Sefanaia 3 - Vakavakadewa Vou kei na iVola tale eso

Na Valavala Ca i Jerusalemi kei na Nona Vakabulai

¹ Ena ca o Jerusalemi, na koro dukadukali ka talaidredre o ya ka sa dauvakasaurarataki ira na nona tamata.

² A sa sega tiko ni dau vakarorogo vei Jiova se ciqoma na nona veivakavulici. Sa sega ni dau vakararavi vei Jiova se me daukerea na nona veivuke.

³ Era sa vaka na laione dautagi na kena i vakalesilesi; o ira na kena turaganilewa era sa vaka na olifa sa viakana, era sa sega ni rawa ni vakavoca e dua na sui me yacova na mataka ka tarava ena levu ni nodra kocokoco.

⁴ O ira na kena parofita sa sega ni dinata na nodra i tavi ka dauveivakaisini; o ira na bete era sa vakacacana na veika sa vakatabui, ka vakatanitaka na Lawa ni Kalou me ganiti ira ga vakai ira.

⁵ Ia sa tiko ga ena loma ni koro o Jiova; sa vakayacora ga o koya na veika dodonu ka sega sara na ka e ca. A sa dau tauca ga na lewa dodonu vei ira na nona tamata ena veimataka kece sara ka sega ni dua na siga me lutu. Ia, o ira na tamata tawa dodonu mai kea era sa ia tikoga na caka cala ka sega ni maduataka.

⁶ Sa kaya o Jiova, “Au sa vakarusa oti na veimatanitu eso; au sa vakacacana oti na nodra veikoro lelevu ka laiva me rusa tu yani na nodra bainikoro kei na nodra veivaleniyadra cere i cake. Sa laladidi na kena gaunisala, ka sega na tamata e vo tu kina.

⁷ Au a nanuma ga ni ra na qai rerevaki au kina na noqu tamata ka ciqoma na noqu i vakavuvuli, ka sega ni guilecava na veika ka'u a vakatavulica vei ira. Ia sa qai leqa ga vakalevu na nodra bula ni sa ca vakalevu sara na nodra i valavala.

⁸ A sa kaya o Jiova, “Ni waraki au mada. Ni wawa me yacova na siga ka'u na duri cake kina me'u beitaki ira na veimatanitu. Sa dei tu na lomaqu me'u soqoni ira vata na veimatanitu kei na veivanua ka laiva me ra tovolea mada na kaukauwa ni noqu cudru. Na waqa ni noqu cudru ena vakarusa na vuravura taucoko.

⁹ “E muri au na qai vakayacora na veisau vei ira na lewe ni veimatanitu, era na masuti au duadua ga ka segai vei ira na kalou tale eso. Era na talairawarawa kece vei au.

¹⁰ Mai na vanua yawa sara o Eciopea, era na kauta mai kina na noqu tamata era sa veituyaki tu na i madrali me ra vakacabora vei au.

¹¹ Ena gauna o ya, kemuni na noqu tamata, sa dodonu me oti kina na nomuni maduataka na nomuni a vorati au. Au na kauti ira tani kece na tamata dokadoka ka qaciqacia, ka o ni na sega vakadua tale kina ni vorati au ena noqu ulunivanua tabu.

¹² Au na qai biuta ga na tamata yalo rawarawa ka yalomalumalumu me ra tiko e kea, o ira era na lako mai vei au me ra vukei.

¹³ O ira na vo-ni-bula e Isireli era na sega sara ni caka ca vua e dua tale, se vosa lasu, se veivakacalai. Era na vutuniyau ka tiko dei, ka sega ni dua na tamata me ra rerevaka.”

A Sere ni Marau

¹⁴ Mo ni sere ka kaila ena marau, oi kemuni na Isireli! Mo reki ena lomamu taucoko, o iko Jerusalemi!

¹⁵ Sa muduka o Jiova na nomu cudruvi; Sa kauti ira tani na kemu meca kece o koya. O Jiova, na tui Isireli, sa tiko kei kemuni; Sa sega na i ulubale mo ni se rere tikoga kina.

¹⁶ Sa voleka mai na gauna me ra kaya kina vei Jerusalemi, “Mo kakua ni rere, na koro o Saioni! Kakua ni vakamalumalumutaka na ligamu me damele tu!

¹⁷ Sa tiko vata kei kemuni na nomuni Kalou o Jiova, Na nona kaukauwa sa solia vei kemuni na qaqa. Ena marautaki kemuni ga o Jiova, Ena solia vei kemuni na bula vou ena nona loloma. Ena laga sere ka mamarau ena vukumuni,

¹⁸ Me vakataki ira sa mamarau ena dua na solevu.” A sa kaya o Jiova, “Au sa tarova na nomuni vakarusai Ka kauta laivi na nomuni madua.

¹⁹ Sa lako tiko mai na gauna! Au na totogitaki ira na dauvakasaurarataki kemuni; Au na vakabulai ira kece mai na lokiloki Ka vakalesui ira mai na vakabobulataki ki na nodra vanua. Au na vukica na nodra madua me ra dokai, Ka na vakacaucautaki ira o vuravura taucoko.

²⁰ Sa lako tiko mai na gauna! Au na vakalesui ira kina sa veituyaki ki na nodra vanua; Au na vakarogoi kemuni kina e vuravura taucoko Ka vakayacora mo ni bula sautu tale mada.” A veika oqo sa kaya o Jiova.