Taniela 5 - Vakavakadewa Vou kei na iVola tale eso

¹ Ena gauna a tui tiko kina o Pelisasari na tui, e a sureti ira e lewe 1000 na turaga ki na dua na solevu ni kana, ka sa tiko sobu ka gunu waini vata kei ira.

² Ni ra gunu waini tiko, a qai vakarota o Pelisasari me ra la'ki kau mai na bilo koula kei na bilo siliva ka a kauta vakai tokinivalu mai na vale tabu mai Jerusalemi o Nepukanesa na tamana. A sa vinakata na tui me ra mai gunu waini kina o koya, o ira na turaga sureti, o ira na watina kei ira na watina lalai.

³ Era a qai la'ki kauta mai na bilo koula, ka ra mai vakayagataka me ra gunu waini kina.

⁴ Era a gunu waini ka vakavinavinaka vei ira na kalou koula, na kalou siliva, na kalou parasa, na kalou kaukamea, na kalou kau, kei na kalou vatu.

⁵ E qai vakasauri ni sa basika e dua na liga ni tamata ka sa volavola ena lalaga boro lase e loma ni valenitui, ena vanua ka lauta vakavinaka tiko na rarama ni cina ni loma ni vale. Sa raica rawa sara ga na tui na liga o ya ni volavola tiko.

⁶ A vulaci na yago ni tui ka sautaninini na duruna ena levu ni nona rere.

⁷ A qai kacikaci o koya me dua e la'ki kauti ira mai na daucaka mana, o ira na vuku kei ira na dautukuna na kalougata. Ni ra curu mai, sa qai kaya vei ira na tui, “O koya ga vei kemuni e wilika rawa na volavola oqo ka tukuna vei au na kena i balebale, sa na tokara o koya na kote lokaloka balavu vakatui ka taubena na i taube sinucodo koula ni veidokai; ia sa na i katolu o koya vei keitou na liu ena matanitu oqo.”

⁸ Era a yaco kece yani na dauvakasala ni tui, ia e a sega sara ni dua vei ira e wilika rawa na volavola se tukuna na kena i balebale vua na tui.

⁹ E kea, a qai taqaya vakalevu ga na tui ka vulaci vakalevu cake na yagona, ka ra veilecayaki na nona tamata turaga ena ka me ra cakava.

¹⁰ Ia a rogoca na marama tina ni tui na nodra maue na tui kei ira na nona vakailesilesi turaga, ka mani curu yani vei ira ki na loma ni olo ni veivakamarautaki. A sa kaya na Ranadi, “Mo ni bula na tui ka sega ni mudu! Ni kakua ni kidroa se rairai vulaci mai.

¹¹ E tiko voli ena nomu matanitu e dua na tamata ka tiko vua na yalodra na kalou tabu. Ni a tui tiko na tamamuni, a kunei na tamata oqo ni sa yalomatua ka kila-ka, ka vuku sara me vaka na nodra vuku na kalou. Sa qai lesi koya na tamamuni, o Nepukanesa na tui, me nodra i liuliu na daukilakila, na daucaka mana, na vuku kei ira na dautukuna na kalougata.

¹² Na ka e rawata sa kunekune vakavudua na tamata e yacova. Sa vuku ka matai sara ena vakamacalataka na tadra, sa kila na serelaka na iba ka vakamacalataka na veika vuni. E dodonu mo ni talatala me la'ki lako mai na tamata oqo o Taniela, o koya ka sa vakayacana na tamamuni na tui me o Pelitisasari, ka me mai vakamacalataka vei iko na i balebale ni ka oqo.”

Vakamacalataki na Volavola

¹³ A qai la'ki kau mai o Taniela ki vua na tui. A sa qai tarogi koya na tui, “O iko li o Taniela, e dua vei ira na Jiu kaivesu a kauti ira mai Jutia na tamaqu na tui?

¹⁴ Au rogoca ni tiko vei iko na yalodra na kalou tabu, ka o sa matai sara, ka kila-ka, ka vuku.

¹⁵ Era a la'ki kacivi mai na dauvakasala kei ira na daucaka mana me ra mai wilika na volavola oqo ka tukuna vei au na kena i balebale, ia era a sega ni kila rawa na kena i balebale.

