Taniela 9 - Vakavakadewa Vou kei na iVola tale eso

Masulaki Ira na Kai Nona o Taniela

¹ O Taraiasi na luve i Asuerosi, a vola kawa ki na matanitu o Mitia, ia a tui tiko ni matanitu o Papiloni.

² Ena i matai ni nona yabaki ni tui, oi au, o Taniela, au a vulica ka vakadikeva tiko eso na i vola tukutuku vakatabui, ka'u mani vakananuma tiko na vosa ni Turaga vei Jeremaia na parofita, ka ni na rusa koto mada o Jerusalemi me vitusagavulu na yabaki.

³ Au sa masu ka kerekere vua na Turaga na Kalou. Au sa cikecike vagumatua sara vua, au a lolo tiko, au vakaisulu taga ka dabe tu ena dravusa.

⁴ Au sa masu vua na Turaga na noqu Kalou, ka'u vakatusa vua na neimami i valavala ca, vakaoqo: “Turaga na Kalou, o ni sa kaukauwa ka qaqa ka keimami sa vakarokoroko vei kemuni. Oi kemuni o ni sa tudei tu ga ena nomuni vosa ni yalayala ka vakaraitaka na loloma e sega ni yalani vei ira era lomani kemuni ka cakava na lomamuni.

⁵ Keimami sai valavala ca; keimami sa ca sara; keimami sa caka cala. Keimami dau saqata na ka o ni vakarota me keimami cakava ka gole tani mai na veika o ni vakaraitaka vei keimami ni dodonu.

⁶ Keimami sega sara ni bau vakarorogo vei ira na nomuni tamata na parofita, o ira era a vosa ena yacamuni vei ira na neimami tui, na neimami turaga, na neimami i tubutubu kei na neimami vanua.

⁷ Oi kemuni na Turaga, o ni sa yalo dodonu, ia oi keimami ga keimami sa dau cakava na ka ni veivakamaduataki ka vaka talega kina o ira era tiko mai Juta kei Jerusalemi, kei ira kecega na Isireli o ni a vakasavi ira me ra talabusese ki na veivanua voleka kei na veivanua yawa ena vuku ni nodra gole tani mai vei kemuni.

⁸ O ira na neimami tui, na neimami turaga kei ira na neimami qase, era a cakava na veika veivakamaduataki ka ra cakava na i valavala ca vei kemuni, Turaga.

⁹ O ni a dauloloma ka dauveivosoti, oi keimami ga keimami a dau saqati kemuni.

¹⁰ Keimami a sega ni vakarorogo vei kemuni, Turaga na Kalou, o ni a tukuna vei keimami me keimami vakaitovotaki keimami me vaka na lawa o ni a solia vei ira na nomuni parofita me neimami.

¹¹ Sa voroka na nomuni lawa o Isireli taucoko ka bese ni vakarorogo ki na ka o ni tukuna. Keimami a caka cala vei kemuni ka o ni a vakatauca vei keimami na kena i sau sa tukuni tu ena Lawa i Mosese, na nomuni tamata.

¹² O ni sa cakava na ka o ni a kaya ni o ni na kitaka vei keimami kei ira na neimami turaga. O ni sa vakanakuitataki Jerusalemi vakabibi cake mai na dua tale na koro levu e vuravura taucoko.

¹³ A tau oti vei keimami na i totogi kecega a vakamacalataki tu ena Lawa i Mosese. Ena gauna sara ga oqo, Turaga na neimami Kalou, keimami a sega ni bau tovolea me keimami vakayalovinakataki kemuni ena neimami gole tani mai na neimami ca, se, ena neimami muria na nomuni dina.

¹⁴ Oi kemuni, Turaga na neimami Kalou, o ni sa vakarau tu mo ni vakanakuitataki keimami, ka o ni sa vakayacora sara talega, baleta na veika kecega o ni vakayacora sa dodonu; oi keimami ga keimami sega ni vakarorogo vei kemuni.

¹⁵ Turaga na neimami Kalou, o ni a vakaraitaka na nomuni kaukauwa ena nomuni a kauti ira tani mai Ijipita na nomuni tamata; na kaukauwa oqori e sa nanumi tu ga ena gauna oqo. Keimami sai valavala ca; keimami sa caka cala.

