Sakaraia 7 - Vakavakadewa Vou kei na iVola tale eso

Lolo e Sega na Kena Yalo Dina

¹ Ena i kava ni yabaki vakatui i Taraiasi, a solia kina o Jiova e dua na i tukutuku vei Sakaraia. E a basika na i tukutuku ena i kava ni siga ni i kaciwa ni vula, na vula o Jisilevi.

² O ira na lewenivanua mai Peceli era a talai Saresa kei Rekemimeleki vata kei ira na nodrau tamata me ra lako ki na Valenisoro i Jiova ni lewevuqa ka masuta na nona veivakalougatataki,

³ me ra taroga talega vei ira na bete kei ira na parofita na taro oqo: “E dodonu beka me keimami vakaloloku tikoga ena vuku ni kena a vakarusai na Valenisoro, ka daulolo ena i kalima ni vula me vaka keimami sa dau vakayacora tiko mai ena vuqa na yabaki?”

⁴ Oqo na i tukutuku i Jiova ka yaco mai vei au.

⁵ A sa kaya o koya, “Mo tukuna vei ira na lewenivanua kei ira na bete ni sa sega ni'u dau vakarokorokotaki oi au ena nodra a daulolo ka vakaloloku ena i kalima kei na i kavitu ni vula ena vitusagavulu na yabaki sa oti.

⁶ Ia ni ra sa daukana ka gunu, era a dau cakava ga me ra mamau ka marau kina.”

⁷ Oqo na i tukutuku vata ga sa dau vosa oti kina o Jiova vei ira na parofita e liu, ena gauna a vutuniyau tu kina o Jerusalemi ka sinai tu kina na tamata, ka ra tu na tamata ena veikoro era tu wavokita ka vakakina ena yasayasa mai na ceva kei na veibuca mai na ra.

Na Talaidredre sa Vu ni Kau Vakabobula

⁸ Na i tukutuku oqo sa solia o Jiova vei Sakaraia:

⁹ “Au a sa vakaroti kemuni oti mo ni dau vakatauca ga na lewa e dodonu ka dina. E dodonu vei kemuni kecega mo ni dau vakaraitaka na yalovinaka kei na loloma ena kemuni maliwa.

¹⁰ Ni kakua ni vakasaurarataki ira na yada, na luveniyali, na kai tani era tu kei kemuni, se dua tale e vakaloloma tu. Ni kakua ni veinakicataki vakai kemuni.”

¹¹ “Ia era sa bese ga ni via vakarorogo na noqu tamata. Era a sogota ga na yalodra

¹² ka vakaukauwataka na lomadra me vaka na vatu. Ena vuku ni nodra a bese ga ni vakarorogo ki na i vakavuvuli ka'u a solia vei ira na parofita era a bula mai liu, au sa cudru vakalevu sara kina.

¹³ Ena vuku ni nodra a sega ni vakarorogo ena gauna au a vosa kina, au a sega ni rogoci ira kina ni ra sa masuti au.

¹⁴ Au a vakavukaci ira tani me vaka na liwa ni dua na cagilaba me ra la'ki tu mai na veivanua tani. A mani yaco me lala tu ga kina na vanua vinaka oqo, ka sega e vakatawana.”