Taniela 6 - Vakavakadewa Vou kei na iVola tale eso

O Taniela ena Qara ni Laione

¹ A sa qai lewa o Taraiasi me lesia e lewe 120 na kovana me ra vakailesilesi ena nona matanitu taucoko.

² A digitaki Taniela kei na lewe rua tale o koya me ratou dau vakaraica na nodra cakacaka na kovana, ka qarauna talega me daumaka tu na veika e baleti koya na tui.

³ Ni dede ga vakalailai, a raici rawa vei Taniela ni daumaka cake na nona cakacaka mai vei ira na i liuliu kei ira na kovana. Me vaka ni uasivi sara na cakacaka i Taniela, a qai lewa na tui me lesi koya me lewa na matanitu taucoko.

⁴ E kea, era sa qai tovolea kina o ira na i liuliu kei ira na kovana me ra kunea vei Taniela e dua na cala ni veiliutaki ena matanitu, ia era a sega ga ni kunea e dua na cala ni nona cakacaka baleta ni sa tamata dina o Taniela, ka sega ni bau cakava e dua na ka e ca.

⁵ Era a veivosaki ka ra kaya, “Eda na sega ni kunea rawa e dua na cala me da beitaki Taniela kina, ia ena rawa i koya ga ena ka e baleta na nona lotu.”

⁶ Era a qai la'ki raica na tui ka kaya vua, “I Taraiasi na tui, mo ni bula ka sega ni mudu!

⁷ Oi keimami saka, o iratou na i liuliu, o ira na kovana, na i sosomi ni kovana kei ira na dauvakasala oi keimami na veiliutaki tiko ena nomuni matanitu na tui, keimami sa loma vata ni dodonu mo ni bulia na tui e dua na i vakaro vakalawa se lewa vakaturi ka me vakadonui vakalawa me vaqaqacotaki sara na kena muri. Mo ni vakarota ni sa tabu dredre vua e dua me kerekere vua e dua na kalou se vua e dua na tamata vakavo ga vei kemuni na tui, ka me tolusagavulu na siga na kena dede. O koya ena basuka na lawa oqo me viritaki ki na dua na qara ni laione.

⁸ Mo ni bulia mada na lewa vakatui oqo ka me qai vakadonui vakalawa ka mo ni qai sainitaka me yaco me lawa me vaka na nodra lawa na kai Mitia kei Perisia, ni na sega ni veisautaki rawa.”

⁹ A qai sainitaka o Taraiasi na lewa vakaturi me sa lawa.

¹⁰ Ia sa kila o Taniela ni sa sainitaki oti na lawa vou, a sa qai lako ki na nona vale. Ena rumu ni tabavale e cake ni nona vale, a tiko kina e tolu na katuba ka qara tu vaka ki Jerusalemi. Ena rumu oqori, a sa tekiduru sobu ena mata ni katubaleka sa dola tu o Taniela, ka masu vakatolu vua na Kalou ena veisiga me vaka na nona i valavala.

¹¹ Ni ra a qai kunei Taniela o ira na nona meca ni masu tiko vua na Kalou,

¹² era a qai lako kece vua na tui ka beitaki koya vua. Era sa kaya, “Kemuni na tui, o ni a bulia oti e dua na lawa ka tukuni kina ni kevaka e dua e kerekere vua e dua na kalou se vua e dua na tamata, vakavo ga vei kemuni na tui ena loma ni tolusagavulu na siga, ena viritaki o koya ki na qara ni laione.” Sa qai sauma na tui, ka kaya, “Io, na lawa me vakamuri vakadodonu sara, ka tautauvata kei na nodra lawa na kai Mitia kei na kai Peresia, ka na sega ni veisautaki rawa.”

¹³ Era a qai kaya vua na tui, “O Taniela saka, e dua vei ira na kau vakabobula mai Juta, sa sega ni dokai kemuni na tui se muria na lawa o ni a virikotora. Sa masu tiko vakatolu ena veisiga o koya vua na nona Kalou.

