Sefanaia 2 - Vakavakadewa Vou kei na iVola tale eso

Na Vakamamasu ni Veivutuni

¹ Vei iko na matanitu sa lecava na madua, mo yalomatua mada

² ni se bera ni o cagitaki laivi me vaka na qanisila sa cagina ena cagi, ni se bera ni drau sota kei na cudru katakata i Jiova, ni se bera na siga me vakaraitaka kina na nona cudru kaukauwa.

³ Ni vakanamata vei Jiova na tamata yalomalumalumu kece ni vanua, oi kemuni sa dau talairawarawa ki na nona i vakaro. Ni cakava na ka dodonu, ka vakamalumalumutaki kemuni ena mata i Jiova; de o ni na qai calata na i totogi ena siga sa vakaraitaka kina o Jiova na nona cudru.

Na Nodra Vakarusai na Veivanua sa Voliti Isireli

⁴ Ena sega ni dua e vo tiko ena koro levu o Qasa. Ena vakalalai na koro o Asikiloni. Era na vakasavi laivi na kai Asitoti ena veimama ni dua ga na siga, era na cavuivuvu na kai Ekironi mai na nodra koro.

⁵ Sa oti vei kemuni na kai Filisitia, oi kemuni na tamata o ni vakoro tu oqori e baravi. Sa tauca oti na kemuni totogi o Jiova. Ena vakarusai kemuni o koya, ka na sega ni vakavo e dua vei kemuni.

⁶ Na nomuni vanua ena bati ni baravi ena yaco me vanua lala ni vakana sipi ka sa tiko kina na nodra vale na i vakatawanisipi kei na bai ni sipi.

⁷ Era na tawana na nomuni vanua o ira na vo-ni-bula e Juta. Era na vakania mai kea na nodra sipi, ka ra na moce ena veivale mai Asikiloni. Ena tiko ga kei ira na nodra Kalou o Jiova, ka na vakavutuniyautaki ira tale o koya.

⁸ Sa kaya o Jiova ni lewevuqa, “Au sa rogoci ira na kai Moapi kei Emoni ni ra vosabeci ira ka rukaki ira na noqu tamata, ka ra vosa bolebole ni ra na taura vakaukauwa na nodra vanua.

⁹ O koya oqo, me vaka ni'u sa nodra Kalou bula na Isireli, au sa yalataka kina ni rau na vakarusai vakaidina o Moapi kei Emoni me vakataki Sotoma kei Komora. E rau na yaco ga me rau vanua ni keli masima kei na rusa tawa mudu, ka tubua vakalevu ena co. O ira na vo-ni-bula vei ira noqu tamata era na qai kovea na nodra i yau ka taura na nodra vanua.”

¹⁰ Sa na vakaoqo na nodra i totogi na kai Moapi kei Emoni mei sau ni nodra dokadoka kei na vosa bolebole, ka vosa beci ira na tamata ni Turaga na Kalou levu

¹¹ Ena cakava vei ira na Turaga na ka rerevaki kecega. Ena vaqeyavutaki ira na veikalou ni vuravura oqo me ra oti vakadua, era na qai masuti koya na veimatanitu mai na nodra dui vanua.

¹² Ena vakamatei ira talega na kai Eciopea o Jiova.

¹³ Ena vakayagataka o Jiova na nona kaukauwa me vakarusai Asiria kina. Ena vakarusa me lala ka rusa na koro levu o Ninive, me vanua dravuisiga sa sega kina na wai.

¹⁴ Ena vanua ni nodra dadavo na qelenisipi kei na bulumakau, na me kei na veimataqali manumanu kecega. Era na vakaitikotiko na lulu ena veiyasa ni koro sa rusa tu, ka ra na dautagi toka mai na kedra veikatubaleka. Era na luvaluvati tani mai na kau sitari ni kena veivale.

¹⁵ Na ka oqo ena yaco ki na koro sa dau dokadokataka tu na nona kaukauwa, ka nanuma ni na sega ni rusa rawa. Era sa nanuma na lewena ni sa koro cecere duadua ena vuravura na nodra koro oqo. Ia ena yaco me vanua laladidi sara, ka nodra i vakavakacegu na manumanu kila. O ira kecega era lako sivita era na kidacala sara ena domobula.