Taniela 4 - Vakavakadewa Vou kei na iVola tale eso

Karua ni Tadra i Nepukanesa

¹ Oqo na i tukutuku a vakauta o Nepukanesa vei ira na duikaikai kei na duivosavosa mai na veivanua kecega e vuravura: “Ni sa bula vinaka!

² Na i tukutuku oqo mo ni kila kina na veika veivakurabuitaki kei na cakacaka mana e a vakaraitaka vei au o koya na Kalou Cecere.

³ Sa rui veivakadrukai ka veivakurabuitaki na ka e vakaraitaka vei keda na Kalou! Sa rui kaukauwa na veicakacaka mana a cakava o koya! Sa na tui na Kalou ka sega ni mudu; sa na veiliutaki o koya ena veigauna kecega.

⁴ Oi au o Nepukanesa. Au a tiko vakacegu ka marau voli ena noqu vale vakatui.

⁵ Ia au a tadra e dua na tadra rerevaki ka raica na veika veivakurabuitaki ena raivotu ni'u a moce koto ka'u loma leqa kina.

⁶ Au a vakarota me ra soqo vata mai na noqu tamata vuku e Papiloni me ra mai vakaraitaka na i balebale ni noqu tadra.

⁷ Era a qai soqoni kece mai na daukilakila, na daucaka mana, na tamata vuku kei ira na dautukuni kalougata. Au a tukuna vei ira na noqu tadra, ia era a sega ni tukuna rawa vei au na kena i balebale.

⁸ A qai curu mai e muri o Taniela, a yacana talega o Pelitisasari e veiyacani kei na noqu kalou. Ia sa tiko vua na yalona na Kalou tabu, ka'u mani tukuna vua na noqu tadra.

⁹ Au a kaya vua, “I Pelitisasari, na nodra ka levu na daukilakila. Au kila ni sa tiko vei iko na yalodra na Kalou tabu, ka o sa kila na veika vuni kecega. Sa i koya oqo na noqu tadra, ia mo tukuna vei au na kena i balebale:

¹⁰ Ni'u a moce koto au a raica e dua na vunikau levu ni tiko donu ena veimama ni vuravura.

¹¹ A tubu cake tikoga na vunikau ka tara na lomalagi na kena cecere ka sa rawa me ra raica kecega mai na veiyasa i vuravura.

¹² A rairai drokadroka vinaka na drauna, ka so bi tu ena vuana, ia sa rauti vuravura taucoko me kana kina. Era vakaruru e rukuna na manumanu kila ka ra vakacegu e tabana na manumanu vuka, ka ra sa kana mai na vuana na veika kecega sa bula.

¹³ Ni'u a vakananuma tiko na raivotu o ya, au a raica ni sa lako sobu mai lomalagi e dua na agilosi yalosavasava, a sa dauvakararai matua ka dauyadra.

¹⁴ A sa kaci ena domolevu o koya, ka vaka, ‘Taya sobu na vunikau ka musumusuka tani na tabana; vetiraka laivi na drauna ka kaburaka tani na vuana. Vakasevi ira tani na manumanu kila mai rukuna kei na manumanu vuka mai tabana.

¹⁵ Laiva tikoga na vu ni wakana ena qele, ia mo vauca ga ena dua na mama kaukamea ka parasa. Biuta tiko na i musumusu ni vunikau oqo me tiko ga ena veico e veikau. “Me lutuka na tegu na tamata oqo ka me bula voli o koya kei ira na manumanu yava i va ena vanua.

¹⁶ Sa na yali vua na vakasama vakatamata; ka na yabaki vitu na nona vakanananu voli vakamanumanu.

¹⁷ Oqo na nodra i vakaro na agilosi yalosavasava era vakatawa voli; me ra kila kina na lewe ni veivanua kecega ni o Koya na Kalou Cecere sa lewai ira na veimatanitu ni tamata. Sa solia na matanitu vei koya ga sa nanuma kina. Ka sa digitaki ira na tamata wale me ra liutaki na matanitu.”

¹⁸ A qai kaya vei Pelitisasari o Nepukanesa na tui, “Sa i koya oqori na noqu tadra, ia mo tukuna vei au na kena i balebale. E sega ni dua vei ira na noqu dauvakasala e rawa ni tukuna na i balebale ni noqu tadra, ia o iko ga o sa rawata, baleta ni sa tiko vei iko na yalodra na Kalou tabu.”

Vakamacalataka na Tadra o Taniela

¹⁹ A sa lomaleqa o Taniela, ka yacana talega o Pelitisasari, ka sa sega ni tukuna rawa e dua na ka. A qai kaya vua na tui, “I Pelitisasari, mo kakua ni lomaleqataka na tadra kei na i kena i balebale.” A qai sauma na vosa ni tui o Pelitisasari, ka kaya, “Kemuni na tui, au diva ga me kakua ni baleti kemuni na nomuni tadra kei na kena i balebale, ka me baleti ira ga na kemuni meca.

²⁰ Na vunikau levu, sa tubu balabalavu ka tara na lomalagi, sa rawa ni raica na kai vuravura kecega.

²¹ E rairai drokadroka vinaka na drauna, ka levu tu na vuana me rauti vuravura taucoko me kana kina. Era vakaruru e rukuna na manumanu kila ka ra vakasova e tabana na manumanu vuka.”