¹⁶ Oi kemuni o ni yalo dodonu, ia mo ni kakua soti ni qai cudruvi Jerusalemi tiko. Na koro o ya e nomuni, ia ena nomuni ulunivanua tabu. Era sa beci Jerusalemi o ira na lewe ni veivanua era volekata, ka ra beci keimami talega ena vuku ni neimami i valavala ca kei na veika ca era a cakava na neimami qase.

¹⁷ Kemuni na Kalou, ni rogoca mada na noqu masu kei na noqu cikecike, vei kemuni ena vakanuinui mo ni taleva mada na nomuni vale tabu. Ni sa tara vou tale me kila kina na tamata yadua ni o ni sa Kalou.

¹⁸ Ni vakatudaliga vei keimami na Kalou; ni raici keimami kei na leqa keimami sa tu kina, ka bau raica na leqa ni koro levu sa vakayacani vei kemuni. Keimami sa masu tiko vei kemuni ena vuku ni o ni sa yalo loloma, ka sega ena vuku ni neimami caka dodonu.

¹⁹ Turaga, ni vakatudaliga vei keimami. Turaga, ni vosoti keimami. Turaga, ni rogoci keimami, ka vakayaco-ka sara, ni kakua ni vakaberabera! Ia me kila tiko na tamata yadua ni o ni sa Kalou. Ni kakua ni lokuyara! Na koro oqo kei na kawa tamata oqo sa nomuni.”

Vakamacalataki na Parofisai

²⁰ Au a masu ka vakatusa tikoga na noqu i valavala ca kei na nodra na kai noqu na Isireli, ka'u a cikecike tikoga vua na Turaga na noqu Kalou me tara vou tale na vale tabu.

²¹ Ia ni'u masu tikoga, a lako vakasauri sobu mai ki na vanua au a tiko kina na tamata ka yacana o Kaverieli, o koya au a raica ena i matai ni noqu raivotu. Sa donuya tiko oqo na gauna ni vakacaboisoro ena yakavi.

²² A qai vakamacala o koya, ka kaya, “I Taniela, au sa lako mai me'u mai vukei iko mo kila na parofisai.

²³ Ni o a tekivu cikecike vua na Kalou, sa rogoci iko sara o koya. Au sa lako mai oqo me'u mai tukuna vei iko na kena macala, ena vuku ni sa lomani iko na Kalou. Mo vakarorogo vakavinaka sara vei au me'u vakamacalataka vei iko na raivotu.

²⁴ Sa loku e vitusagavulu na macawa, me baleti ira na kai nomu kei na koro tabu, me vakaoti kina na nomuni dau caka cala kei na nomuni i valavala ca tiko. Ni oti na gauna oqori, sa na bokoci na i valavala ca, ka sorovaki na caka cala me vakayacori na i valavala ka vakadeitaki na raivotu kei na vosa ni parofisai, ka na qai vakatabui na Tikina Tabu Sara.

²⁵ Mo vakasamataka talega na ka oqo ka kila tiko: mai na gauna sa tau kina na lewa me tara vou tale o Jerusalemi, ena caka vou vata kei na kena veigaunisala, me yacova na gauna ni nona lumuti na luve ni Tui ena macawa kei na 62 na macawa (434 na yabaki), ia ena gauna oqori ena levu sara kina na tiko vakaca.

²⁶ Ni oti na onosagavulu karua na macawa sa na muduki o koya na lumuti digitaki ni Kalou. Sa na qai yaco mai na kena i vakataotioti me vaka na coka ni dobui, ia na kena i vakataotioti na i valu. Na lewa me ia na veivakarusai.

²⁷ Na i liuliu oqo ena ia na veiyalayalati kei na lewe vuqa na tamata, o koya sa na dei ka yabaki vitu. Sa na qai vakavuna o koya na muduki ni vakacaboisoro kei na i madrali ka tolu veimama na yabaki. Ena tikina cecere duadua ni Valenisoro, sa na la'ki vakatikori kina na Matakau Vakasisila, me yacova ni sota kaya o koya ka vakatikora kina na i otioti ni ka sa vakarautaka na Kalou me nona.”