Taniela 12 - Vakavakadewa Vou kei na iVola tale eso

Gauna ni Vakataotioti

¹ Na agilosi sa daramaka voli na i sulu lineni sa kaya vakaoqo, “Ena gauna o ya, ena qai tucake kina o Maikeli na agilosi kaukauwa ka qaqa, o koya a dauyadravi ira na nomu kawa tamata. Sa na qai yaco e dua na gauna ni rarawa levu, na gauna ni rarawa oqo e se sega ni bau yaco ena dua na gauna mai liu ni se qai tubu kina na veimatanitu. Ni sa yaco mai na gauna oqori, o ira kecega na lewe ni nomu vanua sa volai tu na yacadra ena i Vola ni Kalou era na vakabulai.

² E vuqa vei ira era sa mate oti era na bula tale. Eso vei ira era na bula ka sega ni mudu, ia eso ena nodra na madua kei na veivakalolomataki tawa mudu.

³ O ira na vuku era na qai serau me vaka na rarama ni lomalagi. Ia o ira era a vakavulici ira na lewe vuqa me ra cakava na ka dodonu era na serau tu me vaka na kalokalo, ka sega ni mudu.”

⁴ A sa qai kaya vei au, “Ia oqo, i Taniela, mo sogota na i Vola ka tuki dregata me yacova na gauna ni vakataotioti. Era na veiciciyaki na lewe vuqa ka levu sara na i valavala ca.”

⁵ Au a qai raica e lewe rua tale na tamata ni rau tucake tu, ka rau yadua tu na tai ni uciwai.

⁶ Sa qai taroga e dua vei rau vei koya na agilosi ka tucake tu ena uciwai vakalailai ki cake, “A cava na kena dede me sa na qai oti kina na veika veivakurabuitaki oqo?”

⁷ Sa qai laveta cake na ligana ruarua vaka ki lomalagi na agilosi, ka vosa yalayala ena yaca ni Kalou Tawamudu. Au a rogoca ni kaya vakaoqo, “Ena tolu veimama na yabaki na kena dede. Ni oti na nodra vakararawataki na tamata ni Kalou, sa na qai yaco na veika kecega oqo.”

⁸ Au rogoca na ka e a kainaka o koya, ia au a sega ni kila na kena i balebale. Au a tarogi koya, ka vaka, “Noqu Turaga, ena tini vaka e vei na ka kecega oqo?”

⁹ A sauma o koya, ka kaya, “Mo lako ga, Taniela, baleta ni veivosa oqo e dodonu me kakua ni kilai ka me vunitaki sara ka yacova ni sa yaco mai na i Vakataotioti.

¹⁰ Era na lewe vuqa era na vakasavasavataki ka vakavoui. O ira na tamata ca era na sega ni kila na ka oqo, ka ra na caka ca tikoga; ia o ira na vuku era na kila na kena i balebale.

¹¹ “Ena oti mada e 1,290 na siga mai na gauna era a muduka kina na vakacabori ni soro ni veisiga, o ya, mai na gauna a vakatikori kina na Matakau Vakasisila.

¹² Sa dodonu me ra marau o ira era sa yalodina tikoga ka yacova ni oti e 1,335 na siga.

¹³ Ia o iko, Taniela, mo tamata yalodina tikoga ka yacova na nomu mate. Ia ni o sa mate, o na qai tucake tale ena i vakataotioti mo taura na kemu i sau.”