Vakarua 10 - Vakavakadewa Vou kei na iVola tale eso

Ciqoma Tale o Mosese na Vunau e Tini

¹ “Ena gauna o ya a qai kaya vei au o Jiova, ‘Mo taya na vatu raraba me vaka na vatu e rua e liu, ka cakava talega e dua na kato kau, ka cabe cake mai vei au ki na ulunivanua.

² Au na qai vola ena vatu e rua oqori na veika au a vola ena vatu e rua o a voroka, ka tawani rau ena kato.’

³ “Au a qai cakava e dua na kato ena kau akasia ka taya e rua na vatu raraba me vaka na kena e rua e liu, ka cabetaka cake ki na ulunivanua.

⁴ A qai vola tale o Jiova ena vatu e rua o ya na veika sa vola ena vatu e rua e liu, o ya na Vunau e Tini ka vakaroti kemuni kina ena gauna ka a vosa kina vei kemuni mai na bukawaqa ena siga o ni a soqoni vata kina ena ulunivanua. A qai solia vei au o Jiova na vatu raraba e rua.

⁵ Au a qai vuki ka sirova sobu mai na ulunivanua ka mai tawana sara na vatu raraba e rua ena kato kau au a cakava me vaka a vakarota vei au o Jiova.”

⁶ (Era a qai biuta mai na nodra drano na kai Jeekani o ira na Isireli, ka ra gole yani i Mosera. A mate ka bulu talega e kea o Eroni, ka sa mani sosomitaki koya o Iliesa na luvena, me bete.

⁷ Mai kea era a qai lako i Kutikota, ka gole sara yani i Jotipaci, e dua na vanua e levu kina na wai drodro.

⁸ E a lesi ira na tamata ena mataqali i Livai o Jiova ena gauna o ya me ra colata na Kato ni Veiyalayalati nei Jiova, me ra qaravi koya ena i tavi vakabete ka cavuta na vosa ni veivakalougatataki ena yacana me yacova mai na siga oqo.

⁹ Sai koya oqo a sega kina na nodra i votavota ni vanua na mataqali i Livai me vakataki ira na vo ni veimataqali. Sa nodra i votavota ga na veivakalougatataki ni tavi me ra bete i Jiova, me vaka sa yalataka vei ira o Jiova na nomuni Kalou.)

¹⁰ Au a tiko ena ulunivanua me vasagavulu na siga kei na bogi me vaka na noqu a tiko kina e liu. A mani rogoci au tale o Jiova ka vakadonuya me kakua ni vakarusai kemuni.

¹¹ A qai kaya vei au o Jiova, “Mo lako ka liutaki ira na tamata me ra curuma ka tawana sara na vanua au a bubuluitaka me'u solia vei ira na nodra qase.”

Veika sa Vinakata na Kalou

¹² “Ia oqo, mo ni rogoca na Isireli na veika sa vinakata mai vei kemuni o Jiova na nomuni Kalou. Mo ni rerevaki Jiova ka vakayacora na nona i vakaro kecega. Mo ni lomani Jiova ka qaravi koya ena lomamuni taucoko kei na yalomuni taucoko,

¹³ ka muria na nona i vunau kei na nona i vakaro au sa vakarota vei kemuni edaidai mo ni vinaka kina.

¹⁴ E dina ga ni sa nei Jiova na nomuni Kalou na lomalagi kei na lomalagi e cake sara, ka vakakina na vuravura kei na veika kecega sa tu kina,

¹⁵ ia sa vagoleya ga o Jiova na yalona me kauwaitaki ira ga na nomuni qase ka sa digitaki kemuni kina, oi kemuni na nodra kawa, mai vei ira na matanitu kecega, me vaka na siga edaidai.

¹⁶ Ia oqo, mo ni ciliva kina na yalomuni, ka mo ni kakua tale ni vakadrecike tiko.

¹⁷ Ni o Jiova na nomuni Kalou sai koya na Kalou ni veikalou ka Turaga ni veituraga, na Kalou levu, sa kaukauwa ka qaqa, sa sega ni veivakaduiduitaki ka sega ni taura na i vaqumi.

¹⁸ Sa ia na lewa dodonu ena vukudra na luveniyali kei na yada. Sa lomani ira na vulagi ka solia na kedra kei na nodra i sulu.

¹⁹ O koya oqo mo ni dau lomani ira talega na vulagi baleta ni o ni a tu vakavulagi talega mai Ijipita.

²⁰ Mo ni rerevaki Jiova na nomuni Kalou. Mo ni qaravi koya ka yalodina vua, ka vosa ni yalayala ena vuku ni yacana duadua ga.

²¹ Mo ni dau vakalagilagi koya na nomuni Kalou, ka a cakava ena vukumuni na veika lelevu, ka veivakurabuitaki sa raica na matamuni.

²² Ena gauna era a lako sobu kina na nomuni qase ki Ijipita era a lewe vitusagavulu wale ga. Ia oqo sa vakalewevuqataki kemuni o Jiova na nomuni Kalou me vaka na levu ni veikalokalo ni lomalagi.