¹⁴ Ni sa rogoca na tui na ka oqo, a taqaya vakalevu na lomana, ka tovolea me vakasaqara e dua na sala me vakabulai Taniela kina. A tovolea tiko oqo me yacova na dromu ni siga.

¹⁵ Era a qai lesu tale mai na meca i Taniela vua na tui, ka kaya vua, “O ni sa kila na tui na i vakarau ni nodra lawa na kai Mitia kei Peresia ni sa sega ni dau veisautaki tale na lawa sa vakatura na tui.”

¹⁶ A qai vakarota na tui me kau o Taniela ka la'ki viritaki ki na qara ni laione. Ia a vosa na tui vei Taniela ka kaya, “Me qai vakabulai iko na nomu Kalou, o koya o sa dau qarava ena yalodina.”

¹⁷ Era a qai kauta mai e dua na vatu ka sogota kina na gusu ni qara. A sa qai dregata na tui na nona i vakatakilakila vakatui ena vatu kei na nodra i vakatakilakila na nona vakailesilesi turaga me kakua kina ni veisautaki tale e dua na ka me baleti Taniela.

¹⁸ E a qai lesu tale na tui ki na valenitui ka sega ni moce rawa ena bogi taucoko o ya, a sa sega ni kana se bau la'ki vakamarautaki koya me vaka na kena i valavala.

¹⁹ Ena mataka lailai ni siga ka tarava, a sou na tui ka vakusakusa yani ki na qara ni laione.

²⁰ Ia ni voleka yani, a kaci ena nuiqawaqawa, ka vaka, “I Taniela, na nona tamata na Kalou bula! Sa vakabulai iko beka mai na gusu ni laione na Kalou o sa dau qarava ena yalodina?”

²¹ A sauma o Taniela, ka kaya, “Mo ni bula na tui, ka sega ni mudu!

²² Na noqu Kalou sa tala mai na nona agilosi me sogota na gusudra na laione me ra kakua kina ni vakamavoataki au. Oi kemuni na tui, a sa vakayacora ga na ka oqo baleta ni sa kila o koya ni sa sega na noqu cala, ka'u a sega talega ni caka cala vei kemuni.”

²³ A qai marau vakalevu sara na tui, ka a vakarota me la'ki yavi cake mai na qara ni laione o Taniela. Era a qai yavi koya cake mai ka ra kunea ni sega sara ga ni bau mavoa vakalailai, baleta ni sa vakabauta na Kalou.

²⁴ A qai vakarota na tui me ra viritaki kece sara ki na qara ni laione o ira na tamata era a beitaki Taniela, ia me ra viritaki vata kina kei na watidra vata kei na luvedra. Ia ni bera ga ni ra tau vakavinaka yani ki na boto ni qara, era a basuraki ira na laione ka ra musulaka ka qurulaka na suidra.

²⁵ A qai volavola o Taraiasi na tui vei ira na duikaikai kei na duivosavosa mai na veiyasana kecega e vuravura, ka vakaoqo: “Ni sa bula vinaka!

²⁶ Au sa vakaroti kemuni yani oqo na tamata yadua mai na veiyasana kecega ena noqu matanitu mo ni rerevaka ka rokova na Kalou i Taniela. “A Kalou bula o koya Ka na tui tikoga ka sega ni mudu. Ena sega ni vakarusai rawa na nona matanitu Ka na sega ni oti rawa na nona kaukauwa.

²⁷ Sa veivakabulai ka veivueti; Sa cakava na veika e veivakurabuitaki kei na cakacaka mana Mai lomalagi kei vuravura. Sa vakabulai Taniela mai na nodra kaukauwa na laione.”

²⁸ A qai tiko vakacegu ka marau o Taniela ena gauna ni tui i Taraiasi kei na gauna sa tui tiko kina o Sairusi na kai Peresia.