²² Kemuni na tui, sai kemuni na vunikau oqo. O ni sa tubu me qaqa. O ni sa tubu me tara na lomalagi na nomuni rogo kei na nomuni qaqa ka sa roboti vuravura taucoko na nomuni kaukauwa.

²³ Ni o ni a vakararai tu na tui, a qai lako sobu mai lomalagi e dua na agilosi ka kaya, ‘Taya sobu na vunikau ka vakarusa, ia mo laiva tiko ga na vu ni wakana ena qele. Mo vauca ki na i musumusu ni vunikau ena dua na i vau kaukamea kei na parasa, ka me tiko ga ena veico e veikau. Me lutuki koya na tegu na i musumusu ni vunikau, ia me duri tikoga e kea ena vanua era tu kina na manumanu kila me vitu na yabaki.’

²⁴ Kemuni na tui, na kena i balebale sa vakaoqo: Oqo na nona lewa na Kalou Cecere na veika ena yacovi kemuni.

²⁵ O ni na vakasevi tani mai vei keimami na tamata mo ni la'ki tu vata kei ira na manumanu kila. O ni na kana co me vaka na bulumakau ka moce e tautuba me lutuki kemuni kina na tegu ka yabaki vitu. E muri ga o ni na qai vakadinadinataka kina ni sa lewa na Kalou Cecere na veimatanitu ni tamata ka sa solia na matanitu vei koya ga sa nanuma kina.

²⁶ A sa vakarota na agilosi me biu tikoga ena qele na vu ni wakana. A kena i balebale oqo ni o ni na qai tui tale ena gauna o ni sa vakadinadinataka oti kina ni sai koya ga na Kalou Cecere sa lewa na vuravura kecega.

²⁷ O koya oqo oi kemuni na tui, mo ni qai muria mada na noqu i vakasala. Mo ni caka dodonu ka muduka na i valavala ca. Ni lomani ira na dravudravua. Oqo o ni na qai tubu cake tikoga kina.”

²⁸ A sa mani yaco vei Nepukanesa na tui na veika kecega oqo.

²⁹ Ni oti ga e tinikarua na vula mai na gauna o ya, ni a gade voli na tui ena veisenikau ena dela ni vale vakatui mai Papiloni,

³⁰ sa qai kaya. “E sega beka li ni o Papiloni lagilagi oqo! Au a tara me koro turaga ni noqu matanitu ka me vakaraitaki kina na noqu kaukauwa kei na noqu qaqa, na noqu lagilagi kei na noqu dokai?”

³¹ Ni bera ga ni cavuka na vosa mai na gusuna, a rogo e dua na domo mai lomalagi, ka vakaoqo: “I Nepukanesa na tui, mo vakarorogo ki na ka au na tukuna. Na nomu matanitu sa kau tani sara mai vei iko.

³² O sa na vakasevi tani mai vei ira na tamata, ka o sa na la'ki tu vata kei ira na manumanu kila. O sa na kana co me vaka na bulumakau me vitu na yabaki. E muri ga o na vakadinadinataka kina ni sa lewa na Kalou cecere na veimatanitu ni tamata, ka sa solia na matanitu vei koya ga sa nanuma kina.”

³³ Na vosa oqori a yaco dina sara ga ena siga o ya. A vakasavi tani mai na bula vakatamata o Nepukanesa a sa kana co me vaka na bulumakau. Sa lutuka na tegu na yagona ka sa tubu balavu me vaka na vuti ni ikeli na vuti ni yagona; ia na nona i taukuku a tubu balavu me vaka na i qaso ni manumanu vuka.

Vakarokorokotaka na Kalou o Nepukanesa

³⁴ “Oi au o Nepukanesa. Ni sa oti e vitu na yabaki, ni'u a tu ka rai cake ki lomalagi, a qai lesu tale mai vei au na noqu vakasama vakatamata. Au a vakavinavinaka vua na Kalou Cecere ka'u a vakarokoroko vua ka vakalagilagi koya sa bula tikotiko ga ka sega ni mudu. “Sa na tui tikoga o koya ka sega ni mudu, Ka sa na bula tu ga na nona matanitu ena veigauna kecega.

³⁵ Sa sega ni wilika o koya me dua na ka na tamata; Sa lewai ira na agilosi ni lomalagi kei ira na kai vuravura kecega o koya. Sa sega ni dua e saqata rawa na nona lewa Se me liaca na ka sa cakava.

³⁶ Ni lesu tale mai vei au na vakasama vakatamata, a qai soli lesu tale vei au na lewa ni noqu matanitu, na noqu dokai kei na noqu lagilagi. Era a kidavaki au na noqu dauvakasala kei ira na noqu tamata sucu turaga, ka vakalesui tale vei au na kaukauwa vakatui ka vakalevutaki cake na noqu dokai.

³⁷ Ia oqo, oi au, o Nepukanesa, au sa vakavinavinaka, doka, ka vakalagilagi koya na Kalou ni Lomalagi. Na ka kecega sa cakava o koya sa dodonu. Sa lewa vakadodonu sara o koya, ka sa vakamaduataki koya sa cakacaka vaqaciqacia.”