Taniela 10 - Vakavakadewa Vou kei na iVola tale eso

Raivotu ena Bati ni Uciwai

¹ Ena i katolu ni yabaki ni tui Peresia i Sairusi, a vakaraitaki kina vei Taniela, yacana talega o Pelitisasari e dua na i tukutuku. Na i tukutuku o ya sai tukutuku dina, ia na kena i balebale ga sa rui dredre me kilai. A qai vakamacalataki vua na kena i balebale ena dua na raivotu.

² Oi au o Taniela. Ena gauna o ya au a vakaloloku voli ka macawa tolu.

³ Au a sega ni kania e dua na kakana uro se dua na lewe ni manumanu; ka'u a sega ni gunu waini se bau seruta na uluqu ka yacova ni sa sivi e tolu na macawa.

⁴ Ena i ka 24 ni siga ni matai ni vula ena yabaki o ya, au a tucake tu ena bati ni uciwai na Taikirisi.

⁵ Au a rai cake ka'u raica sara e dua na tamata e vakaisulu tu ena i sulu lineni ka vauci tu na tolona ena dua na kena i vau koula.

⁶ A taliva na yagona me vaka na vatu talei. Na matana a serau me vaka na rarama ni tatibi ni liva, ka caudre na yaloka ni matana me vaka na bukawaqa. Na ligana kei na yavana a taliva me vaka na parasa sa masi vakavinaka, ia na rorogo ni domona sa vaka na rorogo ni domo ni ra kaci vata e lewe vuqa na tamata.

⁷ Oi au duadua ga au a raica na raivotu. O iratou na tamata keitou a tu vata e ratou a sega ni bau raica e dua na ka, ia e a levu ga na nodratou rere ka ratou mani dro ka la'ki vunitaki iratou.

⁸ Au a qai vo duadua tu ga e kea me'u sarava na raivotu veivakurabuitaki oqo. A yali vakadua na noqu kaukauwa, ia na mataqu a tavuki sara ga na kena i rairai ka sega ni rawa ni na kilai au e dua na tamata.

⁹ Ni'u rogoca na nona vosa, au a bale sobu vakatoboicu ki na qele ni'u sa rebo.

¹⁰ A qai tauri au e dua na liga ka vakaduri au me'u tekiduru toka e duruqu kei na duruduru ni ligaqu; ia au a sautaninini toka ga.

¹¹ A qai kaya vei au, “I Taniela, sa lomani iko na Kalou. Mo tucake ka vakarogoca na ka au na tukuna vei iko. Au sa talai mai vei iko.” Ni tauca oti na vosa oqo, au a qai tucake; ia au sautaninini tikoga.

¹² A qai kaya vei au o koya, “Kakua ni rere, Taniela. Sa rogoca na nomu masu na Kalou ena i matai sara ga ni siga o a lewa kina mo vakamalumalumutaki iko mada me rawa kina ni o kila na ka. Na i sau sara ga ni nomu masu au sa lako mai kina oqo.

¹³ Ia sa siga ruasagavulu kadua na nona mai saqati au tiko na agilosi dauveiyadravi ni Peresia. Oti a qai lako mai o Maikeli, e dua vei ira na agilosi liu, ka mai vukei au baleta ni'u a biu duadua tu ga ena matanitu o Peresia.

¹⁴ Au sa lako mai oqo me'u mai vakatakila vei iko na ka ena yaco vei ira na kai nomu ena gauna mai muri. Oqo e dua na raivotu vou ka baleta na gauna mai muri.

¹⁵ Ni vosataka oti na vosa oqo, au a cuva sobu ki na qele ka'u sega ni tukuna rawa e dua na ka.

¹⁶ A qai dodo liga mai e dua e vaka na i bulibuli ni tamata, ka tara na tebe ni gusuqu. Au a mani dalaga ka tekivu vosa sara yani. Au a kaya ki na ka e vaka na i bulibuli ni tamata ka tucake tu e mataqu, “Noqu turaga, na raivotu oqo sa vakamalumalumutaki au sara ga ka sa sega kina ni rawa me'u tarova na noqu sautaninini.

¹⁷ Au sa tautauvata kei na dua na bobula ena mata ni nona turaga. Au na vosa rawa vaka e vei kemuni? Sa sega na kaukauwa kei na i cegu sa vo tiko vei au.”

¹⁸ A qai tarai au tale o koya, ka'u vakila sara ni'u sa kaukauwa cake mai.

¹⁹ A mani kaya vei au o koya, “Mo kakua ni taqaya se rere ni sa lomani iko na Kalou. Mo yaloqaqa ga.” Ni tauca oti ga na vosa oqo o koya, au vakila sara ga ni'u sa kaukauwa vinaka mai. Au a qai kaya vua, “Noqu Turaga, o ni sa vakaukauwataki au; ia, mo ni tukuna mai vei au na ka o ni via tukuna.”

²⁰ A qai kaya o koya, “O kila tiko li na vu ni noqu lako mai vei iko? Na vu ni noqu lako mai oqo me'u mai vakatakila vei iko na veika a volai tu ena i Vola Ni Ka Dina. Ia oqo, au sa na lesu tale me'u la'ki vala kaya na agilosi dauveiyadravi ni Peresia. Ni oti o ya ena qai lako mai na agilosi dauyadra ni Kirisi.

²¹ Na veika vakaoqo, ena dau vukei au duadua ga kina o Maikeli, na nomuni agilosi dauveiqaravi na Isireli, ka sega tale ni dua.