¹⁶ Au rogoca ni sa rawa vei iko mo kunea na ka sa vunitaki na kena i balebale, ka vakamacalataka na veika vuni. Kevaka o wilika rawa na volavola oqo ka tukuna vei au na kena i balebale, o sa na tokara na kote lokaloka balavu vakatui ka taubena na i taube sinucodo koula ni veidokai, ka o sa na i katolu talega ena i tutu ni veiliutaki ena matanitu.”

¹⁷ Sa qai kaya o Taniela, “Na nomuni solisoli loloma me nomuni ga, se mo ni solia vua e dua tale. Ia au na wilika ga vei kemuni na tui na ka sa volai tu, ka tukuna na kena i balebale.

¹⁸ Na Kalou Cecere a buli tamamuni, o Nepukanesa na tui, me dua na tui kaukauwa ka qaqa ka solia vua na dokai kei na lagilagi.

¹⁹ Sa ka levu na nona kaukauwa kei na qaqa, ka ra sa rere ka sautaninini vua o ira na duikaikai kei na duivosavosa mai na veivanua kecega. Kevaka e via vakamatea o koya e dua na tamata, ena vakayacora ga; kevaka e via vakabula e dua na tamata, ena vakayacora ga. Sa vakalevulevuya se vakalolomataka e dua ga me vaka sa lomana kina.

²⁰ Ia ni sa tubu na qaciqacia kei na dokadoka e lomana, ka sa cakacaka kina vakaviavialevu, sa qai sivo kina mai na nona i tutu vakatui, ka sa kau tani mai vua na nona lagilagi.

²¹ A vakasevi tani mai na tiko vakatamata, ia na nona vakasama sa yaco me tautauvata kei na vakasama ni manumanu. Sa la'ki bulavata kei ira na ose, kana co me vaka na bulumakau, sa moce kina e tautuba ka lutuki koya na tegu ni lomalagi, me yacova ni sa vulica ni o koya na Kalou levu ni lomalagi sa vakatulewa vei ira na veimatanitu ni tamata kecega, ka sa bulia me tui o koya sa gole kina na lomana.

²² Ia o iko, na luvena tagane, e dina ga ni o sa kila oti tu na veika oqo, o sa sega ga ni bau vakamalumalumutaki iko.

²³ O sa kitaka ga na ka ca vua na Turaga ni lomalagi ka vakacuruma mai ki na vale oqo na bilo era sa kau mai na nona vale tabu. O iko, o ira na nomu turaga, o ira a watimu kei ira na watimu lailai o ni sa gunu waini ena bilo kecega oqo ka vakavinavinaka vei ira na kalou koula, na kalou siliva, na kalou parasa, na kalou kaukamea, na kalou kau kei na kalou vatu, na kalou era sa sega ni rai se rogo, ka sega na ka era kila. Ia o iko o sa sega ni doka na Kalou, o koya sa lewa na nomu bula kei na veika kecega o vakayacora.

²⁴ Sa i koya oqo na vuna sa tala mai kina na liga me mai vola na veivosa oqo.

²⁵ Oqo na ka sa volai tu: ‘Mini, Mini, Tikeli Ufasini.’

²⁶ Ia oqo na kena i balebale: Mini: Sa wilika na siga ni nomu matanitu na Kalou, ka sa na mai yalana.

²⁷ Tikeli: O sa vakarautaki oti na kemu bibi ena i vakarau bibi ka kunei ni o sa rui mamada;

²⁸ Piresi: sa wasewasei na nomu matanitu ka soli vei ira na kai Mitia kei na kai Perisia.”

²⁹ Sa qai vakarota sara o Pelisasari me ra vakaisulutaki Taniela ena kote lokaloka balavu vakatui ka vakataubeni koya ena i taube sinucodo koula ni veidokai; ka vakatikori koya me i katolu vei iratou na lewa na matanitu.

³⁰ Ena bogi ga ni siga o ya, a labati kina o Pelisasari, na tui Papiloni:

³¹ ka kovea na kaukauwa vakatui o Taraiasi na kai Mitia, ni sa 62 na nona yabaki.