nomuni bulumakau se sipi sa solia vei kemuni o Jiova; me vaka au a sa vakarota oti vei kemuni, ia mo ni kania ga ena loma ni nomuni veikoro ena gauna o ni vinakata kina.

²² Io, me vaka ni laukana na kaseli se dia, o koya oqo mo ni qai kania; ka me qai kana kina o koya sa tawa savasava kei koya sa savasava.

²³ Ni qarauna ga mo ni kakua ni kania na dra; ka ni dra sai koya na bula, ka o na sega ni kania vata na bula kei na lewena.

²⁴ Kua ni kania na dra, ia mo ni sova ga yani ki na qele me vaka na wai.

²⁵ Kua ni kania na dra, ena qai yaco kina me vinaka na ka kecega vei kemuni kei ira na nomuni kawa, baleta ni o ni sa cakava na ka dodonu ena mata i Jiova.

²⁶ Kauta kece na nomuni i soro kei na veisolisoli o ni sa yalataka vei Jiova ki na vanua ena digitaka o koya mo ni qaravi koya kina.

²⁷ Mo ni cabora na nomuni soro kama, na lewena kei na dra; ena i cabocabonisoro i Jiova na nomuni Kalou; na dra ni veisoro tale eso me qai liviraki ena yasa ni cabocabonisoro i Jiova na nomuni Kalou, ia mo ni qai kania na lewe ni manumanu.

²⁸ Mo ni qarauna mo ni talairawarawa ki na veivosa kece au sa vakarota vei kemuni edaidai ena qai yaco kina me vinaka na veika kecega vei kemuni kei ira na nomuni kawa ka tawa mudu, baleta ni o ni sa cakava na veika dodonu ka vinaka ena mata i Jiova na nomuni Kalou.

Vakasala me Kua na Qaravi Kalou Matakau

²⁹ O Jiova na nomuni Kalou ena vakarusa na veimatanitu ena gauna o ni curuma kina vakaukauwa na nodra vanua, ka o ni na tawana ka vakaitikotiko kina.

³⁰ Ni sa vakarusai ira oti na veimatanitu oqo o Jiova, mo ni qarauna vinaka mo ni kakua ni muria na i valavala ni nodra qaravi kalou, ni na vakatubura na leqa. Kakua ni la'ki vulica na nodra qaravi kalou mo ni mai vakadadamuria ena nomuni qaravi Jiova.

³¹ Mo ni kakua ni qaravi Jiova na nomuni Kalou ena i valavala era qarava kina na nodra kalou, ka sa cata sara o Jiova na veika vakasisila kece era dau cakava ni ra qarava na nodra veikalou. Sa rawa me ra vakama sara na luvedra ena bukawaqa ni nodra i cabocabonisoro, me cabo vua na nodra kalou.

³² Mo ni vakayacora na veika kece sara au sa vakarota vei kemuni; ka kakua ni kuria tale, se kauta tani kina e dua na ka.